بداية الموضوع قبل كل حاجة رجاء رجاء ثم رجاء
لاتجيني أي وحدة تقول : " عادي طبيعي مافيه شيء أو تقلل من حجم مشكلتي اللي بطرحها ".
أنا بحد ذاتي متشتتة ومحتاجة يد تشدني للصواب بعد الله .
أنا كتبت كثير إني ودي أتزوج وهكذا وخاصة إن تحتي ثلاثة من خواتي بعمر الزواج وكلنا تحت بعض
يعني العمر لما يمشي ويتقدم علي أنا نفس الكلام يتقدم على خواتي والضرر يلحقنا كلنا ؛ لأننا ثلاثة وأنا الرابعة وكلنا بعمر الزواج يعني لو تزوجت أنا الباقيات تحت بعض والحمدلله احنا ماعندنا نظام ماتتزوج وحدة قبل وحدة لكن اللي يتصلون يخطبون يخطبوني بحكم إني ماتزوجت
أنا زمان لما كنت صغيرة عمري 23 خطبني واحد وشافني واستخرت الله وما أرتحت أبد وصارت خرابيط بالخطبة وتفركشت والحمدلله إن الخرابيط من عنده ؛ لأن أهلي يحطون اللوم ع البنت ويدققون بكل التفاصيل وإلا هو كان عاجب أمي وإبوي بس خربط وقال البنت شعرها ناعم جدا وبيضاء جدا ومصبغة شعرها ليش تلعب فيه وهي صغيرة وتوها وبعدين سوا مشكلة واتصلت أمه على أمي ولما رفضوه أهلي واتصل ع إبوي وقال ماقلت هالكلام ولا رفضت بنتك هي رفضتني ؛ لأنها ماتبي الستر ولا اللبس الساتر => معلومة ما أدري من وين جابها وهذا وهو ما أخذني قال هالكلام عني لذلك كانت رحمة الله فيني .
الخطبة الثانية نفس الشيء جاء وشافني ولما راح اتصلت أمه وخربطت ع رأس أمي وهو نفس الشيء ماشفتها رجعوني أو بيزوجوني وأنا ماشفتها بكيفهم وبعدين رجع قال لاشفتها ماقلت أنا ماشفتها يعني كل واحد يطلع قول وهم يقربون لنا وماعجبني هو أبد ولا أهله وسكت ؛ لأن زي ماقلت لكم أعرف أهلي وكيف تفكيرهم ورحمني ربي بإبوي إنه ماعجبه بعدين وخاصة لما جاء يشوفني يقول غير مبالي ولايحترم أبد .
الثالث جو أهله قبل ست شهور وخطبوني وقالوا موافقين وأخذت رقم إبوي يكلمه الولد ويقابله
ولاجاء ولاكلمه ولاشيء ومرت أيام طويلة وكلمت أمي صديقة لها تسألها عنهم يمكن تعرفهم وطلعوا
صديقات لبعض هي وأم الولد وكلمتها ورجعت أم الولد وكلمت أمي وقالت أعتذر لك والله من كل قلبي
لكن الولد لما كلمناه بالموضوع قال :" أنا ماقلت لكم اخطبوا لي قلت لكم تلفتوا وبروح برى أدرس لما أرجع بعد سنوات يصير خير " .
وهو موصغير عمره 32 يعني لما يرجع يمكن عمره يكون 35 أو 36
وتقفل هالموضوع وانتهى ومرت الأيام ورجعت قبل فترة اتصلت ع أمي قالت ما أدري البنت انخطبت أو لا ؟
قالت أمي لا قالت أجل برسل الولد ؛ لأنه ماتيسرت له الدراسة برى لما راح حاول ولاقدر والحين رجع ومتى تبغونه يجي وجاء وقابله أبوي وأعجب فيه حيل وسأل عنه وأثنوا عليه بكل مكان حتى بالمسجد وقال صاحب المسجد إن إبوهم كان يضربهم قدامنا بالعقال للمسجد وكلهم رجال
وجاء وشافني وأنا مستخيرة الله وعاجبني ولما شافني قال لإبوي بستخير ولما ارتاح بترد الوالدة عليكم
وردت هي من بعد بكرى فرحانة وأنا فرحت وحمدلله وشكرته وخلاص على أساس يجي إبوه يخطب رسمي ونسوي التحاليل
بعدين اتصلت بعد يومين الأم وقالت لأمي والله ما أدري وش أقولك بصراحة وما أدري كيف ابدأ لك
وتعذرت كثير بدون أسباب وقالت أمي ليه ؟؟ أمي توقعت بتقول مانبي زواج كبير أو بنأخر الزواج أو أو أو الخ
قالت والله إني أدعي لبنتك بهالرمضان وبالتراويح إن الله يعوضها ويرزقها ووووالخ أمي فهمت هنا إن ولدها غير رأيه بالموضوع وقالت أمي مالها داعي أسـألها وليه وليه وليه وخوف تقول وش هذولا اللي طايحين علينا قالت لها خيرة يابنت الحلال والله يعوضكم ويعوضنا ويرزقكم ويرزقنا والحمدلله هذي حال الدنيا
وسكرت ولما سكرت كلهم خايفين من ردة فعلي ولما صحيت أمي حالتها حالة وإختي أسألها ماترد
لما قالت لي أمي انجرحت بداخلي حيل حيل ؛ لأني حتى والله ما أدري وش السبب بدون سبب يرفض وحسينا كلنا إنه ماهو مهتم أصلا وبنفس الوقت ماهو ناوي ع الزواج من كلمته الأولى لأمه تلفتوا لي مجرد تلفت علم إن إخوه اللي أصغر منه تزوج وهو لا يعني حسينا إنه ماهو معزم مجرد يسكت أهله ويقول إيه ميخالف وهو مايبي
واللي قهرني إنه جاء وشافني ليه طيب ؟ حرام يخسر الناس فلوس وضيافة وتقديم وشغل ويأخذ من وقتهم ويشوف بنتهم وهو ماهو جاد ؟
أنا أقول هذا إن كان هالكلام صحيح وبصراحة إن كان صحيح فحرام عليه وجيه بنات الناس ماهي لعبة !!.
الموضوع وانتهى وأنا حمدت الله وشكرته إن هذي نتيجة استخارتي
والحمدلله على كل حال لكن يابنات سؤالي اللي طرحت الموضوع عشانه
أنا من سنوات طويلة وأنا انخطبت وتتفركش مايتم شيء أبد وش تتوقعون السبب لاتقولون عين أبدًا ما أعتقد عين نهائيًا .
علموني يابنات نوروني ساعدوني وش تتوقعون سبب تأخيري هالقد بالزواج وأرجوكم لاتسألوني عن عمري إطلاقًا .
والله آخر خطبة فرحت فيها فرحة عظيمة ولكن الحمدلله على كل حال وكل شوي أقول اللهم آجرني في مصيبتي وأخلف لي خيرا منها وأدعي ربي ولن ايأس أبدًا .
ولن أحزن ؛ لأن الله معي لكن أبي أحد يساعدني بالسبب ؟
لا إله إلا أنتَ سبحانك إني كنت من الظالمين
اللهم لكَ الحمد على جميع نعمك
استغفر الله العظيم وأتُوْبُ إليهِ
اللهم إنكَ عفُو كريمٌ تحب العفوا فإعفُ عنا
سبحان الله وبحمده سبحان الله العظيم
لا إله إلا الله محمد رسول الله
يارب استرني فوق الأرض وتحت الأرض ويوم العرض
اللهم اغفر لنا ذنوبنا وتُب علينا وارحمنا إنكَ أنتَ التوابُ الرحيم
اللهم صل وسلم على نبينا محمد
البنات بحول الله يساعدونك