تكيس شديد بالمبايض وضعف بالتبويض

السلام عليكم ورحمة الله وبركاته
اعاني من مايقارب السنه نبض بالرأس وصداع ودوخه
وقررت اروح عند الدكتوره اطمن
وقبل يومين عملت تحاليل شامله بالدم وعملت تخطيط للقلب
وخبرتني الدكتوره انه عندي عدم انتظام بدقات القلب والغالب من الإجهاد او ضغوط نفسيه
وإن شاءالله مع الراحه مافي شيء يخوف

وانصدمت لمن قالت لي انه عندي تكيس شديد في المبايض وضعف شديد بالتبويض وماراح تحملين طبيعي
وهي كمان مصدومه تقول انتي رفيعه { نحيفه } وشلون يصير التكيس بها الشكل
والله يابنات ماكنت افكر بالحمل نهائي بالوقت الحالي وعندي اربعه اطفال متلاحقين الله يحفظهم ويرزقني برهم
ونحيفه وزني مابين 51.5 الى 52 ومانزلت لها الوزن الا بعد رياضه ونظام غذائي
امس خوفتني وطريقتها بالكلام الله يسامحها وبس
لمن قالت مستحيل تحملين نهائي الا بعلاجات
والحبوب المركبه نهائي ماتناسبني لأني عرضه للجلطات كفانا الله شرها
طيب قبل 8 سنوات استخدمت ياسمين لسنتين وماعندي الا العافيه
وش معنى الحين صار جسمي مايتقبلها
اخذت مارفيلون ل4 شهور واتعبتني
وقبلها استخدمت لصقه وحده ايفرا وفي اسبوع ظهرت علي اعراض جلطه بالساق اليمنى

اول مره قالت مادامك ماتفكري بالحمل حالياً فماراح اعطيك ادويه التكيس الشديد بحد ذاته مانع للحمل
ومايناسبك الا اللولب .. ونفسياً مو متقبلته لأني جربته سابقاً واتعبني حييل
وخبرتني انتظر شهر واروح اركبه عندها والى الأن مو مقتنعه فيه

واصريت عليها اعالج التكيس..
وصفت لي كلوفاج وهي متردده تقول انتي نحيفه وممكن مع قلة الأكل يصير عندك هبوط سكر وتدخلي غيبوبة سكر ووصفت لي فيتامينات زيت كبد الحوت حبه مع كل وجبه

وسألتها عن حبوب ديانا 35 .. قالت هذه تعالج ارتفاع همون الذكورة وماتمنع الحمل وممكن تعالج التكيس
لو حبيتي تستخدميها خذيها ل6 شهور وارتاحي بعدها 6 شهور وارجعي استخدميها

بنات الله يجزاكم خير الي مرت بوضعي تطمني وأملي بالله كبير ولله الحمد
وإذا لي عمر فيارب يكون ع طاعته