تمليس الشعر (كريم الفرد)للشعر المجعد أو الخمري

السلام عليكم و رحمة الله و بركاته
أخباركم بنات ان شالله بخير
بكلمكم اليوم عن موضوع محارب شويه ، ألا وهو تمليس الشعر ، الكثير يتكلم عن مضاره و انه ما ينفع حتى المشاغل صارت ترفض تسويه ،
مع ان الكيراتين احيانا ما يحل المشكله لانه هو علاج للشعر و ليس فرد ، حتى الانواع المخصصه للفرد تكون مخلوطه بمملس ، هذا غير اسعاره العاليه ،
حتى مره رحت لخبيرة شعر قالت لي لا تسوين كيراتين شعرك صحي لكن طبيعته مجعده ، راح تخسرين فلوسك عالفاضي ،
طبيعة شعري مجعد و يرجع بسرعه بعد السشوار ، نص ساعه و لا كني لمسته ،
عالعموم قلت ما في الا تمليس بس يكون مش ثقيل مره او قوي عالشعر ،
رحت أخذت تمليس للأطفال المخصص للشعر العادي لأن في نوع للشعر القوي أتوقع فقط يناسب الشعر الأفريقي فقط.


المهم خذت العلبه و وديتها للكوفيره قلت لها حطيه على مسؤوليتي مع انها خافت بس عطيتها الأمان هههههههه
سوته و خليته ١٥ دقيقه ، بديت احس بشوية حراره أسفل الراس يعني الغره ما حسيت بشي بس فروة الراس من تحت عورتني ، خليتها تغسله بسرعه ، طبعا من اول لمسه حسيت بفرق بشعري ،
طبعا بعدها ظل تقريبا ٤ ايام و هو جاف جدا ، انا خفت اول الايام ، لكن بعدها الحمد لله رجعت له الرطوبه و صار حلو و سهل السشوار و لا يكش ماشالله ، و من بعدها وانا مستمره عليه
يعني تقريبا كل ٤ شهوره اروح للكوفيره بس تحطه على الجذور ،
الحمد لله نتيجه مرضيه و لكن انتبهوا لا يطول بالشعر ، لو شعرك خفيف و ما يتحمل خليه ١٠ دقايق فقط ،
الجانب الوحيد السيء هو الجفاف بعد التمليس لكنه بالنسبه لي يروح بعد ٣ الى ٤ ايام ، طبعا مع الزيوت و البلسم يروح اسرع ، انا علمتكم ا نه يسبب جفاف مؤقتا لا تجي وحده تدعي علي ، انا حاطه الموضوع لاني ارتحت من معاناة شعري وابي اللي مثلي ما يكفيهم الكيراتين يستفيدون ، لان الكوفيرات ما فادوني اضطريت اتعلم بنفسي،
اي وحده مو حاسه ان شعرها يتحمله لا تسويه ،


ولو وحده سوته تلتزم بالتعليمات ، والنتيجه ان شالله مرضيه ،
اي صحيح نسيت اللي صابغه لا تسوي ، الصبغ مع التمليس ما يجتمعون ابد ،
حتى لو ملستي عقبها لا تصبغين شعرك يحترق .


وو سلامتكم
دعواتكم لي .....و لكم المثل ان شالله 💗