تنبيه مهم لكل وحده مقبله لعمليه تنشيط او صناعي او انابيب

السلام عليكم ورحمه الله و بركاته
ادعي من كل قلبي ان الله يرزقكم الذريه الصالحه عاجلا ان شاءلله ويفرح قلوبكم و تاكدوا ان الله ماراح ينساكم بس تحلوا بصبر و الدعاء
عشان مااطول عليكم بدخل في الموضوع و الموضوع هذا يهم الي عندهم تأمين او يعرفون احد يتعالج على حساب التامين طبعا التأمين مايتكفل بعلاج تأخر الحمل بقولكم قصتي عشان تفهمون اكثر
انا كنت اعاني من تأخر الحمل لمده اربع سنوات لسبب طبي مجهول مع ان انا وزوجي سليمين لكن الله مااراد في هذا الوقت سويت انابيب وصناعي كلهم فشلو بعد فشل لانابيب جاني احباط واكتأب شديد وانعزلت عن العالم لين يابنت توكلي على الله وسوي الي عليك حاولت اطلع موضوع الحمل من مخي واكون صريحه معاكم ابدا ماطلع من مخي بس حاولت اشغل نفسي توظفت والهيت نفسي وقلت ربي بيرزقني ان شاءلله اذا اراد كل الي علي اني ادعي وسعى في العلاج
اختصار القصه ان بعد فشل الانابيب اخذت ابر تنشيط فقط وتوكلت على الله و ماشاءلله تبارك الله الله رزقني بلحمل نجي عند بيت القصيده لما جيت اولد جا قبول التامين و ولدت وخلصت ثاني يوم الصاعقه التامين رفض علاجي لان لان حملي على قولتهم بمنشطات غير طبيعي ماكانه من عندلله هذا وهي منشطات مو انابيب او صناعي

نصيحتي لكل وحده عندها تامين انها تعالج تاخر الحمل في مستشفى غير الي هي بتتابع الحمل فيه او الولاده لانهم بيدورون في ملفك مثل ماسوو فيني لما ولدت وخلصت ثاني يوم قالو لي ان التامين رفض حالتك لان كل شركه تامين ترسل دكتور من عندهم يشيك ملفات المرضى عشان يلقى عيب ممكن يرفض العلاج عشانه وله الحق لان لما كلمنا المحامي لان المستشفى رفض يعطينا شهاده الميلاد لين ماندفع قال المحامي ان للاسف شركه التامين لها حق لان هذا القرار ماخذته من الحكومه من هيئه التامين حبيت انبهكم لان لو ربي كتب لكم حمل بتوئم واحتاجوا حضنات التامين ماراح يشمل وراح يكلفكم اقل شي 60 الف او اكثر على حسب الاطفال كم يجلسون في الحضانه لان الحضانه للواحد في اليوم الواحد خمس الاف و اثنين يعني في اليوم عشره الاف او اي مضاعفات ولاده او حمل ماراح يشملها التامين
عشان كذا خذو احتياطكم من الحين عالجو في مستشفى غير الي بتولدون فيه وتابعو الحمل في مستشفى ثاني ولا تجيبون اي طاري للمستشفى الثاني انكم حملتوا عن طريق تنشيط او انابيب لانهم بيكتبون في الملف واذا انكتب راحت عليكم
اخر شي ابي اوصيكم عليه يابنات الصدقه لها مفعول سحري باذن الله وتوكلوا على الله و ادعوا لان الله سبحانه ماينسى عباده