توي اصدق بالغيره بين السلايف

السلام عليكم
والله يافي موضوع من زمان ودي افتحه بشوف عائلتنا اللي تعاني من الشي هذا ولا زي كلام صديقتي كل المجتمع
امي كبيره بالعمر ببدايية الخمسين
وعندي زوجة عم كبيره حول 68 امي تعتبرها امها او اختها المهم ان امي مره تحترمها ومقدستها من لما تزوجت ابوي ومادري على ايش يمكن لان بذاك الوقت كانت كبيره بالعمر وامي صغيره
وعندي عمتين كبار بالعمر وبناتهم متزوجات
وعندي عم ثاني صغير تقريبا بالاربعينات الان وزوجته بالثلاثينات وهنا المشكله
تزوج عمي الصغير قبل 12 سنه من بنت وسبحان الله اهل ابوي مرت عمي الكبير وعماتي طفو بالجديده وشالوها شيل
بديت الاحظ كرهه امي وحركاتها مع مرت عمي الصغير بدون سبب لما اخذت مرت عمي الصغير على العائله وصارت اردى من امي
ترمي كلام على امي تحش بامي وتحاول تكرهه مرت عمي الكبير وعماتي بامي
امي تهديهم وتركض لهم ومتعبه نفسها عشان بس مايتغيرون عليها وهذا الشي اللي قاهرني امي تحترم بناتهم من اكبر بنت الى اصغر وحده بالابتدائي
وكانهم مقدسات عندها تهديهم من صغيرهم لكبيرهم اذا سافرت والله احيانا تكلف هدايهم لما احسبها 2000 ريال
والمشكله ايش لما نطلب انا او خواتي الصغار من امي 100 بالسفر ترفض وتقول مامعي ومن وين اجيب لكم وهي مشغوله تتقضى للناس ولبنات الناس
والمشكله ايش هم يسافرو ويروحو مايتذكروها بريالين شي حتى ابو ريالين مايجيبون لها منه تجبرنا على زياراتهم كل يومين وكانه شي اساسي وواجب علينا
والله يابنات ان بنات عمي وبنات عمتي رافعين خشومهم على امي ودايسين عليها ومستخفين فيها والمشكله ان مرت عمي الصغير عارفه نقطه ضعف امي
تحاول تقهرها بالكلام والحركات اما اشتري لهم واخدمهم واقدسهم ابد مو عندها وامي للاسف زي الطفل تنقهر وتغار مرت عمي الصغير صح ماهي بسيطه
وواضح انها تطقطق على امي خاصه اذا راحت عند عماتي او مرت عمي لان مرت عمي الصغير بعمر بنات عمي الكبير لهم بنات بالثلاثينات
فتروح لهم مرت عمي تجي مرت عمي الصغير تحط بالسناب روحتها لهم وصور القهوه وتكتب كلام قوي وواضح انها تقهر احد
وامي تروح تعصب وتقول ليه يعزموها ولا يعزموني وليهي سون هالحركات وتروح تكلم عمتي ومرت عمي وتخانقهم وتسبب مشاكل مع ابوي على حساب كلام طقطقه

والله العظيم يابنات عجزت بامي يمين بالله انها تقدس بنتهم اللي بالابتدائي ودايم تقولنا ابرك منكم
كانها مسحوره فيهم والله يابنات مهما جاها منهم هرج حش رمي كلام بناتهم يرمون عليها كلام تنطش وتركض وراهم
اما خالتي وحريم خوالي اللي على النيه ماتبيهم امي ابد ودايم تسب حريم اخوانها مع انهم طيبات ولا شفنا منهم شي
مادري ايش اسوي هدوء كلمتها
صراخ صارخت انها مشغله نفسها بحمولتها فوق اللازم وهالشي بيمرضها ويموتها حتى خالتي قبل قالت لها هالكلام لاكن ولا همها
فقدت الامل اقنعها فلوس طيرت عليهم ضغط نفسي لنا واجبار لحضور عندهم زياراتهم نتحمل مكالمات يوميا تكلمهم متخيلين يوميا بالثابت تسال عنهم
وهم مافكرو يرفعو السماعه عليها اكل اذا سوت لنا عشاء لازم لازم ترسلهم
ابوي للاسف نفس امي يقدسهم ويحبوهم ويتمنى رضاهم مع ان كل بناتهم يتزوجون ويتملكون واخر من يعلم ابوي
امي للاسف وابوي كانهم ضعاف شخصيه ويتمنون رضى اهل ابوي ولا ادري ليش
امي اصلا هين واضحه انها غيره ومكايده لان قبل يتزوج عمي الصغير ماكانت امي كذا نهائي ولا كانت تجبر نفسها على زياراتهم ومكالماتهم الا بعد
ماصارت تشوف مرت عمي علاقتها قويه معهم
امي للاسف تفكيرها والله ان بنات الثانوي اكبر منها لاتحسبوني اقول كذا اسبها انا اعلمكم تفكير امي مع انها دارسه الى ثاني ثانوي
بس انها على النيه يلعب عليها بكلمتين وتصدق يعني لما اقنعها تقول اي خلاص ان شاء الله مادري الا بكرا مغيره رايها وتقول وش دخلك
وكلام كثير يصير بس مابي اذكره وللاسف امي مخربه على نفسها
لما تسمع مرت عمي بتسافر او اشترت شي تروح تسبها عند مرت عمي وعماتي بعد فتره تسوي زيها لدرجه حتى لبسها صايره تبي تلبس بنطلون ومادري ايش
لانها تشوف مرت عمي اللي ببداية الثلاثينات تلبس عاري وبنطلون وتقارن نفسها فيها وامي الان تقريبا 54