.. جدولك للتنظيف والتنظيم ..؟؟🗒🌷

بالنسبة لي عندي ..
التنظيف العميق للغرف اسبوعي 💨✨
والصالات شهري ، وفلتر المكيف شهري ( هذا حسب توصية شركة ارامكو & شركة الكهرب توصي كل اسبوعين اخذت اخف التوصيات )
وكل ست شهور تقريباً نفض وتنظيف للاشياء الاعمق ، زين الكتب اللي على الرفوف ، اوراق شجر الزينة ، جدران البلاط

• المحافظه اليوميه على الترتيب ، ونبعد الاكل عن غرف النوم والشغل .🌧
• و بعد ماارطب مكنسة الفيبر بالماء والديتول ، ارش كذا قطرة من زيت الفواحة بالمسك او غيره ( والريحه فواحه وجميله بعد التنظيف )❤️❤️

ادوات التنظيف سواء مناشف او معطرات الغرف ..
ماابخل على نفسي ابدا ولا اتتعقد بشي ، اروح السوبرماركت واخذ اللي احس ينفعني واحرص اجدد بالروايح وكذا
يعني ممكن اجيب معطر سياره واستخدمه لغرفة المكتب ، هي صغيره وريحته فيها تغيير وجميله =)
،
كذلك ادوات التنظيف ، قد شريت كيس بلاستيكي جميل فيه اشكال للمناشف وطرق بعدين لقيته للسيارات لكن خدوم
القطنيات الصغيره الناعمه فيه ، خليتها للكتب واليد الفرو للدرابزين ماتتعب وسهله ..
واي شي ممكن يفك ازمه جميل ، لان اهم شي النظافه المستمره
حتى لو ماعندك الا ماء ومنديل ينفع لاتتعطلين


،

الطهور شطر الايمان ، وامر الله خليله ( و عَهِدْنَا إِلَىٰ إِبْرَاهِيمَ وَإِسْمَاعِيلَ أَن طَهِّرَا بَيْتِيَ لِلطَّائِفِينَ...) ، ( وثيابك فطهّر ) ، قال صلى الله عليه وسلم : ( لولا ان شق على امتي لامرتهم بالسواك )
فالنظافه شي يعرف بالفطره عند كل من عنده ايمان ، وقال النبي صلى الله عليه وسلم : ( من اكل من هذه الشجرة الخبيثه " الثوم" فلايدخل مسجدنا هذا ) ، ( الملائكة تتأذى مما يتأذى منه بني ادم ) يعني الريحه .
واقسم النبي صلى الله عليه وسلم في مجلسه على من فيه الريحه ان يقوم فيغتسل
وفعل مثل ذلك عمر بن الخطاب رضي الله عنه في مجلسه ، فقال ابن عباس - رضي الله عنه- : انا ارى ان نقوم كلنا فنغتسل ( تخفيفا للحرج )
وقال صلى الله عليه وسلم : (حق على كل مسلم أن يغتسل في كل سبعة أيام يومًا يغسل فيه رأسه وجسده ) متفق عليه
،
فالبيت النظيف شرح لصدور اصحابه ، وان شاء الله يكون مع الذكر محط تواجد الملائكه 🎉❤️✨

السلام عليكم ..
انا ام لثلاثة اطفال يعني المسؤليه متوسطه لانها مقسمه على ثلاثه أشخاص
انا و بنتي عمرها 11 و ولدي عمره 9
التنظيف اليومي
غرف النوم
و غرفه الجلوس
و الصاله
و المطبخ
طبعاً نظامي "فالبيت "
انا ارتب غرفتي و هم يرتبون غرفتهم لانها مشتركه كل واحد يرفع ملابسه و يشيل اغراضه و يرتب سريره
و انا امشي بالمكنسة فالبيت كله و نتساعد في باقي الغرف ...
"المطبخ "
انا اغسل المواعين و بنتي تصفي و ولدي يمسح أسطح الدواليب و الماكرويف و الجلايه
بعدها انا الفرن من برا و الثلاجة و بنتي تكنس الارض و كذا ينتهي الشغل اليومي ..
"الغسيل"
كل واحد مسؤل عن غسيله يغسله و ينشره و يشيله ع الدولاب بس الكي انا أكوي باقي م علمتهم عليه ..
و انا علي غسيل زوجي و ولدي الصغير ..
و كل واحد له يوم في الأسبوع ..هذي القاعدة توها جديده لها أسبوعين باقي م انتظموا عليها تمام
معدا ملابس المدرسه تنغسل في غير اليوم المحدد يعني اذا توسخ ينغسل على طول ..
"الاسبوعي "
المجلس لان م عندي الا مجلس واحد ..كنيس و تمسيح الطاولات و نفض الستاير و مسح التحف و خلاص ..
الشغل النص سنوي يعني كل 6 شهور
او قبل رمضان او قبل مناسبه ..
غالباً اجيب شغالات او عمال بالساعه يوقف معهم زوجي يمسحون المراوح و الشفاطات و بلاط الحمامات و المطبخ و الشبابيك ينزلونها و يغسلونها و الأبواب الثريات و اللمبات يعني من و الى ...
اما السجاد و الموكيت شريت لي غساله سجاد مره جميله ريحتني اغسله كل م بيجيني ضيوف و يكون منتعش و نظيف 😍♥️
بس مشكلتي مع الكنب 😭💔
م اعرف له حل م عندي حوش او سطح عشان اغسله فيه اذا مسحته مكانه يبقع و يبان وسخ اكثر ..
ملاحـــظه ::
ترا اتعب جداً و تجيني حالات تبلد و لا مبالاه يتراكم الشغل لمده أسبوع و زياده و عيالي عنيدين مره ف الشغل يعني من يوم اصحى الين انام و انا وراهم الين ينجزون غرفتهم ..
بس أعطيتكم جدول عام و اسسسفه ع الاطاله

عدنا 💖
كتبت لكم في رد سابق عن التنظيف
اما بالنسبه للتنظيم😍♥️✨
احب البوكسات و السَّلات لأي شي و في اي غرفه
لان شكلها جميل و تنظم كل شي و تصيرين تعرفين مكان اي حاجه تبغينها بدون حوسه ..،
يعني في غرفه عيالي عندهم في دولاب الملابس صناديق من ايكيا مصنفه لهم فيها الملابس
الجينزات في بوكس و البجامات في بوكس و الملابس الداخلية في بوكس و هكذا حسب الحاجه ..
و دولاب غرفتي نفس الشي ...
لاني م احب افتح الدولاب ألاقي ملابس ف وجهي
و الكومدينات عليها منظم عملي و جميل مرره ناسب زوجي فيها الساعات و الكبكات و الاقلام و أغراض الدوام اليوميه أفضل من تكون مكركبه ع الكومدينه ...
و المطبخ كمان أدوات الكوفي ف سله و منظم جميل للشواهي
و الثلاجة فيها سلات اسهل و أسرع ف التنظيف حتى اذا انكب شي م تحوس لك باقي الثلاجة 👍🏻
و دولاب البهارات كل مجموعه بهارات بسله


ادري ان الأفكار مو جديده بس حبيت أشارك بها للمستجدات في عالم حواء او المتزوجات الجدد بتنفعهم كثير 😌

حلو .. فعلاً المنظر بكون مرتب وحلو..مشكورة،💝