ربي يقومك بسلامه

الله يعينك ويهون عليك على حده

الأخوات ماقصروا وأنا أعجبتني شغلة عند أختي الله يبارك لها يمكن تستفيدين منها

لأن بيتهم بيت حمولة ويفطرون عمال وشي للمسجد وشي يوزعونه غير فطور أهل البيت

لاحظت عليها الله يعطيها الصحة والعافية تسوي ٣-٤ شغلات بوقت واحد

وهي تجهز للسحور تجهز بعض أغراض الفطور

مثل حشوة السمبوسة أو الحلا أو تقطع السلطة أو الخضار أو التبولة أو تلف أو تحشي

تسبيكة الطماط تصلحها وتحفظها بعلبة زيت عافية للشوربة وللخضار والمكرونة وللفول

ولو تبغاها للبيتزا تضيف بهاراتها تتعب فيها مرة وحده وترتاح ماتجلس كل شوي تكشن

اللحم المفروم والدجاج المفروم من تشتريه على طول على النار بدون بصل ولا بهارات

وإذا بغت للطبخه طلعت ياما قلت البصل أو حطته مثل ماهو

وكل ماطاح صحن أو ملعقة غسلته أول بأول وهي تنتظر شي يخلص تنجز شي ثاني

تمسح لها أبواب الدواليب أو ترتب رف بدولاب المونه أو الثلاجة

ماتجي على الشغل كله جميع لا تقسمه كل يوم شوي

التنظيف مسويه له جدول غرف النوم يوم غرفتها ويوم غرفة عيالها

الغسيل مثل يوم لزوجها ويوم لها ويوم لعيالها ويوم الفوط ويوم في الأسبوع الشراشف والمخدات

الكوي تكوي لها ولعيالها أما زوجها يوديها برا

الحمامات الله يعزك نفس الشيء اللي يستخدم دايم يومي والباقي يوم وترك

في الوقت اللي تشغل الغسالة تنظف الغرفة و دورة المياة وتكوي غسيل اليوم اللي قبل

وطول الوقت تسبح وتهلل وسبحان الله مبارك ربي بوقتها وجهدها

ماشاء الله تبارك الله تحسين عندها ١٠ شغالات على انجازها والمسألة كلها تنظيم الوقت

وتنام في الليل وتنام بالضحى وتطلع تزور وعزايم و تصلي التراويح بالمسجد وتختم القرآن أكثر من مرة

وناس داخله بيتها وناس طالعة ولكن كل شي منظم ومرتب وماعندها تأجيل