تنخطبين وتتفركش خطبتك كل شوي .. تعالي أقولك السبب من تجربتي الشخصية

أنا أنخطب من الثانوي ، وأرفض لأني أبي واحد ملتزم يعينني على ديني ، وجاءني ملتزم بس أهله مو كويسين والكل نصحني أبتعد عنه ، فاستخرت ورفضت ، ثم جاء بعده كم واحد ورفضتهم ، ثم خطبني واحد ملتزم بس رفضوا أهلي لأنه مومن جماعتنا مع أنه من نفس القبيلة بس فخذ ثاني ، وحمدت الله وماحزنت أبداا الحمدلله المهم خطبوني ثنين بوقت متقارب ، وقال أخوي الكبير لازم توافقين ع واحد منهم طبعا كلهم عيال عمومتي بس مو ملتزمين عاديين ووظيفتهم زينة رواتبهم فوق 9000 يقول من وين نجيب لك ملتزم !! المهم استخرت ووافقت على واحد منهم ، وأعطوا الرجال الموافقة ، إلا بنفس اليوم زعل علي واحد من أخواني الكبار يقول والله ماأعرفك ولا تعرفيني لو خذيتيه ، استخرت وشفت المشاكل كثرت أكثر اخواني مايبونه ، قلت اخواني ولا زوج ماأعرفه للحين ولاشافني -بحكم مافيه نظرة- المهم رفضته بعد ماوافقت عشان أكسب أخوي ، وبعدين خطبني واحد وسألنا عنه والكل مدحة ثم وافقت ، ثم زعل واحد من أخواني غير الي قبل ، طبعا ماوافقت إلا لما استخرت ، وزعل أخوي وقوم الدنيا وقعدها وهاوشني -طبعا من حبه لي بس العيالاسلوبهم ههه- قعدت أبكييي وأدعي ربي بالليل ان ربي يرزقني بالصالح الي يعينني عالخير ، واستخرت ورجعت ورفضته وقلت خلااااص مابي أحد اذا وافقت رفضتوا وإذا ماوافقت قلتوا عنستي إلى متى ترفضين .. وصرت أدعي كثير وحجيت بذيك السنة ودعييييت ربي يرزقني بالصالح ، المهم وكم شهر وخطبني واحد من عايلة ملتزمة وخلوووووقين جدا جدا بس الولد محلق لحيته بس فيه خير المهم استخرت ووافقت وتملكت وأعرست وحملت والحين توني بالحمل بس من جد زووجي زي العسسسسل كل هالمشاكل صارت عشان يرزقني ربي بهالإنسان المحترم الي الحمدلله مايكره أحد ولا يتكلم بأحد ، وواحد منهم الي كنت موافقة عليه تزوج من قريباتي والمسكينة الله يعظم أجرها تشكي منه ومن أخلاقه ، فعرفت انه خيرة يوم بعده ربي عني ... يعني اعرفوا حبيباتي إن ربي يبي لكم الخير لأن تقولين في الاستخرة "إن كنت تعلم أنه شر لي في ديني ومعاشي وعاقبة أمري عاجله وآجله فاصرفه عني واصرفني عنه واقدر لي الخير حيث كان ثم أرضني به " ماقلتي خلني أوافق عليه ، فلو وافقت وماتيسر يعني شر صرفه ربي عنك ، وأحسنوا الظن بالله يكن لكم فووق ظنكم سبحانه كريم رحيم بعباده ..
أختكم بنوته سعنونة دعواتكم ربي يتمم حملي ويصلح ولدي ويديم ودي لزوجي ووده لي