جاني نزيف شديد بالسابع وولدت عمليه .....

السلام عليكم

رجعت لمنتداي الحبيب بعد كول غياب

صار لي قصه .. وغبت أكثر من شهرين

وبحكيها باختصار حتى الكل يستفيد .....

كنت في يوم في امان الله بشهر رمضان .. مادريت الا وأنفي نزف دم .. وبعد ساعتين نزفت نزف شديد

رحت مستوصف وانا منتهيه .. اغمى علي في البيت واستغفرت لاني حسيت بالموت من شدة النزف , والسبب ان الاكسجين صار مايطلع للرأس

المهم الدكتوره انفجعت يوم شافتني واخذت اشعه صوتيه .. قالت المشيمه انفصلت !!
تروحين حالاً بالاسعاف للمستشفى

وبالمستشفى كنت احس اني اشوف الموت .. وأفكر!! يلحقون يسوون العمليه والا مايلحقون .

وصل الضغط 50 والممرضه صارت ترجف من الخوف !! حسيت اني في خطر
جت الاستشاريه وبرضو ارتاعت وبسرعه راحت غرفة العمليات

طلعوني فوق وكنت تعبانه جدا ومن شده التعب كنت استنى البنج على نار .. واشوفهم يعقمون بطني وجهزوني بالكامل للعمليه .. وانا استنى هالبنج وفعلا قالوا لي بنعطيك البنج ولا تخافين العمليه نص ساعه ..

طبعاً هم اول مايعطونك البنج مباشره يجرون العمليه عشان البنج مايأثر على الجنين ..

بعدها بديت احس بطبيب البنج يهز راسي بقوه ويناديني .. والحمدلله صحيت .

والان ابني تعبان ..

الحمدلله هو احسن .. لكنه مازال بالمستشفى من أكثر من شهرين

ادعوه له بالشفاء ولمرضى المسلمين

____________________

طبعا انفصال المشيمه .. ماهي أسبابه ؟
الله أعلم

البعض يقول مالها أسباب ,
وناس تقول من شيل الثقيل
أو من السقوط
أو رفس على البطن
وقريت مره أنه فقر الدم يسبب نزيف للحامل
وأنا ماكنت مهتمه اطلاقا لموضوع الحديد
لاني كنت استفرغ اذا أكلت حبوب الحديد فصرت مااكلها واهملت نفسي وهذي النتيجه
برضو كنت شايله بعض الاشياء قبلها بيوم
وابني يرفسني وماكنت اقوله شي .. كنت مستهتره أو ماتوقع الامور توصل هذي الدرجه


فيانســـــــــــــــــــــــــــاء ياحوامـــــــــــــــل

راعوا أنفسكم وصحتكم .. قبل لاتندمون
حنا مسئولين أمام الله عن انفسنا وأجنتنا

لاتهملون وتتساهلون بالامور مثلي

الدكتور قالي بينك وبين الموت لحظات
ليه نعرض أنفسنا لمخاطر باستهتارنا ولا مبالاتنا !!

واللهم لك الحمد كما يحب ويرضى ان امدني بعمر جديد أساله عز وجل أن يكون في طاعته