توست بالدجاج والصلصه البيضا.. بالفرن

السلام عليكم

هذا الطبق لذيذ وسهل وشكله ذرب وحلو اذا بتقدمينه لضيوفج على العشا احسن من معكرونه دجاج بالبشمل اللي تاخذ وقت وتكون ثقيله على المعده ومو دايما تضبط

المقادير:

- توست مقطع الاطراف
- دجاجه مسلوقه (بالبصل والبهارات الخفيفه وملح قليل جدا )ومنزوعة الجلد ومفتته وممكن نص دجاجه اذا طبق البايركس صغير
- بصله صغيره مفرومه ناعم
- حبة ماجي او ملح
- فلفل اسود وشوية بهارات او كاري
- زيت ذره قليل ( انا بس احط زيت على قد البصل وبس لان الصلصه فيها دسومه شوي )
- مايونيز

مقادير الصلصه:

- 2 قشطة كي دي دي الكويتيه او اي قشطه نفسها
- 3 ملاعق كبيره مايونيز ولازم يكون نوعيه لذيذه وانا افضل مايونيز كرفت الذ مايوينز مع العلم اني استخدم مايونيز علبته كبيره حيل خاص للمطاعم عندي من رمضان وماشالله ولاتأثر
- 1 قلاص جبن سائل وانا احب جبن امريكانا وانتو بكيفكم

نخلط كل المقادير في الخلاط

الطريقة :

1- في قدر نحط شوية زيت ذره ونحمس البصل وحبة الماجي ونضيف الدجاج المفتت والفلفل الاسود والبهارات ونرش عليها شوية من ماي الدجاج عشان مايحترق ويلصق بالقدر لين يحمس وتطلع ريحته نطفيه ونخليه على جنب

2- في قالب بايركس كبير نصف طبقة من التوست المقطع الاطراف ومانترك فراغات

3- ندهن التوست بطبقه خفيفه من المايونيز

4- نحط الدجاج

5- طبقة توست ونضغطها بالايد عدل

6- نصب الصلصه على الوجه ونخليها ربع ساعه عشان تتشرب او كيفج ماتخلينها بس الافضل تتشرب

7- نحطها في فرن بالرف الاسفل ونشب النار من فوق لين تتحمر

8- ناكلها بارده او حاره

على فكره توني متعشيه منها قلت لازم اذوقكم الطبخه السهله واللذيذه

بالعافيه :cook: