مكونات الكيك الاسفنجي
6 بيضات كبار
فانيليا
كوب سكر
2 كوب دقيق
2 ملعقة صغيرة بيكنج بودر
وطبعا الكيك الاسفنجي مفيهوش حليب او اي مادة دهنية زي زيت او سمنة
مكونات كريمة الزبدة للحشو:
4 كوب سكر بودرة
2 كوب زبدة طرية
نصف كوب حليب
وللتزيين:
شوكولاته بيضاء سايحة عشان نعمل منها اشكال مربعة
مالتيزرز ابيض
مالتيزرز دارك
كريم شانتي للكتابة
او حسب رغبتكم
الطريقة:
هنعمل الكيك الاسفنجي قبل التزيين بيوم
في اناء هنحط البيض والفانيليا
ونضربهم بمضرب البيض لمدة لاتقل عن دقيقتين متواصل
وفيه ناس هتقول ان كمية البيض دى قليلة بس انا شايفاها مناسبة والموضوع مش بالكمية اهم حاجة مدة الخفق ده اللى بيفرق فى النتيجة
وهيعملوا رغاوى بعد الخفق
ونحط عليهم كل كمية السكر
ونضربهم على اقصى سرعة لمدة لاتقل عن 10 دقايق متواصل
لغاية مايبقى لونه فاتح ويتكاثف ويبقى كريمى ويعمل علامة زى الشريط او رقم 8 لما نشيل من عليه المضرب
وهننخل الدقيق والبيكنج بودر ونحطهم على الخليط
وهنضربهم بمضرب البيض لغاية ماتمتزج المكونات
وحطيت الخليط في صينية من صواني السويسرول مقاس 28 وممكن اكبر او اصغر
وخبزتها فى فرن منخفض الحرارة وطبعا كل شخص فرنه بيختلف عن التانى واختبرت سواها وطلعتها
وقلبتها على ورق خبز
وهنعمل كل اللي فات مرتين كمان بنفس المكونات عشان يبقى عندنا 3 كيكات
وممكن نعمل كيكة واحدة ونقسمها لتلاته يعني هنضرب المكونات دي في تلاته يبقوا 15 بيضة و6 طوب دقيق و3 كوب سكر بودره وتبقى كيكة سميكة ونقسمها لتلاته بس اسهل واضمن اننا نعمل تلات كيكات ودي من اسهل الطرق للكيك الاسفنجي
هحط الكيك في التلاجة او مكان بارد ترتاح وتاني يوم هحضر كريمة الزبدة للحشو
في اناء هحط السكر بودرة والزبدة
ونضربهم متواصل لغاية مايمتزجوا ولون الخليط يبقى فاتح وهنضيفلهم الحليب وخطوة الحليب دي من عندي فممكن تستغنوا عنها
ونضربهم مرة تانيه وهتبقى عندنا كريمة زبدة لونها فاتح وسوفت جدا
وهنبدأ نحشي بيها الكيك
تابعوني
هكمل المشاركة الجاية
وهنسيحها على حمام ميه
ونفردها على ورق خبز
ونسيبها تنشف خالص ولو مستعجلين ممكن تحطوها في التلاجه ونبدأ نقطعها بفورمة المربع اللي عندنا بعد مانسخنها عشان ترضى تتقطع
وهنحط الشوكولاته دي في الجناب وفي النص هكتب وحوالين الكتابة هحط المالتيزرز وطبعا التزيين ده حسب الرغبة وده شكلها النهائي
وبالهنا والشفا