ثلاثية :انا والطبخ والزمن طويييييييييل (الجزء الثاني)

السلام عليكم ورحمة الله وبركاته
كيف حالكم ياخواتي العزيزات ...........:icon35:في البداية بغيت اشكر كل الحلوات اللي ردوا على الجزء الاول من هذه الثلاثية واحب اقول: لاني قلت لكم راح تلقون الجزء الثاني في قسم المعجنات لكن بسبب انتقال الجزء الاول لهذا القسم قلت ان احسن مكان لكتابة الجزء الثاني هو هذا القسم لان الموضوع تنطبق عليه شروط هذا القسم ........وكمان عشان مايتشحطط موضوعي بين الاقسام واخاف اثناء الانتقال تطيح كلمة هنا ولا هنا عاد مااعرف وين راحت ..اخخخخخخخخخخ , عاد قلت يابنت استحي على وجهك واكتبيها هنا ........ المهم نبدأ بالجزء الثاني :
آآآآآآآآآآآآآه من المعجنات:(:(
عاد هاذي المعجنات هبلت بي من زمان وانا نفسي اسويها ........ولأنها سيدة مشهورة في جميع المناسبات :رمضان وزيارات وزواجات , خصصت هذا الجزء لها ,وانا صغيرة كنت اراقب مامي الحنونة وخواتي الحلوات وهن يسون معجنات بيتزا على فطاير وانا طبعاً فاتحة فمي ,ومرة وبعد سؤال مامي طبعاً حيث قلت لها يامي ياحبيبتي نفسي اسوي فطاير –هذا الكلام وانا ثالث متوسط –علميني ,قالت ابشري وعلمت وماقصرت ولما سويتها كانت برة البيت ,وآه على اللي جرا:امتليت عجين والفطايرعجينتها رخوة حتى بعد التخمير وقعدت ارقع-بس رقع يامرقع قال شي ماينرقع-وخبزتها وآآآآآآآآآآآه من طعمها الله يكرم النعمة مثل التراب حتى تحسين بالدقيق بين ضروسك-انا اللي كاسر خاطري خواتي اكلن مجاملة- ومن يومها انقلبت مشاهدة فقط للمعجنات:unsure: ولااسترجيت اسويها ,بعدين بفضل الله ثم بركات مامي صرت معدة فطائر فقط يعني الف واخبز بس مااهوب ناحية العجن , عاد تدرون سطحت امي تعلم وماينفع –سبحان الله لازم يضفي الواحد لمساته على الشيء-بعدها اكتشفت عجانة فطاير من بروان ماتجي لحالها تجي مع صانعة الطعام –ماعليش ماقدرت انزل صورتها-عاد هذي رهيبة تخلي المعجنات مثل القطن عاد هم يكتبون عليها لاتزيدين العجن عن مدة معينة انتي ماعليكي منهم زيدي شوي ,ارتحت لها بس لساتني ابي اعجن بيدي والحمدلله تم لي مااردت ,تدرون كيف: اقرأواهذي النصائح-وانعموا ان شاء الله بمعجنات لذيذة :
1.اهم شي اذا الدقيق المستخدم طازج يعني جديد لازم تسخدمين موية العجن بحذر يعني هذا يحتاج موية قليل وماعليكي من اللي يحددونه في الوصفات .
2.الزبدة مع العجين افضل من الزيت لان الزيت ينشف العجينة شوية يعني انتي اخلطي اول شي المقادير الناشفة-بعد نخلها-بعدين افركيها بالزيت اوزبدة وعشان تعرفين ان المقدار مناسب بعد الفرك اذا شكلتي العجينة تتشكل معك بدون ماتنفت بس هاه لاتخلينها ترطش من الزيت.
3.علامة العجينة الجيدة انها بعد العجن ماتلصق في يدك يعني كأنها مغلفة واللي يساعد ان شاء الله على كذا وجود السكر-يعني حتى لومو بالوصفة احشريه حشر-وكمان لازم العجينة تنعجن لين تقول بس-والله يعين ذراعك-وكمان ارجع اقول الماء استخدميه بحذر ترى المعجنات لاتصيرين كريمة معاها بالموية.
4.بالنسبة لحبيتي البيتزا مديها بعد ماتخمر وحطي عليها الخلطة وقصدريها واخبزيها بس من تحت يعني لاتشوينها من فوق وصدقوني راح تطلع بإذن الله روعة ولاتفكين عنها القصدير لين تصير دافية ,اما الفطاير اخبزيها من تحت واشويها كمان وصخني فرن الشواية قبل ماتشوينها حتى تضمنين شويها بالتساوي وبعد ماتستوي على طول اكتمي على انفاسها لين تدفى ,واحسن شي اخبزي المعجنات بصواني التيفال .
5.السفن اب حلو لواستخدمتيه بدل الماء للعجن .
6.عشان تسرعين عملية التخمير حمي الفرن وطفيه وحطي العجينة وهي مغطية بداخله .
7.لاتطبقين الوصفات بحذافيرها وحوالي تشغلين موهبتك وابداعتك ولاتصيرين حبيسة للوصفة وتذكري ان الوصفات تختلف من وحدة للثانية وكمان ممكن تسوين وصفة وتعيدين سواتها وتلقينها مختلفة عن المرة اللي فاتت يعني حاولي تسجلين ملاحظاتك ترى هذا مفيد جداً بإذن الله .
اتمنى اني افدتكم ,وان شاء الله ترقبوا الجزء الاخير من الثلاثية بعنوان :الحمدلله ..........اخيراًعرفت اخبز الكيك ,وراح يكون معاه ان شاء الله هدية زغنطوطة-لاتفرحون ماراح اعطيكم فلوس- بمناسبة الختام ........... :icon28: