توأم وجامعه وحامل فالثامن وام زوجي هلكتني بضيوفها

اتمنى تفيدوني راح اشرح لكم الوضع عشان تكونون فالصوره

عندي توأم عمرهم سنه و7 شهور وحامل في الثامن وام زوجي لها 6شهور عندي مريضه جدا الله يشفيها كبيره فالستينات يادوب تقدر تاكل ويادوب تمشي للحمام وعيالها اثنين يدرسون في مدينه قريبه وكل ويك اند يجون عندي فالمجلس ينامون

فالبدايه على اساس تجلس عندي شهرين لاني حامل وماعندي شغاله وعندي جامعه وتوأم بس انبسطت عندي وقالت بجلس على طول والله على قلبي زي العسل ولو ان حركاتها احيان تزعل وتضاايق بس كبيره فالسن ما اقدر الومها ولا اعاتبها ولا اشره عليها

مابشكي انها تتضايق من عيالي وصراخهم مع انهم لسا رضع
ولابشكي انها تترك ادويتها مفتوحه ويجون يبلعون منها وانا ابلش فيهم مدري اي واحد اللي بلع واظطر ادخل اصبعي فالاثنين عشان يستفرغون
ولابشكي انها تنام وكريماتها جنبها ويجوني عيالي مدهنين روسهم وملابسهم وريحتهم زفت واظطر اروشهم والبسهم وينقص ظهري

ولاني اصلا طول اليوم فالمطبخ يا اطبخ الغدا يا انظف حويس الغدا يا اجهز العشا
ماذري عنهم لاني حاطه باب اطفال فالمطبخ عشان لايذخلون عند السكاكين والغاز
ولابشكي من تلاجة القهوه اللي تشرب وتتركها مفتوحه ويجون العيال يكبونها ويتحرقون منها

ان رفعت الادويه قالت خليها جنبي قريبه مع انها والله لو تقول ا بس ا اكون عندها
وان قلت لها يمه بسكر الباب لين تخلصين قهوه لايتحرقون العيال تطفش مسكينه لانها اصلا طوووووووول اليوم تتقهوا

ولابشكي انها فجأه وصت واحد من عيالها الي يدرس في مدينه قريبه يشتري لها حبل عشان تربط عيالي فالباب على قولتها يتأدبون ..رحمتها لانها عاشت في قريه وكانت تسوي هالشي مع عيالها تتوقع كذا يتربون الاطفال

ولابشكي اني يوميا اصحى واطلع العيال من اسرتهم واغير لهم حفايظهم واصلي وقبل لا افطر ولا افطرهم اكشن وحط الاكل في قدر الظغط عشان يستوي وما اتأخر عليها وافطرهم ساعه لين يرضون ياكلون واغسلهم يكون منهد حيلي من الحمل يادوب ارتاح عالكنب الا خلص الغدا واقوم اكمله
غير قهوة المغرب
وعشا الليل
عشا مرقروق قرصان اشياء دسمه طبخ ونفخ ابدا ماتاكل خفايف والمطبخ اقسم بالله ماينظف ابدا لان طول الوقت طبخ ويتكركب
غير طبخ التوأم

ولا بشكي اني اجلس ساعه ونص بس انظف المطبخ ولما اتعب اجي ابجلس فالصاله يجون العيال فوقي والا يبكون جيعانين والا موصخين هذا وانا فالثامن

هذا كوووووووله ماني ملزومه فيه شرعا بش اسويه واقسم بالله عادي عندي اشفق عليها واحزن واخدمها بكل طيبة خاطر اقسم بالله
انا ما اشكي من هالشي انا اقول لكم عشان تعرفون كيف يمر يومي وتحكمون

اللي بشكي منه ومااااني طايقته وفعلا تجننت وماعاد اتحمله

ضيوفها !!!
يكلمون اخر الليل يقولون بكرا بنجي طبعا حتى مايمديني اتفق مع شغاله بالساعه تجي كل اللي اعرفهم يقولون قولي قبلها بيوم يومين ولاوحده رضيت تنام عندي حتى

يجون من المغرب لاخر الليل
وتجبرني اطبخ هذا اللي فعلا يضايق لاني حااامل تعب ورفس وارهاق قهوه حريم وقهوه رجال شاهي حريم وشاهي رجال وقدر ايش كبره عالنار وعيالي يبكون جيعانين والا موصخين والحريم محد يقوم يساعد وهي تصيح علي هاتي ادويتي قرف قرف مو طبيعي

هذا غير اقسم بالله اكون بالعبايه خلاص بطلع مع زوجي امشي العيال مساكين يدقون حريم يقولون ترانا فالطريق وين ساكنين وصفو لنا
اظطر افصخ واسوي قهوه وشاهي وانا خدودي تحرقني من البكا

يدقون عليها انا اصلا محد يكلمني احسني جاريه والله حتى من اهلها وهي ماااااااترد احد ابدا كل من قال بجي تقول حياك تدري اني فالثامن وتدري بخبال وشقاوة عيالي بش تقول عيب محد يرد الضيوف

اقسم بالله ذاك اليوم وانا فالاختبار وزوجي مع العيال طلعت قلت له نفسي في ماك مليت من اكل البيت قال بكرا اوديك بس اليوم بيجون عماني يتعشون عندنا قالها ووجهه اسووووود

رايحه سهرانه مانمت وعيالي ريحتهم زيوت وكريمات من حقاتها مافضيت اروشهم كنت اذاكر
طول الطريق جلست ابكي
قال خلاص هانت 4شهور وتجي الخدامه اللي مقدمين عليها
قلت له انت نضف البيت انا يادوب فيني حيل للقهوه والشاهي والعشا جيبوه من برا والا طز فيهم
حتى هو مستاء طول الاسبوع يشتغل لين 6 ويرجع يادوب يقوم بامه او ضيوفها او يكمل شغله فالبيت ولما يجي الويك اند وده يطلع او يطلع الصغار او يطلعني اتمشا لان يكون نقطه وانفجر فيه او حتى نقضي للبيت ويروح الويك اند نستقبل ونودع


الحين صرت نص الثامن ومرضو عيالي اليومين اللي فات زوجي جلس يجيب الاكل من برا لاني ماااااا انام واحد يستفرغ والثاني نايم يقوم وينام الثاني واجلس انا اغسل استفراغهم ضهري انقص تعبت تعبت توقعت بنتها تتكلم تقول بجي اخذ امي يومين بس ماااااااش محد رحمني وزوجي يجي من الشغل احذف عليه العيال ويادوب انام ساعه ونص يجي يصحيني مايعرف للاثنين مايقدر عليهم يقول فلان مارضي يبلع الدوا
قلت بروح لاهلي نص التاسع مدينتهم قريبه بس بقي ثلاث اسابيع تقريبا مظطره اجلس هنا عشان اختباراتي النهائيه
بس انا ماعاد اقدر طفح الكيل لو ماعندي جامعه كان من السابع عندهم بس رابطتني الجامعه
مره ماعاد اتحمل بطني يوجعني وبجد اخاف اولد او يموت اللي في بطني لاني ما انام ما ارتاح ولا يجيني نفس اكل
وعيالي طووووول الوقت على كراميش اهملتهم حتى ماما مايعرفون يقولون وصارو وصخين يكبون الرضاعات ويفصخون البامبرز وانا مااااادري

ياناس ماني قادره اربيهم


خلاص طفح الكيل اليوم على اساس اطلع اشتري لي بجايم اوسع وربي دق رجال قال بجيكم ورب الكعبه ما اكذب والله اني اقول لكم الصدق في كل شي

طرطعت خلاص ملابسي ضاقت وزوجي مايعرف يشتري

وتعبت من الثقل والحموضه وعيالي الي تكفخهم يجوني يبكون ويروووح اليوم فالمطبخ او احفظ او اكنس او اغسل

اهلي لما اقول لهم يقولون اجلي الترم وتعالينا ويصبروني بس صعب بعد هالصبر احذف الترم
وبنتها تقول لما تروحين لاهلك بجي اخذها ولما ترجعين بيتك بنرجعها عندك سكتت انكتمت مانطقت كلمه ماعرفت ايش اقول اذبحها هذي؟
وباقي اخوانها واخوان زوجي حريمهم بشغالات بس امه تقول مرتاحه عندي

انا ماني مرتاحه

انا غبيه؟ انا ساذجه؟ اللي اسويه طبيعي والا هباله؟ وكيف اتصرف؟


الحين هالشهر لين نص التاسع اقول لها تعالي خذي امك خلاص ثقلت وعيالي متعبين؟
وبعد ما اولد كيف اقول لهم انو تعب علي ومابتحمل ؟

ودي كلام باسلوب مايزعلها ماودي بعد هالتعب اخربها بكلمتين

اقسم بالله اني هلكانه اشوف مدونتي وانستقرامي اقول يوووووووه وين النعومه والعطورات واللون الصافي والبشره الحلوه والبس والكشخه

علموني ياناس اتقبل كل ردودكم
انا مرررره ماعادني انا