تنخطب ولا يصير نصيب على هذا الحال من 14 سنه تكفوووووووون ادعولها

السلام عليكم ورحمته الله وبركاته

ابدخل في المشكله على طول وتكفون ساعدوني

المشكله لوحده من قريباتي تزوجت قبل 14 سنه عن حب وماجلست مع زوجها الا 6 شهور وخلال هذي الفتره كل حياتها مشاكل بدون سبب
مع ان زوجها ملك عليها وهي في المتوسط ولاتزوجت الابعد ماتخرجت من الثانوي وكان يحبها ويموت فيها
المهم حملت منه وجالها ولد وبعدها طلقها زوجها بدون سبب واضح وهي نفاس وخلال هذا السنوات حاول زوجها يرجعها ولكن سبحان الله كل ماجاء يرجعها تصير مشكله ولا ترجع معه المهم جلست على هذا الحال 5 سنوات بعدها انخطبت من واحد يقرب لها من بعيد واجبروها اهلها على الزواج منه ووافقت على مضض بشرط ولدها يتربى معها
وكانت يوم الملكه تبكي وزعلانه مرررره وما كانها عروس

بعدها طليقها خطب وتزوج
وهي كانت مملكه ولكن الرجال اللي ملك عليها مرض ومات الله يرحمه ويغفر له يااااااااااااااارب

المهم بعدها صارت تنخطب ولما يجي العريس ويشوفها وتشوفه ويوافق العريس هي ترفض ليش ما تدري بس تحس بضيقه وارق ولاتقدر تاكل ولاتنام اليين ترفض العريس بعد ماترفضه ترتاح ولكنها تحس بالندم وتقول لنفسها انا ليش رفضته وليش ماوافقت وتزوجت مثلي مثل اي بنت

وبعدها تنخطب مره ثانيه ونفس الشئ يصير تتضايق وتتعب ويجيها مثل الرجفه في جسمها وترفض واذا رفضت تندم
اشد الندم وتتمنى تتزوج ويجيلها اولاد بس اذا جاء العريس ترفض غصبا عنها

والله يابنات انهاعلى ذا الحال من 14 سنه وماشاء الله تبارك الله دايما تنخطب بس مايتم ليش ما ادري

اخرها الاسبوع اللي فات خطبها واحد ماشاء الله تبارك الله الكل يمدح في اخلاقه ووظيفته

ولما شافها قال برد عليكم ان شاء الله قريب

انا قلت لها اسمعي الرقيه واقري سوره البقره وادعي في صلاه الليل واذا فيه خير ان شاء الله ربي ييسره لك
المهم هي كانت تقرا وتدعي بس تقول كنت اقول في نفسي انه ماراح يوافق واكيد بيعتذر مع انها تتمنى تتزوجه

واليوم رد علينا وقال انه موافق هي في البدايه قالت خلاص انا موافقه وفرحوا اهلها وامها واخواتها واخوانها وابوها

حتى ولدها انبسط ان امه بتتزوج بس تقول شوي واحس بضيقه ما اعرف وش سببها واحس ان بموت من التعب وتتصل على اخوها وتقولها انا ماني موافقه اخوها زعل وعصب ليش ترفضينه انتي وش تبغين ؟؟

المهم اخوها قالها فكري الين بكره وردي علينا ويابنات انا كلمتها وحاولت اقنعها هي مقتنعه بس تقول ما اقدر اتزوج
ما اقدر اوافق


تكفوووووووون يابنات ساعدوني
تتوقعون عنده مشكله نفسيه والا فيها عين والا ايش المشكله

اذا عندكم رقم مستشار اسري او رقم لاي شيخ ممكن يساعدني الله يوفقكم اعطوني

والله ما انساها من دعائي وبدعي لها في صلاه الليل بس ساعدوني واللي ماتعرف تدعيلها ان ربي ييسر امرها ويتمم زواجها على خير

وجزاكم الله الف خير

تكفون لاتقرؤن وتطنشون على الاقل ادعولها لو بقلوبكم تكفووووووون