السلام عليكم ورحمة الله وبركاته
كيفكم حبايبي ... يارب بخير
اليوم نويت على الخلاط وكاسته، لأن لها احتياجات كثيره " تعصر وتطحن وتخفق .... مو كأنها دعاية كينوود:27: "
وكمان أحسها مهضوم حقها في التنظيف عندي، يعني وين لوين لحتى أذكرها بالتنظيف
أول شي تسويينه جهزي مسجل وحطي محاضرة تبين تسمعينها وماصح لك تسمعيها لانشغالك، أنا عن نفسي عندي محاضرة للدكتور علي الشبيلي والحمد لله وأخيرا فضيت لها وسمعتها :27:
صدقيني بتستمتعي
قبل ماأبدأ بالشرح بأوريكم كأس الخلاط كيف كان قبل التنظيف وهو اللي اهتميت فيه أكثر لأن هو اللي ينحط فيه الأكل أما الخلاط فهو مجرد جهاز بس كان له نصيب من التنظيف
أنا خلاطي من نوع باناسونيك المربعه اللي معها عصارة الجزر
أول شي سويته حضرت العدة اللي ببدأ فيها شغلي
قمت بتفكيك الكأس قطعة قطعة طبعا لوعندك أحد قوي يفك لك الكأس عن قاعدته لأنها شوي قوية، وكمان الغطاء ينفك لقطعتين إذا هو زي نوعية حقي بس ماأنصح فيها هالطريقة كثير لأن كأن اللي عندي صارت ملخلخة من كثر ماأفكها
وهنا القاعدة للكأس
شايفين الوسخ كيف :09: ... بصراحه ماأذكر آخر مرة غسلتها متى
يع أنا نفسي قرفت منها
وبإمكانك تشيلي الجلده اللي فيها
قبل ماتشتغلي عيها حاولي تتخلصين من الوساخة بالماء الجاري
جيبي كروانه صغيره وحطي فيها ملعقة كبيرة من العملاق وفنجان قهوة دواء غسيل وكأسين ماء دافيء يميل للحرارة وحركي بملعقة وغطسي الكأس وأغراضه فيها وخليها تتنقع نص ساعه تقريبا، بس كل شوي لفيها على جهة يعني كأنك تقلبينها في الكروانه
يتبع ..
طبعا مالي غنى عن قطعة اسفنجه صغيره وعود الأسنان لأن خلاطي فيه زوايا كثيره ومتعبه وماأنسى حبيب التنظيف عندي
بعد كذا ابدئي بالسلك والسفنجه ( يفضل اسفنجه قديمه لأن الدواغسيل مع العملاق بيقطع لك أبو جدها )
وياليت تلبسي جونتيات لأن هالمنظفين قوية ع البشره
( هنا ماقدرت أصور لأني لبست الجونتيات ولاعاد قدرت أمسك الكام أصور )
عشان تتأكدي من إنه نظف ولا لا، خرجي القطعه اللي تبين تشوفينها وغسليها بماء الحنفية وشوفي الأماكن اللي لسا مانظفت ورجعيها للكروانه وادعكي
بالذات القاعدة نظفيها من فوق ومن تحت
والأماكن الضيقه نظفيها بأعواد الأسنان
والكأس اغسلي اليد اللي تشيلينه فيه وخطوط الليترات المهم نظفيه مضبوط من جوا ومن برا بالسفنجه والسلك حتى الغطاء
اتركيها بعد ماتخلصي تنظيف تتنقع كمان شوي في الكروانه يعني تقريبا دقيقتين وبعدين اغسليهم بصابون الغسيل اللي عندك واشطفيهم وجففيفيهم وأعيدي تركيبهم بشرط إن الكأس مع القاعده تثبت جيدا وبقوه مهم جدا حتى لاتسرب شيئاً أثناء الإستعمال
شوفي كيف النظافه
وانبسطي بخلاط نظيف
الماي الباقي بإمكانك تشطفي فيه الحمام -أعزكم الله - وبإمكانك تصبي منه شوي وتنظفي فيه رخامة دولاب المطبخ
أو تنقعي في شي ثاني يبغاله تنظيف
أنا حطيت فيه فواكه بلاستيك عندي في المطبخ
اللي عجبها الموضوع ياليت تدعي لأمي بالشفاء و أن يرزقني برها مو شرط تكتبيها قوليها ولوشفويا، والملائكة تقول ولك مثلها.