تنظيف حوض السمك

تيتة

عندنا حوض سمك صغير نسبيا ،،، وعندما يحين
الوقت لتنظيفه ( تقريبا كل شهر ) فإن زوجي يجلب عامل
مختص ببيع أسماك الزينة .. وهو الذي يتكفل بتنظيفه بمساعدة
شخص آخر ..
يقومون بتفريغ الماء دون تحريك الحوض ، ويخرج كل ما بداخل الحوض
من مزروعات ، تحف ، حصيات ...الخ ثم يبدأ بغسله ( أعتقد بقليل من الصابون )
لكن لست متأكدة ... ويشطف بالماء ، ثم يرجع الحصيات التي
في القاع أولا ومن ثم يملئه ماء مفلتر ويعيد كل محتوياته من جديد
ولا يضع السمك إلا بعد مرور 24 ساعة من عملية التنظيف ..

وإذا عرفت تفاصيل أكثر ، لن أتردد بها أبدا
والله يوفقك .

مشكورة ماقصرتي
بحاول اقوم بالتنظيف بمساعدة اختي
مشكووورة

السلام عليكم
اشلونكم يا حلوين
حوض السمك يالغالية يتنظف بدون صابون
اذا بتنظفينه كلش كلش بماي وملح بس والصابون ممنوع
<<<<< خبرة في تربية الاسماك :26:
واي شي تبين ترا حاظرين خيتووووووووووو :27:

بقولكم عن طريقتي السهلة في تنظيف حوض السمك عن خبره الصراحة بعد ما طلعت روحي لين وصلت لذي الطريقة..واللي فكتني من إني أجيب عامل ينظف لي وادفع فلوس

وطريقتي تعتمد على :

أولا: على شان ما يتوسخ الماي لا تحطين للسمك أكل وايد بس مقدار نص ملعقة صغيرة ومرة في اليوم بس لأن هذا يقلل من عدد مرات التنظيف ( لا تخافين السمك ما بيموت من الجوع..لأني سألت بايع سمك الزينة وقالي عن هالطريقة وقالي حتى لو تركتيهن 3 أيام ما يموت السمك وهالشي جربته بنفسي كنت أروح بيت أهلي باليومين والثلاث ومحد يأكل السمكويوم ارجع أأكلهم)

ثانياً : في نوع من السمك انصحكم به أسمه (جانيتور) لونه أسود وأحجامه مختلفه بس كل ما كان أكبر أحسن...هذي السمكة سبحان الله عجيبة شغلتها بس التنظيف وأكل الفضلات...طول الوقت تنظف وتساعد الماي إنه يكون نظيف

ثالثاً: لازم يكون موقع الحوض جنب الباب أو الشباك لتسهيل عملية التنظيف واختصار الوقت والجهد.

رابعاً: نوع الفلتر لأنه يساعد كثير في النتظيف.... الفلتر اللي عندي له أنبوب (هوز) يسحب الماي لفوق ويصبه على اسفنجه ومنها ينزل الماي النظيف مرة ثانية للحوض بطريقة دائرية يعني فلتر خارجي مش داخل الماي ... بس جهاز شفط الماي هو اللي يكون داخل الماي

خامساً: خففي من زينه الحوض أقصد الحصا والأحجار والنباتات الزينة لأن الأوساخ تعلق فيها

وألحين نجي لطريقة التنظيف:

هاتي هوز (خرطوم ماء) اللي نستخدمه لسقي الزراعة (ممكن تيبين واحد تخصصينه لهذي الشغله) وركبي بدايته في إنبوب الفلتر اللي يسحب الماي ونهايته طلعيها من الباب أو الشباك ...بحيث إن الفلتر يسحب الماي ويصبه في الهوز اللي ركبتيه ومنه لزراعة ...وفي نفس الوقت هاتي اسفنجه نظيفة ( بدون صابون) وامسحي ونظفي الحوض على شان الأوساخ اللي عالقة على جدار الحوض تطلع مع الماي...

(اتمنى تكونون فاهمين علي لحد ألحين)

المهم ...السمك لا تتطلعينهم من الماي خليهم فيه....خلي الماي يقل مستواه بتلاحظين إن السمك ينزل لقاع الحوض مع الماي ...لما يوصل مستوى الماي لحد السمك ..وقفي الفلتر وشيلي الهوز..وطلعي التحف والزينة وغسليهم لوحدهم وبعدين رديهم في الحوض

وعشان تملين الحوض بالماي ...في طريقتين الأولي شوي متعبه واللي هي إنك تجيبين سطل وتملينه ماي وتصبينه في الحوض لحد ما ينملي...

أما الطريقة الثانية ( وهذي طريقتي) مريحة جداً....

جيبي الخرطوم (الهوز) اللي استخدمتيه في سحب الماي وركبية في صنبور الماي اللي في المطبخ أو في (تكرمون)الحمام... وطرفة الثاني في الحوض واملي الحوض بكل سهوله...وإذا ما ركب الهوز في صنبور الماي...جيبي هوز الزراعة ودخليه من الباب أو الشباك وحطيه في الحوض وبعدين شغلي الماي لحد ما يمتلي الحوض...وبعدين وقفي الماي وطلعي الهوز

وآخر شي ضيفي المعقم الخاص بأحواض أسماك الزينة ...


وسلمتووووووووووووو هذي طريقتي اللي استخدمها واللي خلتني أحب سمك الزينة من عقب ما كرهتهم بسبب مشكلة التنظيف...وألحين أنظفهم مرة في الشهر أو الشهرين

أتمنى إني أفدتكم وأي سؤال أنا تحت أمركم إن شاء الله

بس عندي طلب لكل من تستفيد من طريقتي هذي إنها تدعي رب العالمين إن يكتب لي الخير ويبدل حالي لأحسن حال ويعوضني في مصيبتي ويهدي أبو عيالي ويصلحه...

مشكووورة وااايد
ما قصرتي
واللله يهدي ابو عيالج
ويا ربي يبدل حالج وحال الجميع الى احسن خير
وبدعيلج يوم بنظف الحوض
والسموووحة