توقف الخطبة او انسحاب الخاطب بعد الشوفه

السلام عليكم ورحمة الله وبركاته
اول موضوع لي وياليت تتفاعلون معي :)
اكيد ان كل بنت بعد الشوفه اذا كانت مقتنعه من الخاطب يضيق صدرها من انسحابه خاصه ان معظم الرجال مايبدون اسباب ويحفظون اسرار الناس
بعكس الحريم احيانا لما يشوفون يمكن يتكلمون الا او يبدون اسباب او ربما يحفظون انفسهم من الكلام
والمشكله دايما من الخطبة احيانا بعض الناس ملخبطين ومايتقنون السؤال فإذا جو يخطبون فلانه كل البشريه تدري عنهم ويسالون الجن والانس هذي فضيحه مهي خطبه
وللاسف بعض الناس لانهم يتمنون البنت تتزوج قد يمدحونها بشي غير موجود فيها وهذا اولا ظلم لها قبل الزوج لانه ممكن يشوف وينسحب وممكن يتزوج ويطلق وتكون البنت الضحية
وعن نفسي اعرف ناس خطبوا وانسحبوا قبل الشوفه لاسباب منها
الخاطب يكون يريد البنت كبيره ناضجه ويتبين انها صغيره وماتقوم بالمسؤولية او العكس
احيانا يعرف انها مهتمه بدراسته والوظيفه اهم من الزواج عندها وهو مايرغب الوظيفه فينسحب حتى لاتكون مشاكل مستقبلا
أما بالنسبة للانسحاب بعد الشوفه :
اعرف من انسحب لانه البنت لابسه كعب
او حاطه مكياج كامل ما شافه ع طبيعته
وبعضهم اصلا يكون مرتاح للعائله او الاسره ويبي القرب منهم فمايفكر كثير بالشكل او بعض الناس خاصه اذا كانت الخطبه من طريق الرجال يرفض الولي يبين للخاطب شي يقول تشوفه بعينك وانت بنفسك تحكم وأهم شي الاخلاق ممتازه
فالخاطب قد يكون متخيل شكل معين ويلاحظ انه ماهو اللي بباله وهذا الخطا من الولي المفترض يعلمه اشياء عامه الطول تقريبا كذا والبياض اقل من الوسط مثلا او سمار خفيف اذا كان مااستطاع يتوصله من طريق النساء
وبعض الناس خاصه اذا شاف البنت قد تكون تشابه طليقته اذا كان مطلق أو قريبه له يكرهها او مايرتاح لشكلها فيقول ماابي اظلم البنت معي
واحيانا يكون متردد بعد الشوفه ويستحي يعيد الشوفه خاصه اذا كان الولي من النوع الثقيل او الهيبه فيفضل الانسحاب ولا يتزوج وهو لازال متردد .
وكم من ناس خاصه اللي اعمارهم صغار شافوا وتزوجوا مجامله ويعيش حياته نكد بينه وبين نفسه مايبي يطلق يرحمها وراضي اخلاقها وبنفس الوقت ما هو مرتاح معها خاصه القرايب اللي يمكن تصير مشاكل بين العيلتين لو تطلقوا .
وبهالزمن كثر الطلاق الله المستعان فالصحيح ان الشوفه الشرعية حتى السوالف وقت الشوفه بوجود محرم البنت يكون فيه سوالف ويسمع صوت البنت فإذا ارتاحوا لبعض يتم الزواج وحتى لايتم الزواج وتكثر المصايب مستقبلا .
وفيه ناس اعرفهم ابوهم يخلي الخاطب يشوف البنت حتى يمل من دون ماتدري واكثر بناته تزوجوا وموفقات لانه يشوفونهم على طبيعتهم هههههههه .
كذا سمعت ينزل اغراض بالحوش ويخلي البنت تنقلهم ولا يحط فلوس تحت خزان الغاز مثلا والبنت تنزل تدورهم هههههههه والخاطب يتفرج من النافذه شكل تحححححفه .
طولت عليكم ..
لكن من شان نتطمن ويرتاحو االبنات لمعرفة أسباب انسحاب الخاطب او تعثر الخطبه
لان في الغالب ماهو نقص في البنت لان الشخص اللي بيوافق عليها بتكون ماليه عينه ومكتوب لها بإذن الله
واللي عندها أسباب او اضافه تفيدنا
واحب اقول ان دايم الصراحه والوضوح في الخطبة أساس التوفيق ان كتب الله زواج
ياااااااارب ترزق كل فتاة من تتمنى وافضل مماتتمنى ياكرييييم . سلام