تنظيم حفل عشاء

مرحبا أخواتي

حبيت أضيف لكم موضوع يمكن ما في حد ذكره من قبل ويمكن انذكر فاستحملوني شوي ( توني يديده :23: )

الموضوع الله يسلمكم هو

كيفية تنظيم عشاء <<== و إذا حابة ممكن يكون غدا :42:




أولاً : التحديد :

*لازم تحددين كم شخص راح يحضرون علشان ما تتعبين نفسج بالطباخ والترتيب وآخرتها ما يجونج إلا عدد قليل ويضيع تعبج خسارة وأحسن طريقة هي انج تحددين من بتعزمين
*بعدها تطرشين لهم بطاقات دعوة للحفلة تكون بسيطة ومب شرط غالية اهم شي تكون مرتبة والكلام فيها واضح
*لازم تكونين محددة في البطاقة سبب الدعوة مكان اقامة العشاء واليوم والوقت من متى لين متى وتحديد وقت العشا مهم علشان تعرفين متى تجهزين الاكل
*لازم تكونين حاطة رقم تلفون للي يبون يعتذرون عن العشا وملاحظة انه اللي يبي يعتذر لازم يتصل قبلها بيوم على الاقل علشان ما تعملين حسابهم للعشا

ثانياً : الاختيار :

*لازم تعرفين ايش هو المنيو اللي راح تقدمينه ، يعني مب تيين وتقولين باسوي كذا وكذا وكذا وفي الأخير ما تكونين سويتي شي يستاهل
*بعد تحديد انت ايش تبين تسوين لازم تحددين كمية الطعام على حسب عدد الاشخاص اللي بيحضرون
*بعد تحديد الكميات بتحددين المكونات لكل طبق وبجذي تختصرين وترتبين وقتج في الاعداد والتحضير

المنيو يتكون من :
- المقبلات .. شي خفيف ويكون من الموالح وعادة تكون اكلات بسيطة وأحجامها صغيرةBite size ممكن تكون باردة او ساخنة وممكن تستبدل بالشوربه



-السلطة .. وهني تقدرين تختارين على ذوقج سلطة تناسب العشا اللي بتسوينه




-الوجبة الرئيسية .. وتكون عادة وجبة دسمة وغنية وممكن تكون وجبتين بس بشرط انه الوجبة الثانية تكون مكملة للوجبة الأولى وممكن تجمعين الوجبتين معاً على نفس الصحن




-الحلو .. لازم ما يكون ثقيل ويكون بارد أفضل



* طبعاً لابد من وجود مشروبين على الطاولة أولاً .. الماء .. ثانياً ... أي نوع من أنواع العصاير اللي تحسينها تتماشى مع الوجبة
*ممكن تقديم القهوة أو الشاي بعد العشاء


واذا عجبكم هالموضوع ممكن اكتب لكم موضوع تابع له عن ترتيب الطاولة للعشا وكيفية التقديم

بس لازم تشجعوني علشان اكتبه .... خبركم توني يديده وابي تشجيع:27: