السلام عليكم ورحمة الله وبركاته
صباحكم / مسائكم عسل
كل عام وأنتو بخير على الرغم من أنها متأخرة شوي
اليوم بشارككم بتجربة من تجاربي القليلة وأفيدكم مثل ما استفادت أختكم :)
قبل فترة اعتفست بشرتي مرة وحدة ، رجعت تظهر لي حبوب ، وكل اسبوع لازم تطلع وحدة ما يمداها تختفي الا وظهرت حبة غيرها
والحمدلله صحيح انه الحالة اخف من قبل بواااايد (لأنه لي تاريخ عريق مع حب الشباب وتعالجت بحبوب الروأكتين) لكن إذا ظلت بشرتي على هذا المنوال راح تسوء الحالة وهذا الشيء اللي ما أتمناه
أول شي رحت للآخصائية اللي تعالجت عندها قبل هالمرة وعطتني مضاد حيوي (وقالت لي تدرين انه العلاج ممكن يطول إلى 3 شهور وقلت لها ما عندي مانع وصبري هالمرة طويل)
ونوعا ما قدرنا نسيطر على ظهور الحبوب ، وطولت المدة بين الحبة والثانية لكن ظلت الحبوب تظهر بشكل أقل يعني تقريبا كل اسبوعين إلى ثلاث أسابيع حبة جديدة
وعطتني الدكتورة محلول حمض السالسيك وداومت عليه لمدة شهر ونص بس وعطتني كريم اسمه (بانوكسيل) وهذا ينحط على الحبة وينشفها وما يخليها تكبر وهو نفسه كريم (بنزاك) واستخدمه مرة وحدة بالليل
(سامحوني ما اقدر احط الصور لأنه ما عندي الوصلة عشان انقلهم من جهازي بس بدور بالنت على صور مثل اللي عندي)
لكن كل هالأدوية ما عطتني حل جذري ، وأنا ابي الحبوب توقف نهائيا
ومرة من المرات لقيت بالسوبر ماركت خل التفاح العضوي وكان معاه كتيب صغير جان آخذه
ولما وصلت البيت قعدت اتصفح هذا الكتيب ولقيت فيه استعمالات خل التفاح الطبية والجمالية ومن ضمنهم كان في طريقة لعلاج حب الشباب ، وتوكلت على الله وطبقتها والحين صارلي تقريبا شهر من استخدامي لها
والنتيجة انه الحبوب ما قامت تظهر لي والمسامات صغرت وبشرتي صارت وااايد اصفى من قبل طبعا لحد الحين موجودة بعض البقع الناتجة عن الحبوب لكنها خفت وااايد عن قبل
وللأمانه ما حطيت الطريقة الا بعد ما التجربة المتواصلة بدون انقطاع
للطريقة وراح انقلها حرفيا من الكتيب:
امزج جزءاً من خل التفاح مع عشرة أجزاء ماء وابق القنينة النظيفة قريبة من المغسلة في الحمام.
وبعد غسل الوجه بشكل جيد بمنظف لا يحتوي على الصابون ، توضع طبقة من محلول الخل دون الاقتراب من منطقة العينين.
هذه المعالجة تعدل الـ ph في الجلد وبالتالي تساعد على عدم تشكل حب الشباب.
تطبيقي للطريقة:
أخذت بطل ماي الصغير (حجم 0,3 لتر) وبالنظر فضيت عشرها وصبيت خل التفاح على الماي في البطل
وخليتها عالتسريحة يم كريماتي
استعمالي:
يوميا صبح ومسا أغسل ويهي بغسولي المعتاد
وبعدين اجفف ويهي بالتربيت عليه بكلينكس
وآخذ قطعة قطن وابللها بالمحلول وامسح بشرتي بها واتركه يجف طبيعي وبعد ربع ساعه احط كريماتي وخرابيطي
مثل ما قلت لكم في البداية داومت على الطريقة مدة شهر بالاضافة للعلاج اللي وصفته الدكتورة
والمحلول جريب بيخلص وراح اسويه مرة ثانية لي احس انه بشرتي ردت روحها وصارت بيبي فيس
اتمنى تستفيدون من تجربتي
دعواتكم لي
كوكتيل عسل @koktyl_aasl
عضوة فعالة
يلزم عليك تسجيل الدخول أولًا لكتابة تعليق.
العنيدة ريمممم
•
:39:
الصفحة الأخيرة