جدران بيتها تشتكي من ضعفها

صديقتي زوجها مدمن ومريض نفسي ويعنفها ويعنف عيالها ومايصلي وحتى في نهار رمضان يروح ياكل من الثلاجه ومايخلي شي في الثلاجه مع العلم ان اهلها هم اللي يجيبون اغراض ثلاجتها لأنه بخيل جدا ومايصرف عليهم ريال واحد وايجار الشقه اهلها هم يدفعون الايجار لأنه في البدايه دفع وبعدها تراكمت الايجارات عليه وصار يطلب من اهل زوجته يساعدونه مع العلم انه موظف بس يروح راتبه ع الحبوب والبلاوي
جدران بيتها تشتكي من ضعفها ذليله ومهانه المسكينه وشخصيتها ضعيفه مره
كم مره قلت لها انفضي عن نفسك ثوب الذل والضعف وروحي لأهلك واطلبي الطلاق بس في الأخير اتراجع عن كلامي لها واقولها ماابي اخبب على زوجك اصبري ثمرة الصبر لذيذه
وهي قد قالت ماهقيتها منك اشتكي لك ابيك تلاقين حلول وانتي تبين تهدمين بيتي
أنا مالمتها لأن نفسيتها صارت مضطربه من كثر التعنيف
ولا ابي اخببها على زوجها ولاابي احرم العيال من ابوهم مع انهم وجدو الأذى الكثير منه ونفسياتهم متدمره لو تشوفونهم بتقولون يتامى نفسياتهم كومه من الأمراض النفسيه وقد قشر جلد واحد من عياله بالمقص لأنه تأخر ماجاب له مويه
وهي كم مره هددها بالقتل بس تقول اهرب لغرفتي واسكرها علي
إذا اشتكت لي وش اقولها لأني كرهتها من كثر ماتشتكي لي بس ارحمها وماادري وش اقولها لأني مليت من شكاويها اللي ماتنتهي