توصلهم ريحة فطورنا

مساء الخير
فيه عمال قدام بيتنا بالضبط يبنون بيت وجالسين في صندقه حديد ( مدري وش تسمونها بس اللي يسوونها للحارس )
توني اشوفهم اليوم اول ماكنت ادري انهم موجودين فتحت الباب لطلبيه جتني وشفتهم جالسين برا جنب المكان حقهم
وعطيناهم من فطورنا شوي من اللي كان جاهز وقتها ع ٦ وربع كذا ارسلتهم مع اخوي ومره انبسطوا ع كلام اخوي
جلست افكر فيهم طول الوقت وش ياكلون ؟؟! كيف يفطرون ؟!! اتذكر ايام الشتاء كنت اشوف زي الحريق افتح الباب احصلهم شابين نار يتدفون فيها كنت مره ارحمهم


اللي تعرف جيرانها مسافرين وسواقهم ماسافر معهم تتذكره بكم لقمه فطور او سحور وتعلم الجيران انه موجود وساكن وحده ويمكن ماعنده غاز ولا ثلاجه وكان معتمد ع اكل البيت او مع اصحابه ولا يقدر يطلع
جارتنا سافروا اول ماصار اجازه للموظفين سافرت لزوجها هي وعيالها لانه موظف في مدينه ثانيه وهي استغلت الاجازه وراحت ع اساس شوي فتره ويرجعون كلهم دام مافيه دوامات
وبعدين تورطوا ماقدروا يرجعون وعاملتها في البيت وحدها ماخذتها وصت جيرانها اللي تحتها يعطونها فطور ومتى مايحتاجونها تنزل عندهم وتقول الحمدلله تطمنت لان البيت مافيه الا اغراض حقت اسبوعين ثلاث ع اساس بنرجع
هذي تعرفت ع الجيران قبل بس لو انها ماتعرف احد ولا لها اقارب في نفس المدينه كان ماتت العامله جوع ولا قدرت تنزل تطلب اكيد تخاف مع هذي الاوضاع


ياليت يابنات تنتبهون لهذي النقطه اذا حواليكم عمال كذا وتوصلهم ريحة الطبخ من البيوت اللي جنبهم وقدامهم ترسلون لهم شوي في صحون وملاعق بلاستيك ولكم الاجر باذن الله