رماح ردينية :

بيوم من الأيام كانت أمي معزومة عند ناس...وأختي طيف المتزوجة تبي حمار مكدَّة يساعدها!!واللي هو أنا!!عشان صاحباتها بيجونها ..فتبرعت مشكورة بالذهــــاب ومساعدتها لإعداد مالذ وطاب واستقبال الضيوف بالودِ والترحاب (ياناس علياَّ تتعبون تقولون شاعرة!!)هههه وبدأوا صديقاتها في الحضور عندما حل المساء...دُرت عليهم بالعصير ثم دخلت إلى الصالة الداخلية وانرزعت فيها!! وبعد برهة قصيرة أقبلت طيف أختي.. طيف:تغريد؟قومي جيبي القهوة وأغراضها وباشري على الحريم.. ورحت أصب للحريم قهوة... وحدة منهم:انتي متخرجة من الجامعة من زمان؟؟ أنا:لا ماتخرجت..بعدي بسنة ثانية جامعة... الحرمة:ليش؟؟رسبتي؟؟ أنا:لا بسم الله علي مارسبت..بس جسمي ظالمني شوي!! الحرمة:عندي ريجيم خطيييير.. تبينه؟؟ أنا:لا..ماأبيه..أمي علمتني أبعد عن كل خطر!! النسوان:ههههههه تركتهم ورجعت للصالة وتسمرت قدام التليفزيون أفتر من قناة لقناة..عل وعسى ألقى شي يشجع على المتابعة ولكن مامن جدوى..أستطيع أن استنتج إن جميع الأمراض المستعصية بعالمنا العربي سببها التلفاز!!! فبرامجه ومسلسلاته تجيب الضغط والسكري والقلب وكل مرض نسمع به أو مانسمع!!إلا فيما نَدَر!والمشكلة على قد مايُعرض بالتلفاز من سخافات مازال عدد المشاهدين يزداد!! يا قنوات فيها منصة للرقص بالوسط وبنات ليل يتنافسن لعرض اللحوم حشى حَلَبَة لسباق الأبقار وكل وحدة أخس من الثانية.. ماأدري هذول العالم ماوراهم أهل يربونهم؟؟ ولا اش يحسون فيه وهم يستعرضون أجسادهم بطرق فاضحة؟؟وكل وحدة ترقص بعالم آخر لاتناسق ..عفاشة+سماجة+سوق نخاسة!! والأردى والأخس منهم اللي يتابعهم!!! الصراحة شكلي بأألف فيهم كتاب وأسميه(تأملات معاصرة في طُرق هز الخاصِرة!!)وأتبعه بالجزء الثاني(في بيوتنا مراقص!!!) ولا مسلسلات تركية..لاتعليق!!! يجيبون الدعارة والزنا والعلاقات المحرمة في قالب الحب والرومانسية!!يعني افساد وتدمير لشخصيات ضِعاف النفوس والعقول اللي يتابعونهم!!! ولا مسلسلا ت عربية وقال إيش كوميدية!!وهي أقرب للتهريج..لدرجة إنه حتى أطفال أختي طيف يقولون:اش هذي الهبالة؟!! ولا المسلسلات الخليجية شي يجيب العصبي غصب!!يجيبون الرِجال يعربدون أو يضربون زوجاتهم ويكعشونهم من شعورهم والبطلة تصارخ وتهز شعرها المضروب سشوار لين ماقالت بس!!!ومو بس كذا كل المسلسل استعراض ملابس وجلابيات ومكياج!!سبحان الله الوحدة تصحى من النوم في المسلسل وحاطة ماكياج عروس! لا وكل مسلسل لازم فيه مستشفى..وكل الأبطال يوقفون فيه ومالهم كلمة غير أحاتي فلان وأحاتي فلانة!!!! الصراحة..عين العقل إن الوحدة تسوي مقاطعة لجميع القنوات..ماعدا الدينية اللي تبث مواضيع تنفعنا بآخرتنا.. دخلت علي طيف وقطعت حبل أفكاري.... طيف:تغريد؟؟وشفيك ماتقعدين معانا؟وكل دقيقة وانتي شاردة؟ أنا:لأني خابرتكم ياالنسوان...سواليفكم تجيب لي المغص!!! طيف:الله يالغيرة...يعني من زين سوالفك ياعزوبية؟؟قومي قومي اقعدي مع النسوان يالله.. ودخلت لقيت وحدة منهم تقول واسمها(شموخ):يالله ياحلوات..كل وحدة تقول لنا..وش مسمية زوجها بجوالها؟؟؟ الأولى:أنا مسميته تاج راسي!! الثانية:الحب كله! الثالثة:بعد عمري! الرابعة:صعب أنساك أختي طيف:وزارة الخارجية!! الجميع:هههههههه شموخ:جِعلك تعرسين ياتغريد ونعرف اسم زوجك بجوالك!!! أنا:وليش اللف والدوران واختيار اسماء لأزواجكم؟فضاوة؟سموهم بالأسماء اللي أهاليهم مسمينهم إياها!! الثانية:تغيير..مو أكثر! أنا:تغيير؟ولا استعراض؟؟وش يفيدك لاكان اسمه بعد عمري ولا بعد طوايفي؟؟ الرابعة:عادي..ليش ماخذة الموضوع جد؟؟ أنا:لأنه قبل ماتطلع موضة الجوالات كنَّا نكتب الأرقام بالدفتر..وماأتذكر إنه فيه أحد يحط الأسماء بألقاب!!ولا شلون؟؟؟ الجميع:صح!ههههه وفجأة قالت وحدة اسمها معالي.. معالي:ايه قبل ماأنسى..اش اسمها الخياطة اللي فصلتي عندها فستان لزواج أخوك يانورا؟؟ نورا:اسمها سديم بس ترى هي مصممة مو خياطة وعندها طاقم خياطات.. معالي:بس الصراحة كان فستانك خيااااال.. نورا:طبعاً...زودتها في الأجرة مقابل إنها تصمم لي فستان خاص فيني ومايكون عند أحد مثله أنا:بالنهاية هو فستان...يعني هل اخترعت لك اختراع ماسبقها إليه أحد؟؟؟ نورا: مو بالضبط..بس جداً مميز..وطلعت أميز وحدة بالعرس! شموخ:أكيد كلفك فوق ال3 آلاف..صح؟؟؟ نورا:ايه بكثير!!! أنا:ليش؟؟خيطوه لك بخيوط ذهب؟ نورا:ههههه لا ياقلبي بس هذي أسعار المصممات..واللي يبي التميز لازم يخسر فلوس!! أنا:وياترى..وشهو مفهوم التميُز بنظركم؟؟ صارت طيف تبحلق عيونها فيني عشان أسكِت..وأنا ضاربتها طناش معالي:التميز..إنك تنفردين بشي..ماعند الناس مثله!! أنا:آه..وتصيرين وحدة من ثنتين:يا حاسدة يا محسودة!! شموخ:بالعكس..ليش ماتكون الوحدة منفردة بذوقها عن الجميع؟ أنا:وليش ماتكون الوحدة مثل الناس؟ولا لازم الغرور والكبرياء والمباهاة والسرف...تدرون عواقب لابسة ثوب الشهرة؟؟؟ أطرح بين أياديكم هذا السؤال: ماهو ثوب الشهرة؟؟ابحثولي عنه في الأحاديث!

بيوم من الأيام كانت أمي معزومة عند ناس...وأختي طيف المتزوجة تبي حمار مكدَّة يساعدها!!واللي هو...