ثلاث معالجات في الرياض وشوفوا ردهم

السلام عليكم ورحمة الله وبركاته
اغلبكم عارفين قصة ولدي مع التطريش المستمر من الولادة يوميا لين هالساعه ذي صحى وطرش لين قال بس الله يشفيه ويعافيه
المهم خلاص وصلت لآخر حدودي مع الصبر استغفر الله وتوكلت على الله وحجزت له موعد هالايام الجاية يابيسون له منظار او اشعة صبغة او يفعل الله مايريد اول خايفة عليه والحين مسكين هو تعب ومعدته صارت حساسة لدرجة لو يكح مرة او يعطس او يعض طرف اصبعه جاب الاول والتالي وطرش كل رضعته
والاكل والشرب الماء والعصيرات غاسلة يدي عايش على الرضاعه رقمين ثلاث كل 6 ساعات
الزبدة سألتكم بموضوع سابق عن دكاترة او معالجات في الرياض وعندنا في الشرقية
ورحت للرياض وهناك سألت وسألت وكل ناس يمدحون وحدة غير قالوا لي في وحدة مقايل سوق حجاب ينقال لها ام عبدالله القرشي
وديته لها قالت فيه عظيم وفيه نفس وعين وعطتني قواطي فيها ادوية مطحونة وزيت وظروف قالت فيها عزايم وانا صراحه اخاف من هالاشياء وقلت فيه الاخت العفنة قالت لاااااا مافيه
وكنت قارية ناس مايمدحون علاجها في النت وسألت وحدة طالعه منها قالت مادري انا بعد قريت في النت مايمدحونها واخذت بس عزايم منها ومارتحت وطلعت

جينا وحدة ثانية عجوز بالمرة مدري شلون تشوف المسكينة ينقال لها ام عوض الحربي في النسيم وكله تهاوش ومعصبه سكتي ولدك لايصيح على راسي ودخلت يدها في حلقه وهو يصيح طيب بزر ومخترع شلون ماتبينه يصيح مدري ويدينها ماغسلتهم ومجمعه اعشاب واكياس لحريم ثانيات وع طول دخلت اصابعها في حلق ولدي بغيت انجلط
قالت ولدك مافيه لاعظيم ولا اخت فيه نزلة معوية عشان كذا يطرش قلت خاله النزله المعوية تجي اسبلوع وتروح ماتقعد من بعد الولادة لين الحين عشر شهور وعصبت قالت خلاص روحي شوفي غيري تبين اعطيك اعشاب وادوية توقف التطريش والا لا قلت دقيقة بشاور ابوه وانحشنا وكل وحدة تجيها مايمديها تمسك كيس الاعشاب المغبر الا صاحت عليها جيبي فلوسي يالله خلصي علي وبعضهم تقول لها ظهري مدري شطالع فيه المسي تقول من بعيد لالا مافيك شي
ووحدة جايبة لها بزارينها مدري شفيهم تقول قبل لاتكشف من بعيد لا مافيهم شي يالله اللي وراه خلصوني
ومارتحت لها

وصادفتني وحدة عندها قالت شسويتي قلت مدري شكلها عجوز حيل مضيعة مسكينة قالت روحي لام عبدالله السلمان الشمري اللي في النسيم وعلى فكرة كلهم في النسيم وجيت لقيت بنتها ينقال لها ام فيصل المهم عندها كم حرمة قلت لها الله يعافيك حنا مو من الديرة المهم وتطالع من بعيد قالت لا مافيه عظيم ولدك فيه العفنة ولازم تكوينه وتاخذين له علاجات عندي قلت مابي كوي قالت ها اجل خلاص بيطيب على ادويتي وقعدت تشرح قدام الحريم انه كل بزر ينولد فيه العفنة وهي برد ومدري ايش وكل اللي والدين عمليات عيالهم فيهم العفنة صراحة اغلب عايلتنا والدات بعمليات عيالهم ماشاء الله مافيهم الا العافية وصحتهم زينة يعني خراط
المهم قالت ابد تطمني بإذن الله بتروح وداومي على علاجي قلت وطريقته ترا لازم اكتب مااتذكر الكلام قالت وهي مبتسمة ابد هذا جوالي دقي علي واشرح لك كل شي وقلت لها ان فيني تليف بالرحم وديسك قالت عندي عسل يصغره ب 600 مجرب خذيه واذا ماشفتي فايدة ارجعي خذي ثاني يعني الدعوى واضحة مايحتاج اشرح قلت ايه بعدين الولد اهم الحين
المهم عطيتها فلوسها وعطتني زيت فيه يمكن نص م شاي حبة سوداء وعلبتين وحدة قالت صعوط والثانية فروك يقطعون القلب حنظل مر فيه مرارة مو طبيعية اخبر الفروك حق الفم والاسنان يجي طعمه حلو عشان يتقبله الطفل ذا اعوذ بالله يحرق الفم واللسان
المهم يوم رجعت للبيت وادق عليها قلت لها الله يجزاك خير انا اللي جيتك ابي طريقتهم قالت ايه تذكرتك سوي كذا كذا مستعجلة قلت صبرك علي تراني اكتب قالت شوفي انا تعبانة ومالي خلق اتكلم واعيد تدرين صبي الصعوط بالزيت ودهني ولدك واذا ماطاب روحي اكويه ومدري شنو وسكرت في وجهي وتصارخ وحالتها حالة ضمنت الفلوس اخذتهم والباقي بالطقاق
الزبدة ولدي مزكم خفيف وقعدت احط له من الفروك والسعوط اللي عطتني واشربه وقام يطرش علي وانا مواصله لين صحيت امس مايقدر يرضع ابد اتاري حلقه ولسانه مليان فطريات وحبوب ووديناه للمستشفيات قالوا عنده التهابات وفطريات باللسان وداخل الفم واذا عطس يطلع من خشمه خيوط دم مسكين ملتهب بالمرة ورفض ابوه اعطيه علاج اي حرمة بعد توبة

الزبدة هذولا ثلاث من اشهر المعالجات في سوق حجاب وبالنسيم كل وحدة تقول راي ولااتفقوا بشي
وحدة تقول عظيم ومافيه العفنة والثانية العجوز ام عوض تقول نزلة معوية عشر شهور نزلة ! والثالثة اام فيصل الشمري للي تعصب تقول العفنة ومافيه عظيم وعلى فكرة قريت بالنت قبل اروح لها انها تعصب
عموما الله يسامحهم واحنا كيفنا يلعبون فينا يتاجرون على حساب صحتنا نعرف نتكلم لكن بزارين في الاربعين وبالشهور يعطونهم ذا العلقم المر يحرق فمهم ومعدتهم وتقول اذا ماستفاد روحي اكويه يعني بكل بساطة كان من الاول قلتي ترا ماعرف له افضل لنا
الشكوى لله اسأل الله انه يغنينا عنهم بعافية وشفاء وبركة من عنده انه ولي ذلك والقادر عليه
دعواتكم