تمنيت الارض تنشق وتبلعني ..

مرحبا بالحلوات
هذي اول مره احط كل هنا مشكله ..

صراحة صار لي امس موقف لايحسد عليه تمنيت تنشق الارض وتبلعني

المهم :
الله يسلمكم انا كل خميس نتجمع ف بيت جدتنا كلنا خواتي وخالاتي وحريم خوالي وبنات خالاتي

وحنا نسولف تطرقو للكلام عن بنت خالتي الصغيرة بالمتوسط
يقولو تكتب كلام مش كويس بالبلاك بيري
يعني زي حب و غرام ..
ومع مين للاسف مع اخوها اللي بالرضاعه
وانا ضايفتها عندي بالبلاك بيري من زمان واشوف ايش اللي تكتب بس ساكته زي كلام المتزوجين لبعض

رحت قلت ايوه الله يهديها مره كلامها مو كويس كانو حبيبتو
وسكتنا
وقعدنا نضحك ونهرج ونتقهوى
وبعد ساعه سمعنا صرااخ بصووت قوي مرره انا انفجعت ع بالي بنتي طاحت او احد من العيال..

وادخل اشوف خالتي الكبيرة جالسه تبكي وتدعي والكل مجتمع عليها وبنتها اللي بالمتوسط بتموت من البكى
اش في ايش صاير ؟

قالت بنت خالتي انتي مطلعه عليا كلام انو انا اعشق اخوها اللي بالرضاعة ..

انا بلمت على طول ودار راسي من اللي نقل كلامي وغلط كمان صدعت مرره ولاشعوريا
قلت من اللي قال من اللي قال وكل البنات انفجعو وخافو مني

قامت اختي الصغيره قالت فلانة اللي نقلتك
وهي بنت خالتي الثانية بصف اول ثانوي
والله مسكتها وشرشحتها وقلت عيب تنقلي كلام احنا اهل ليش تسوي كذا
عيب عليكي
وقلت كلام كثيررر ارتفع ضغطي ومدري ايش قلت وقعدت ارجف
ومسكت بنت خالتي الثانيه وفهمتها ايوه صحيح قلت بس بمزح وانتي كنت قاعدة مو من وراكي
بس اظن هي ماسمعت
وقلت لها انو عيب اللي تسويه هذا اخوها بالرضاعه مو زوجها عشان تكتب له كلام حب وغزل
لكن برضو معنده وزعلانه مع اني ام عيال واكبر منها
وتنكدت امس
والحريم جلسو يطلو فيني وبالموت قدرت ارجع لوضعي الطبيعي
وبعد مارجعت البيت لاحظ زوجي اني متضايقة بس ماقلت له

بس اللي صدمني خالتي وبناتها جالسين يتحسبو عليا بالواتس اب والبلاك بيري
يكتبو حسبي الله ونعم الوكيل
اللهم اهزم الاحزاب وزلزلهم
وكلام كثيررر

الله يعافيكم انصحوني ايش اسوي .. انا انسانه ف حالي ومحب احد يجلس يحقد عليا من وراي
والمفروض خالتي اللي هيا امها تهزأها ع اللي بتسويه مو توقف مع بنتها

انصحوني ايش اسوي اللحين انا ما اتحمل اشوف كلام ونغزات من تحت لتحت والمشكله كلهم حطو المشكله ع راسي كانو انا اللي تكلمت بس مو هم معاي