جابها على الوتر الحساس

السلام عليكم
طلع العشاء زوجي والأطفال يشترون اغراض من المكتبة
وانا أجهز عشانا الا بعد نص ساعه رجعو يبكون وزوجي مو موجود
انهبلت وش فيكم عسى ماشر الا يقولون بابا تهاوش مع ولد الجيران ولد ١٩ سنه
ادق على زوجي رد علي لاتدقين انا في مركز الشرطه اف اف مركز الشرطه وش السالفه وش صاير بعدين وسكرها
سألت بنتي وش حصل قالت طراطيش كلام مافهمته متوتره وخايفه ولكن بعدها خبرني زوجي التفاصيل بالضبط وحنا ماشين بغينا نصدم ولد الجيران يسوق وهو مطفي الانوار وقلت له افتح أنوارك شكلك ناسيها قال وش دخلك وقام يقول الفاظ قذرة ويسب قال زوجي الصراحه توترت وحسيت الولد موطبيعي ومشيت مابي اكثر حكي والبزران خافو الا ويجي المراهق يقوله بيتك ذا الجديد البي فرحانين فيه والله لا اكسره والله احرقه
هنا زوجي وقف ودق على الشرطه وقال ولد الجيران يسوق وهو مطفي انواره واتلفظ علي الفاظ+١٨ واخرتها يهدد يكسر ويحرق بيتي هذا غير انه تونا ساكنين فله صارلنا بالضبط سنه جا ع الوتر الحساس ذا المراهق
طبعا ابو الولد بالاول نافش ريشه ويهاوش بعد ماتدخلت الشرطه بلع العافيه
انا قلت الزوجي انتبه خذ تهديده بمحمل الجد ركب كميرات من الان مافيه على باب شارعهم كميرات يا ادمي ركب كميرات وزوجي رد علي اكلني اكل قال اعلى مابخيله يركبه اصلا اخذ تعهد انه مايتعرض لنا ولو صار شي هو المتهم الوحيد لانه هدد قلت يا ابن الحلال عشانه وعشان غيره ركب ماراح تخسر شي تركيب الكميرات بلاش ماتسوى وهو رافض ورب الكعبه عجزت انام وزوجي ولاهمه كبر الوساده ونام
تدرون اخاف من المراهقين اكثر من الشخص البالغ لان فيهم كمية تهور على حماقه وممكن اي شي يخطر في بالكم يسوونه ماعندهم خوف من شي عادي
الله يهديهم يارب ويصلحهم ويسخرلهم عبادة الصالحين والله ارحمهم واخاف منهم ذا المراهقين