توني تذكرت... تعالوا بقولكم شو سويت

مرحبا الغاليات

مثل ما انتوا عارفين أنا ولله الحمد حامل "عقبالكم إن شاء الله"

حبايب قلبي....... أدري إن الكلام اللي بقوله مب يديد عليكم بس يمكن يفيدكم

الشهر اللي طاف سرت حق الدكتوره عشان افحص واعرف ليش انا ماحملت
سوت لي صورة والحمد لله المبايض والرحم مافيهم شي.... وقالتلي لازم اسوي فحص دم عشان تشوف الهرمونات عندي وتتأكد من كل شي بس كان فحص الدم وايد غالي وماقدرت اسويه في نفس الوقت....

قالتلي إن عندي شوية التهابات (انا استغربت لأني ماكنت احس بأي شي يدل إن عندي التهابات)
الدوا كان عباره عن 3 تحاميل بس استخدمهن يوم هيه ويوم لا وعقب ماسرت اراجع عندها لين ما تأخرت علي الدورة وسرت فحصت وعرفت اني حامل

خلال هالفتره....... كنت واااااااااااااااايد استغفر بهالصيغه "استغفر الله الذي لا إله إلا هو الحي القيوم وأتوب إليه" قريت سورة البقرة كم مره خلال هالشهر ومابكون جذابه وأقول اني كنت اقراها كل يوم....

بس الشي اللي اول مره اسويه يمكن يكون غريب شوي...... هالشي مادري إذا حد سواه قبل ولا لا بس أنا حابه افيدكم....... أنا مادري إذا كان هذا السبب في إن الله يسر أموري وكتبلي الحمل..... أكيد السبب الأول والأخير إرادة رب العالمين "إنما أمره إذا أراد شيئا أن يقول له كن فيكون".....

مابطول عليكم ............. (كل هذا ماطولت خخخخخخخخخ :hahaha: )
تعرفون شو كنت اسوي في آخر اسبوعين؟؟؟؟؟؟ كنت استغفر واااااااااايد مثل ماقلتلكم بس يوم اشوف نفسي صدق فاضيه كنت استغفر بدعاء سيد الاستفغار 100 مره....... يعني كنت اقول "اللهم أنت ربي لا إله إلا أنت خلقتني وأنا عبدك وأنا على عهدك ووعدك ما استطعت أعوذ بك من شر ما صنعت أبوء لك بنعمتك علي وأبوء بذنبي فاغفر لي فإنه لا يغفر الذنوب إلا أنت" 100 مره

اكيد بتقولون وايد....... أنا كنت يالسه بيني وبين نفسي وفجأه خطر هالشي على بالي..... قلت الاستغفار فوايده عظيمه وهالشي مافيه شك بس ليش ما استغفر بهالصيغه 100...... وقلت الله يعلم إن مب في نيتي إني ابتدع شي أو اييب شي من عندي...... وإن شاء الله ربي يقبل هالشي مني

وحتى وأنا يالسه في المستشفى اتريا دوري عشان ياخذون مني دم كنت يالسه استغفر بسيد الاستفغار 100 مره ونادتني الممرضه قبل ما اوصل الميه.. يمكن كنت واصله في الثمانينات ما اذكر.. وحتى اني تضايقت إن دوري يا قبل ما اخلص...... بس دخلت الغرفه وتوكلت على الله وقلت بسم الله توكلت على الله ولا حول ولا قوة إلا بالله حسبي الله ونعم الوكيل

يوم كنت اتريا النتيجه كنت اردد "اللهم ارضني بقضائك وبارك لي في قدرك"

والحمد لله سمعت أحلى خبر في حياتي
وعقبال ماتسمعونه انتوا بعد وتبشروني مثل مابشرتكم

ادعولي إن الله يثبت حملي وإن شاء الله تستفيدون من كلامي :26: