صباح الخير على قلوبكم الطيبة
عيدكم مبارك
وكل عام وأنتم إلى الله أقرب
هذا الجزء الثاني من قصتي
بعد ان طرحت في البداية تعريفي بنفسي
ولاحظت تجاوب الكثير اللي فرحني صراحة وشجعني اكمل
http://forum.hawaaworld.com/showthread.php?t=3807649
بنات في مراهقتي
امي كانت دايم تحطمني بشكلي وتنتقد كلامي وطريقة اسلوبي ولبسي
ورثت الشكل والاطباع من امي وابوي
يعني ملامح امي واللون الاسمر من ابوي
بس امي كان لها الجزء الاكبر في شخصيتي المهزوزة من ناحية الشكل
لان خوالي مشهورين بناتهم في جمالهم اللي يشوفونه الناس بالبياض والطول والشعر الكثيف الطويل
امي اجمل خواتها دايم تشوف انها اتعس حظ بينهم لانها تزوجت ابوي اللي تشوف انه ما يستحقها
ولا تستاهل العيشه اللي تعيش معاه واهله اللي تتحملهم
وهذي المشاعر تنعكس علينا مرات تحاول تعيشنا عيشة مثالية ومرات لا شعوريا تقسى علينا بدون لا تحس
ولاني البنت الوحيدة والاكبر كانت تبي لي الكمال وبنفس الوقت تتصرف معاي تصرفات ما افهمها :(
كانت تقول لي انتي سمرا لا تلبسين قصير او اذا بلبس فستان عرس تقول لا تطلعين ظهرج مو من حلاته
او لا تلبسين علاق تبين عظامج انتي ضعيفه
حتى مرات اذا رحنا الخياط تقول لا تفصل لها قياسها نبي نحط لها قماش نزيده عشان يعطيها عرض وما تبين ضعيفه
وفعلا ً كانت تخليني البس فستان مهرج يعني يبين اني ضعيفه من ايدي وفجاة منطقة البطن والخصر منفوشه بشكل مضحك
اذا رحنا السوق دايم ما نتفق ونزعل من بعض
تقول لي لا تاخذين هذا اللون لانه غامق يغمقك زيادة
لا تاخذين الا الالوان الفاتحه عشان تفتحك
حتى لما تكلم الموظفة في المحل تقول ابي لون لبنتي لانها سمرا ابي لون يطلعها ويعطيها اشراقه
والموظفة تقول كل شي بيليق عليها وتمدح فيني لكن امي تصر على رايها وذوقها
لدرجة اللي يسمع كلامها يحس ان لوني اسود وبشع
ويحس انه شي مخجل
وانا نفسي قمت احس ان اللون الاسمر مشكلة تحتاج حل !!
مع ان بالواقع لوني حنطي وبالصيف يتغير برونزاج طبيعي :heart:
صرت دايم أحب اطلع مع بنات خالاتي لانهم نفس ذوقي نحب الستايل الاوروبي في الملابس وقصة الشعر والمكياج الناعم
حتى في السوق اتسوق معاهم وانا مرتاحة
لكن لما ارجع البيت وامي تشوف الملابس تعصب تقول رديهم هذا الموديل ما يناسبج هذا اللون مو حلوو ولا يلبق لك
تحطمني واكره البس البدله
ومرات تقول لا تشترين نفس فلانة ( بنت خالتي ) هذا الموديل لايق عليها لانها بيضا انتي مو لايق
والله كرهتني في نفسي
صارت تجيب لي خلطات وصابونيات تبيض
وانا استخدمهم عشانها مع اني مو مقتنعه
فعلاً فتح لوني درجة درجتين صار لوني حنطي مايل للبياض
وامي تفرح ان اللي يشوفوني يقولون لها بنتك تشابهك جميلة مثلك
لكن الخلطات مع الاستعمال بدت تغير طبيعة بشرتي وخلتها دهنية تطلع لي حبوب
وخربت بشرتي وانا كرهتهم ووقفتهم
وامي بدت تنتقدني اني ما اهتم وبشرتي خربت وصارت مو حلوة
ومع الموضة صرت احط تان تسمير
وهي تعصب اكثررر تقول انتي سمرا وتحطين تان ليش عاجبك تصيرين سودا مثلا
والله مشاكلنا زادت بسبة الموضوع التافه هذا
اقولها يمه انتي ما عندك بالحياة الا هذا ضعيف وهذا متين وهذا ابيض وهذا اسمر
شنو هذي العنصرية والتفكير الغريب
في امور بالحياة اهم
وهي كانت ترد ببساطة انتي بنتي ابي لك الزين مابي احد يتكلم فيك
وانا ما عندي غيرك بنت انتي بنتي الوحيدة
مع حفلة خطوبتي
زوجي كان بجانبي في التصوير
والاهل حاضرين
وكانوا يقولون لي انتوا حلوين ويهمسون لي اهتمي اكثر عشان ما يصير احلى منك
ويعلقون مرات على الفارق اللي بيننا ان هو طويل انا اوصل لصدرة وانه كأنه اجنبي في ملامحه وبياضه
حتى في بنات من الاهل حسوا بالغيرة
اني صغيرة مش في سن زواج و زوجي فيه مميزات كثيرة يتمنونها
وهم اعمارهم من 21 إلى 27
كانوا يحاولون يزعزون ثقتي فيه
مثل يسألوني اسئلة تشكيكة ( غريبة هو ما تزوج الا في عمر 28 ؟ ) ( غريبة هو يتزوج وحدة اصغر منه الظاهر تفكيره عشان يربيها ) ( سمعنا ان هو كان خاطب من قبل ؟ )
لما اكلمه احس ان راسي معبي على الاخر بأفكار سلبية تشاؤمية
مرات اقول راح يقول عني طفلة ؟
ومرات اقول راح يقول ان شكلي مو عاجبه ؟
ومرات اقول احنا علاقتنا ما راح تستمر بيننا اختلاف الكل ملاحظ هذا الشي واكيد هو راح يلاحظ
حتى تصرفاتي معاه حذره
وهو يستغرب يقول لي ريلاكس ريلاكس خايفه مني ؟
مرت الايام معاه وعرف شخصيتي البسيطة الطيبة وبعض تصرفاتي الطفولية العفوية اللي يحبها ويضحك عليها
وللأمانة كان حنون متعاون يقدر ظروفي الدراسية وتعبي من الاختبارات ويشجعني ما يضغط علي
بالنسبة للزواج
شرطة الوحيد كان الزواج يتم بسرعة ما راح يصبر مدة طويلة لانه منتدب سنتين فقط ويرجع لشركته الام في الخارج
استعجل وجاب مهر مرتفع عن اللي متعارف عليه في العايلة
وارسل لي تأمين صحي
وبين فترة وفترة يرسل هدايا ورسايل بخط ايده وعيدية في العيد
مع تجهيزات الزواج اتفقت معاه ما نكلم بعض الا بين فترة وفترة حتى نشتاق لبعض وانتبه لدراستي لان كثرت الضغوط علي واضطريت اعيد مادتين في الكلية وتفهم هذا الشي
جهزت تجهيز ناعم وبسيط
ما كثرت كل شي بإعتدال
بس كثرت في ملابس البيت والعطور
شريت عقد الماس وذهب ولولو
وباقي المهر احتفظت فيه للعناية بالشعر والجسم
فستان العرس الابيض حرصت اخذ راي مصممة ونصحتني بالدانتيل الناعم لان وجهي بيبي فيس وناعمة مع ان امي عارضت انه ناعم ومافيه حركة مميزة بس اصريت عليها قلت هالمره بس خليني اختار على راحتي هذي فرحة العمر ابيها مثل اللي انا احبه
ليلة العرس
الحمدلله ياربي اللي سهلها
كانت في رهبة بس راحت
والناس ردة فعلهم كانت فوق ما تصورت
المدح من كل جانب
اول 6 شهور
كنت اخجل البس عاري وقصير
كل شي البس معاه روب حتى لو ماله علاقة في الموديل
بديت افقد الثقة مره ثانيه وخفت يقول لي شي يزعجني :(
ولما يتغزل بلوني الاسمر
اتذكر كلام امي واحس كأنه يسبني واتضايق
هو مسكين حاول يفهم ليش انا اتضايق لما يقول هالكلام بس ما فهم
لما يقول لي انه يبي بنته تشابهه احس كانه يقول انتي مو حلوة ما ابي بنتي تشابهك
مع انه ما يقصد ابداً بس قصده انه يحب البنات ووده يكون له طفل يشبه
لو اشوفه يتأمل اقدامي او شي بجسمي بسرعه اخبيه
اعتقد انه راح يقول شي او ينتقد
لكن هو يضحك يعتقد اني خجلت منه
فعلاً هذا الشي بدا يأثر على نفسيتي
بديت اشك اني مش جميلة
وما عندي ثقة بنفسي ولا 30% اني جميلة
مع اني كثير اسمع مدح من الناس لكن اتذكر كلام امي واهلي وتتعب نفسيتي
صرت اقصر معاه بحقه الشرعي ما ابيه يشوفني وهو يعتقد اني اخاف او تعبانه
إلى ان صارحني وقال انتي مو مرتاحه معاي ؟ انا ضايقتك في شي ؟
قررت من وقتها اعالج نفسي وثقتي
بديت في جلسات لطارق الحبيب عن تنمية الذات ومعرفة شخصيتي وشخصية زوجي
وسمعت لاستشاريين نفسيين طريقة التخلص من ترسبات الماضي والمواقف المزعجة في الطفولة والمراهقة
بالإضافة للبرمجة العصبية مثل اوقف عند المرايه واشوف اكثر شي اكرهه بشكلي واقول اني تقبلته وانا جميلة روحي جميلة الحمدلله ربي انعمت علي بكل النعم واقول بالاخر اللهم كما حسنت خُلقي حسن خْلقي
بعدها بديت بتشجيع نفسي
مثل البس قصير في البداية مع هيلاهوب شفاف او هيلاهوب مضرب اكس والوان
بعدها بديت بالتدريج البس الاشياء اللي بالسابق كنت اخاف البسها
والحمدلله ياربي الان تحسنت بشكل كبير
لدرجة اقول اخاف احسد نفسي لاني دايم اوقف عند المرايا اتأملني :p وهو يضحك يقول حتى انا اخاف احسدك
ودايم اذا طلعت اقابل صديقاتي او اهلي يرسل لي تذكير اقرأ على نفسي واقوله لا تخاف اهلي كلهم يشابهوني واشابههم مافيه حسد بيننا متفاهمين
يمكن لو اتكلم اكثر ما راح اخلص
بنات والله الرجل يحب بنت مرتبة انيقة شعرها جميل بشرتها صافية اظافر مهذبة عطر حلو
ما يهتم كثير هذي صدرها كبير صدرها صغير جسمها ضعيف متين لونها اسمر ولا ابيض
الرجال يبي بنت تفهمه وتقدره تحترم رجولته تعطيه من وقتها
ما تتعبه في كثرة طلباتها ومشاويرها
الاعتدال حلو ومطلوب بالدرجة الأولى
واللي تخاف وتحاتي نظرة الناس لها ما راح تعيش
انا اول لما خليت كلام الناس وانتقادهم يأثر علي
عشت في وسواس وثقتي صفررررررر كل ما شفت نظرة اعجاب اعتقد انها نظرة انتقاد
مجتمعنا مشكلته محدد مقايس الجمال والشخصية في اطار واحد
اي شخص يطلع برا هالاطار منبوذ ومكروه !
لكن بالواقع غييير هالكلام
بالأخير قدروا نفسكم كل ما حسيتوا ان ثقتكم بدت تتأثر تذكروا انجازاتكم بالحياة دراستهم موهبتكم هوايتكم بركم لوالديكم مواقفكم البسيطة في مساعدة الناس حبكم للخير صحتكم وعافيتكم
كل شي حلو تذكروه والله بتحسون بالفرق
هذي كانت تجربتي
وإن شاء الله تكون مصدر تفاؤل للجميع
واللي حابه تطرح تجربتها بتسعدني أكثر وأكثر :heart:
موفقه ياعيوني