مرحبا بنات....
أختي ريم القصيم قريت تعليقك وحابه أدخل عرض ودي أفيدك من سؤالك عن الخواجوا أنا سويتها وأختي مررره زينه وهذي الطريقه:
(2 ملعقة خواجوا مطحون+1 ملعقة مره+1 ملعقة محلب+1 ملعقة كمون)
حطي مقدار فنجالين زيت زيتون بقدرعلى النار ثم نضع المقادير فوقه وأول مايغلي نطفي النار.
وإن شاء الله راح تدعيلي... تلين المخايط وزينه عن الشمم إمسحي المخايط وحطي شوي بالفوطه...
أنا الآن نفاس ووقتي مررره زفت لأني ماني عند أمي ياحبيلها الفطور الظهر والمغرب الغداء وآخر الليل العشاء أحس إني حوووووووووسه بس الله يستر.
بالنسبه للحلبه وقفتها ولي 10 أيام وش رايكم أكملها لـ20يوم الأولى وإلا خلاص والله محتاره أخاف ظهري يعورني.. أفيدوني وجزاكم الله خير..

ياهلا بكم كلكم..
ريم القصيم1
الله يهون عليك ويسرك بما وهبك..ويجعله احسن نفاس مريتي فيه
بحول الله وقوته.

عزيزتي بالنسبه لي ماجربته لكن اسمع الحريم الكبار يذكرونه
لحالات التسقيط الله يحفظكم..
ان اللي يصيبها نزيف بالحمل وتشربه فهو اما يرفع الجنين او ينزله وينظف الرحم
وكله بإرادة الله سبحانه.
وهذي معلومات عنه..
العنزروت والذي يسمى بالكحل الفارسي والكحل الكرجاني وهو صمغ يؤتى به من فارس ومنه أبيض وبني ويستخدم شعبياً لعلاج الغازات ومغص الأطفال كما يستعمل مع الحليب وسكر النبات بأجزاء مستاوية لعلاج الإسهال عند الأطفال. كما يستعمل مشروب العنزروت لزيادة الوزن ويتردد على ألسنة الأهالي في القصيم قولهم "اعط وليدك عنزروت واجدعه وراء البيوت". ويستعمل لعلاج الجروح والحروق ومنع نزيف الجرح وينبت اللحم في الجروح المتعفنة. كما يستعمل لعلاج الجروح الخبيثة في الفرج والدبر وفي علاج مسمار الرجل. وعن رأيي الشخصي فإني انصح بعدم استخدامه داخلياً على الاطلاق لما له من أضرار قد لا يفهمها عامة الناس ويجب أن يقتصر استعماله على الاستعمال الخارجي فقط فهو في هذا المجال أفضل علاج.
هذا كلام الطبيب المشرف على عيادة جريدة الرياض.

الكمون اشك انه يعيق نزول الدم..
لكن اخذه بكميات معقوله يفيد للغازات والم التقلصات بعد الولاده..
الحبه السوداء دواء لكل داء بإذن الله ..
المسمار الصراحه مااحبه وللمعلوميه يسبب مويات
جربوه لاصرتوا طاهرين كثروا منه مع القهوه وشوفوا
كثر الافرازات اللي تنزل معاكم..مفيد لكن زيه زي الحلبه الاكثار منه
يخلي الوحده رطبه دايماً..
الفلفل الاسود ممتاااااااااااااز جدا جدا وهو اللي انا واثقه 100% انه ينظف
وقت نزول الدم..
سكر النبات
ماعندي اي معلومات عن فوائده ..اتمنى اللي جربته تفيدنا.

لو تتبعين طريقة امك احسن لك..
الارطاء يشد الخيوط ومايصلح الا بعد ماتطيح وكذلك المره.
الخوا جوا ذكرت طريقته الاخت الاماكن كلها جزاها الله خير..
وانا شخصيا ماجربته لكن سمعت كثير يمدحونه..لتليين الخيوط.

الحلب اول عشرين يوم لو تستخدمينه لكل الوجبات ممتاز..
والحلب اليمني قالت لي وحده ان ريحته اشد :)
بس انا مااستخدم غير البلدي..
على فكره كنت اتغدى يامرقه او مطازيز ارش عليه مع الماش حلبه..
وبيساعدك على اكلهم انك تكثرين المرقه..
هي كم يوم تحمليها المهم انك تستفيدين وتعوظين اللي فقدتيه..
تصدقين حتى اني افكر استمر على الماش الحين من جد عظامنا
منعدمه من قلة الوليه بالنفاسات السابقه..

مافي مشكله لو اكلتي الحبه السوداء مع العسل..
وافطرتي بعدها..استغلي فرصة قومتك مع ولدك..اول شي كلي
الحبه السوداء والعسل..ولاراح الولد للمدرسه سوي فطورك..
انا لقيت اسهل شي لي بالبدايه لاني كنت لوحدي..
سندويشة بيض +كوب حليب مع فلفل اسود..
هذا فطور تمام وكامل.
واحذري الجوع خاصه اول الايام..احذريه..
القهوه وقت المغرب وان كنتي تحبينها الظهر قبل الغدا مامنها مشكله..
عاد تصدقين انك محظوظه ان ولدك يدرس وقت نفاسك..لانك بتنتظمين
غصب :)
6
ورق الزعتر ممتاز جدا للتنظيف وراحة المعده..
وورقه رمادي وفيه منه نوع ثاني حق المدينه كأنه حبوب رز حمراء
يمدحونه هذا مره..بس انا جربت الاول..
قشر الرمان مفيد لتنظيف الافرازات والتنشيف بس ترا مايستخدم الا اذا وقف الدم تماماً
الله يوفقك ويسهل امرك ويهون عليك..:26:
***
JANA_8
هلابك يالغاليه

ايوه الرمان المطحون بنحط منه كميه بسيطه مع كوب عصير وتشربينه..
واللي تفضل الشاي تحطه مع الشاي اللي ذكرنا طريقته اول..ممكن تحطيه كسره صغيره.
هلابك.:26:
***
ذكرى الايام
الله يهون عليك ويفرج لك ويسهل ولادتك..ماتشوفين شر يالغاليه..
ويجزاك عني كل خير على دعواتك الطيبه.:26:
***
الأماكن كلها
هلابك وجزاك الله خير على ذكر الطريقه لاني كنت اجهلها.
الله يوفقك.:26:

جزاك الله كل خير

اختي الاماكن كلها الله يسهلك امرك ويستر عليك ويطلعك من الاربعين بالسلامه والعافيه
بس حبيت اسئلك عن المره والمحلب والكمون اطحنهم ولا عدل وبعدين اشخلهم
لان كانت جارتنا بالقصيم اتسويه ويكون ثقله مثل البن مو خفيف هو كذا يطلع بالمقادير هاذي
ومشكووووووره يعيوني

الله يعطيك العافيه أختي العامريه على المعلومات من صدق الواحد يجهلها متعودين على الوالده الله يحفظها بس من صدق نفاس مو عند الأهل دماااااار بس الله يعين ويرجعني لأهلي سالمه...
أختي ريم القصيم لا بس الخواجواء والمره تصير شوي مدقوقه والكمون حب بس المحلب مو عندي ماحطيته بس تقول أمي كما هو تحطينه...وراح يطلع معك ثقيل...
أتمنى أفدته ولا شكر على واجب.....