أحمد الله حمد الشاكرين وأثني عليه ثناء يليق بجلال وجهه وعظيم سلطانه
وبالبداية احب اشكر الغالية حبيبتهم ام عبدالعزيز على هالمسابقة والاخوات جميعاً على سعيهم لرقي المنتدى ومشاركتنا برقية
وحبيت اشارك بقصة حدثت معي وليس مهم عندي الا ان اسرد لكم كحدث حدث معي ولكن بالنسبة لداخلي وبوجداني كان حدث مهم بحياتي شخصياً اعطاني احساس بالانتصار على الشيطان ومنعة من التمتع بالسعادة بمعصية بني ادم لربة الكريم وكان مبدائي دوماً وابداً:
قولة صلى الله علية وسلم(من رأى منكم منكراً فليغيرة بيدة فأن لم يستطع فابلسانة ومن لم يستطع فابقلبة وذلك اضعف الايمان)
وقصتي حدثت لي مع جارة متعها الله بالخير الوفير وشخصية اجتماعية لاقصى حد
ولكن ابتليت بصفة سيئة وهي مد اليد واخذ ماتهفوا علية نفسها بدون وجه حق
وتبدأ قصتي معها بأن انا وهي وكذا جارة من العزيزات علي قمنا بالاشتراك بجمعية وكل شهر من يكون لها النصيب بالحصول على الجمعية تجمع الجارات على عشاء وكل وحدة تحضر فلوس الجمعية معها وجاء دوري
وكعادتي اثق بكل من يبتسم لي <<<<<<<هذا كان اول
المهم اخذت الجمعية عبارة عن 12 الف ووضعتها بكل ثقة فوق المكتبة وابعدتها قليلاً عن ايدي اطفالي حيث لم يكن بالعزومه الا ابنائي الصغار وطفلة جارتي عمرها سنة وثلاث اشهر او اقل
وطبعاً جاراتي نساء محترمات وبعيدات عن الشبهه جميعهن ودائماً اجتماعنا فية ذكر لله ولله الحمد والمنة
وبعد ان رفعت الفلوس قمت بتقديم الضيافة لضيوفي من القهوة والحلى والشاي والمكسرات وجاء وقت العشاء وفي ذلك الوقت لم يكن عندي شغالة وكنت عاملة العشاء بوفية ومثل ماتعرفون التقديم والنكب وترتيب السفرة يحتاج لمساعدة
وكانت احدى جاراتي قريبة من قلبي جداً وبدون ان طلب المساعدة تقوم وتساعدني الا هذه المرة جلست مكانها عند الحريم تقولون منشية ويابسه وناديتها مرة وقلت لها تعالي ساعديني وماردت
فقلت في نفسي اكيد تعبانة ولا متضايقة من شي وكملت عزومتي على اكمل وجه
وحطيت بدورة المياة ورد مجفف وفوط للتمسيح وعطر للتطيب غالي وكان سعرة بحدود400وشوي وقلت مايغلى على جاراتي
وبعد انتهاء العزومة وانصراف الضيوف تلحلحت جارتي وقالت لي انا بروح اسوي شاهي منعنع دام زوجك بالدوام وانا بعد وكان معنا جارة ثالثة جلست معنا
وهي راحت تسوي شاهي وان اضف حوسه العزومة ومريت على دورة المياة وشلت الفوط الصغيرة والورد المجفف عن يدين اولادي الصغار مابيهم يلعبون فية ومالقيت العطر
ولما طلعت سألت اولادي وهم يلعبون بلاي ستيشن من منكم اخذ العطر اللي بدورة المياه محد رد علي ولما جيت للصالة الا عيون جاراتي علي مستغربين على هواشي لعيالي وتفشلت وبررت موقفي ان العطر غالي وماودي يكبونة ولا يضيعونة وخفت يشكون اني اقط كلام ولا اي شي فقلت اكيد حطوة بسلال الالعاب بدورة بعدين تعالوا خلونا نشرب الشاي
وجلسنا شوي قامت جارتي العزيزة علي سألتني عن العطر قلت لها والله غالي وتوي شاريتة حتى كرتونة بالغرفة مارميتة
قالت قومي خلينا ندورة قلت ابد مستحيل وين بيروح اكيد واحد من عيالي الصغار رماة بمكان وراح القأة واصرت جارتي اننا ندورة وفعلا ً دورناه ومالقيناة
وقاموا جاراتي يطالعون لبعض ووجيهم محمرة واخر شي قالوا تشكين بأحد مأخذة رديت بعصبية اعوذ بالله كلش ولا اشك بحد اكيد مقطوط بمحل لاتهتمون بلقاة وين بيروح
وبالاخير صارحوني عن جارتنا اللي ذكرت عنها بالاول ان الله مغنيها وعندها خير وفير وقالولي اننا باخر تجمع كنا فية عند وحدة من جاراتي كنا خمس حريم مجتمعات انا وجارتي العزيزة ةجارتي الغنية والجارة الاخرى وبنت عمها واننا لما قمنا للعشاء بنت العمة فقدت خمس مئة ريال واستحت تسأل لانها حاطة بجيب الشنطة الف ولما مشينا لقتهم خمس مئة
وطبعاً ماشكت بحد بس حكولي قبل لايجوني بيوم لما كنا طالعين من التحفيظ مرتنا جارتنا الغنية مع سواقها وعرضت توصلنا وركبوا معها وانا رفضت لان زوجي مايحب اركب مع احد
المهم يقولون قالت لها وحدة من الجارات وش رايك تمرين المخازن ابي حاجة ونزلوا كلهم المخازن وراحت جارتي تدور حاجتها وجارتي العزيزة تطمش مالها حاجة بس تقول وانا اتمشى لفت انتباهي جارتنا الغنية تملي جيوب اولادها حلويات ومن الغالية وتعدل القميص فوق البنطلون حتى مايبان اللي خذوة وتقول بكل ثقة طلعت هي وعيالها وركبوا مع السواق بدون ماتحاسب ولما جيتها لقيتها هي وعيالها يأكلون الحلويات بكل ثقة!!!!
المهم وقلت لهم وش قصدكم قالوا اكيد هي اللي لطشت العطر ؟؟؟؟؟؟؟؟؟
قلت مستحيل وانا طول العزومة واطالع فيها وكل شي فيها يبهرني كنت نص العزومة سرحانة بجزمتها ...الله يكرمكم ياترى بكم ومن وين خياااااااااال ..وباقي العزومة سرحت بشنطتها اللي تخبل <<<<<تفكير ميح سطحي
المهم قلت لجاراتي مستحيل اصدق انها تمد يدها وقالوا لي هي اخر وحدة قامت من العشاء وراحت غسلت ولما طلعت خذت شنطتها ورجعت مرة ثانية لدورة المياة لان المغسلة داخل دورة المياة وطلعت بسرعة.
المهم وجارتي العزيزة قالت لي ماتشوفيني سنترت بالصالة كنت مسنترة عند الفلوس احرسها لاني من يوم المخازن وانا بس افكر بكل الاشياء اللي كل ماجتمعنا تفقد وعرفت الحين وين راحت ؟؟؟؟؟وكل ماجيت انبهك لزقت وحدة من الجارات جنبك بالمطبخ
المهم لما طلعوا جاراتي قعدت افكر ياما وياما اجتمعنا وكل ماجتمعنا فقدنا شي ياشباصة ياروج ياكسسوار وبمرة فقدنا اسوارة ذهب قيمتها حدود خمس الاف ريال ببيتها بحفل بسيط لبنت خالتها توها متزوجة وجاية من الكويت وتذكرت كيف انها بكل ماتملك لزقت التهمة بالشغالات وخلت الحرمة تتأكد ان ماسرقها غيرهم وانا اقولها انا بعض الظن اثم وتسكتني وتشكك الحرمة بالشغالات مع ان الحرمة متأكدة ان الشغالات مادخلوا الغرفة ابد وطلعت وبعد فترة سالتهم قالوا دوروا مع الشغالات مالقوا شي
المهم الحين كيف جارة واخت ومسلمة تمد يدها !!!!!!
وتوصلت لخطة بسيطة منها احرجها واشوف العطر معا ولا لا ومنها احاول اني انصحها وابعدها عن هالدرب بالتلميح وليس بالتصريح
خوفاً من اني اجرحها وخوفاً اني اجرح كبريائها لما تعرف انها انكشفت
وقمت وكلمتها بنفس الليلة ولو انها متاخرة بس قلت احسن خلها تحس بالخوف انها انكشفت واني شاكه فيها وخطوتي هاذي ياتصيب ياتخيب
ودقيت عليه وبدأت السلام قلت لها يالغالية يام فلان انا كنت ادور عطري بدورة المياة ومالقيتة فانا سألت عيالي واكدولي انهم شافو بنتك اللي معك وللمعلومية البنت توها تتعلم المشي يعني مستحيل توصل المغسلة شالت العطر وحطتة بشنطتك؟؟؟ فحبيت اكلمك وانبهك احسن من انك تنخرعين وتنبهرين وش جاب العطر لشنطتك؟؟؟؟؟؟
مسكينة قامت تبالع بالريق وتغص وتقول مستحيل
قلت لها اولادي الاثنين شافوه مع بنتك وهي عند الشنطة
وياليت تتاكدين افتحي شنطتك وانا معاك عالخط حابة اتاكد من كلام عيالي لان العطر فقد بعد ماكان مع بنتك وثواني مادريت الا المره تتعذر وتتاسف ان بنتها سوت هالشغلة وفرحت انا وقلت لها بنتك بعدها صغيرة اكيد تشوفكم تحطون كل شي بهالشناط تحسب السالفة عادية بس من الحين ازرعي فيها الخوف من الله وعلميها الصح من الخطأ وفهميها لابكره تعتبر الموضوع عادي وعلميها انة عيب واكبر من كذا حراااااااااام وحاولي تفهمينها وكل اخوانها عقوبة السارق في الدنيا قبل الاخرة وغير سواد الوجهه لما يسرق الواحد وينكشف ومن هالكلام اللي اياك اعني وافهمي ياجارة
وبالاخير استسمحت منها ان كل القصد اني حبيت اخبرها بمكان العطر قبل لاتنفجع اذا شافتة لاني ادري انها مرة محترمة وتخاف الله واني خايفة عليها من الصدمة وحبيت ابين لها ان هدفي بعد مصلحة بنتها واني اشاركها بالنصح بكيفية توجية بنتها بطريقه صحيحة وان اللي نزرعة بعيالنا اليوم رح نحصدة بكرة
وطبعا بلغت جاراتي اني لقيت العطر مع العاب اولادي .....
ومن يومها جارتي هاذي فهمت هدفي ومن يومها مافقدنا شي ابداً والحرمة جداً طايرة فيني وتحاول تبين لي الجانب الايجابي اللي فيها والله يستر علينا وعليها وعلى كل مسلم ومسلمة ويهدينا دوم لكل مايحبة ويرضأة
وترى احساسي يالسعادة لايوصف كل ماتذكرة كيف حاربت المنكر
صحيح كذبت بس الله العالم وراء القصد لان مستحيل رح يقدر احد يواجها لان هيبتها ومركز زوجها الاجتماعي يمنع اي احد يحاول يتعدى الخطوط الحمراء عند هالانسانة
ولكم ودي
وغلاي
اخت الغلا كله