مثل ماشاف البعض منكم موضوعي الي قبل عن غسالتي للملابس الويبرلبول استفساراتي عنها
وطلبت مني وحده من الاخوات اكتب لكم عن تجربتي فيها
بالبدايه اخواتي انا شريتها بعد مافريت منتديات كثيره وطلعت منها ان الاغلبيه كانو يمدحون ميتاج عن تجربه وبعدها تجي جنرال الكتريك وويبرلبول وكنت مقرره اشتري من هذي الشركات وفريت معارض مكه قالوا ليه ان جنرال الكتريك الاصليه ماهي موجوده بالسوق فيه جنرال الصينيه بس ما ادري يمكن لها وكيل خاص فيها اما ميتاج فبعضهم مايعرفونها اصلا ومحل واحد بس قال عندي بالمخزن فقلت شكلها قديمه عنده من زماااااان وويبرلبول فقالو موجوده عند وكيلها الزقزووق بس آخر انواع نزلت السوق اما النوع القديم لقيته بمحلات ثانيه غير الوكيل وهيه ماتشتغل الا على كهربا 110 ممكن يغيرها مهندس على 220
واشتريت من الوكيل النوع الاحدث كهربا 220
والي لاحظته يابنات من صور لغسالة ميتاج انها نفس ويبرلبول بالشكل الخارجي والبرامج تماما وهذي الصور عشان تشوفو التشابه في البرامج
هذي ميتاج
وهذي ويبرلبول
طبعا هذا الزر الاساسي حق البرامج وفيه زر لاختيار حراره الماء بالغسله والشطف والزر الثالث لمستوى الماء ثلاث مستويات صغير ووسك وكبير طبعا نفس الازرار بس موجوده بعد بميتاج ومافيهم ازرار للتوقيت .. وشرح هالازرار موجود بالصورة الي شرحتها بموضوعي السابق اخت سمن وعسل
وهذي صورتها كامله طبعا واضح الشكل الخارجي فيها كمان وهو نفس شكل ميتاج بعد... معليش الصور حتطلع كبيره بس راح يتزبط حجمها تلقائي خخخخخخخخخخخخ
طبعا اخواتي بالنسبه لاستخدامي لها بصراحه احسها جووده وقويه وشغلها منظم وبالنسبه للنظافه بالبدايه لما اخلي الابيض لفه وحده بس على برنامج النورمل اقوى برنامج فيها ماتنظف لكن لما اخليه يخلص اللفه الاولى وارجع الفها مره ثانيه تصير نظيفه وللملابس الداخله البيضا الفها مرتين ثم تفضي والفها بمويه جديده مره ثانيه وتطلع تمام اما الملون يطلع نضيف والبقع السهله تطلع اما القويه الي ماتطلع فيبغالي اطلعها على يدي ثم احطها بس عموما يطلع الملون نظيف
اما الصابون كانت عندي غساله عاديه واستخدم تايد بصراحه ولا شي لا نظافه ولا حاجه بالذات الابيض ابدل المويه مرتين واتعب واقعد فيه يومين وليته على نتيجه حلوه
فلما جبت الاتوماتيك جبت صابون اريال بصراحه تايد خررراب جنبه مو زين ولا ياخذ مني الغسيل ساعتين
بصراحه حلوه ومرتاحه لها كثير بس بالنسبه ليه الي احسه ناقصها لو فيه خيار للوقت يعني اتحكم بوقت الغسله بدل ما الفها ثاني يعني اقدر اختار ساعه او نص ساعه مثل مافي الغسالات الكوريه هذا الخيار الي هي مثل ال جي وسامسونج وغيرها ولا كل شي ثاني تمام
بالنسبه للاخوات الي يفكرون يشترون غسالة ويبرلبول قبل شهر من الان في عيد الفطر كانت اخر وحده انا اخذتها وكانت كل الفروع بالمملكه تقريبا مخلصه منها وكان العامل يقول انه حتوصل دفعه منها بعد شهر
ما ادري يمكن تجي موديل جديد يكون فيه خيار للوقت مثل ما اشوف انواع جديده وفيه نوع نفس شكل غسالتي بس فيها زر جديد اضافي على موقع شركة ويبرلبول منزلينها للسوق وهذا موقعهم قسم الغسالات
http://www.whirlpool.com/catalog/category.jsp?cat=115&Ns=PRODUCT_PRICE|1&N=0
وهذي هي الغسالات الجديده الي منزلينها واتوقع حيجيبو منها
http://www.whirlpool.com/catalog/laundry_gallery.jsp
مثل مانتو شايفين اخواتي الانواع النازله من الغساله والنشاف الي موجوده على اليمين اللون الابيض مثل غسالتي بالشكل وفيها ازرار اضافيه النوع الي بالوسط مكتوب انها اقوى ووميزات اضافيه الي باليسار تعبئة اماميه
ان شاء الله اكون افدتكم بالموضوع واي استفسار انا جاهزه