تواقيع

!!! تواقيع !!!
نستأذنكم .. فأعذورا قصر قامتها ..
وش باقي ٍ منا على روس الأطـلال
ياغير كلمات .. وقصيد .. وتواقيع ؟؟
دام العمر لو طالـت سنينـه وطـال
أيام .. وشهور .. وليالي .. وأسابيع
والوقت مثل الما على قول من قـال
من يمسكه لو ضم كل الأصابيع ؟؟*
والقعده اللي غـادرت جـو الأطفـال
في عمرها واحد وعشريـن توقيـع
شابت من حروف القصايد والأمثـال
جناتها حـرف .. وقصيـده مرابيـع
تشوف في وقته من النـاس أشكـال
يبقى بعضهـم والبقيـه ( فقاقيـع )
ولا له بدربك يالهوى مقعـد ظـلال
وتشوم عن خطو الحكي والمواضيـع
وشلون أجل يمه وأنـا بنـت رجّـال
والطبـع ماتغلـب عليـه التطابيـع
قلبي وطـن مايسكنـه كـل رحـال
وعرقي عطِش لو هو بجال الينابيـع
واللي ترك قلبي مـن الهـم أطـلال
ماهو مثـل كـل الألـم والمواجيـع
أترك عقـب عينـي للأيـام تمثـال
تمـره أنسـام الهـوا والذعـاذيـع
والا أروح وكـل ذكــراي تـنـزال
ويحدر اسمي مـع دمـوع التواديـع
لكن لعل الوقت لامـال .. مـا مـال
ميـلٍ يخلـي هالمبـادي مصاريـع
ولعلها لاصارت " أطلال " .. أطلال..
يبقى لها في دفتر النـاس توقيـع !!


.
.
* المقصود قول الشاعر العربي ..
ومن يأمن الدنيا يكن مثل قابضٍ ..... على الماء خانته فروج الأصابعِ !!
.
.ملاحظة .
القراءاة من اليمين الى اليسار للقصيدة .. ومن ثم الانتقال الى السطر الاخر ..
ودمتم ..
0
0
0
مستحيله بالحيل