السلام عليكم يا بنات
أكيد كل وحدة طفشانة من شعرها
اليوم بإذن الله بخليك تموتين على شعرك من اول تجربة بس ما أبغى غير إنكم تدعولي
أمس جربت إحدى تجاربي ونجحت وبستمر عليها
هي ممكن تطبقوها بثلاثة طرق
أول طريقة وأسهل طريقة
منها انك تحفظين النعمة ما تترمي ومنها تعدلين شعرك
تعرفون صلصة الطحينية -الطحينة-الهردة -التراتور-الطراطور (ذيك الصلصة البيضاء إلي يحطوها المطاعم مع الصلصة الحمرا الحارة ومرات نسويها في البيت تنباع في علب)يارب تكونو عرفتوها
ذي الصلصة الله يسلمكم بدال ما ترموها بعد ما تخلصون الاكل تاخذونها
شوية مو لازم كثير
طيب وتحطون معاها
شوية زيت زيتون
و معاها شوية خل تفاح (عشان تطهر الفروة)
وانا حطيت معاها ملعقتين صغار مايونيز
أو الي ما تبغى مايونيز تحط بيضة أنا عشان ريحة البيض حطيت مايونيز
وعشان الريحة حطيت معاها شوية فاشكول
خلطتها وحطيتها في راسي
وبعدين رحت لجسمي
شطفتو بموية دافية عشان تفتح المسامات
وكنت خالطة ليمونة مع ملح مع سدر مطحون مع موية ورد وحطيتها على جسمي
وخليتها شوية على جسمي يعني خمسة دقايق عشرة دقايق
وبعدين في زي قفازات زي الليفة من بودي شوب مرة حلوة
فركت جسمي بها (تخليكي تحسي إنو طلعلك جلد جديد نظيف ناااااااااااااااااااااعم) وترى السدر غير إنو ينظف ..إذا كان فيك بقع أو حبوب أو أثار مع الاستمرار بالسدر بإذن الله تروح عنك
طيب بعدين رجعت لشعري وغسلت عنو الخلطة بعدين بقيت شوية ريحة رحت ماسكة شوية شمبو مرة شوية طيب حطيتها على راسي خليتها ترغي شوية وبسرعة مرة شطفتها عشان ما تروح فايدة الخلطة
طيب بعدين نشفت شعري ما حسيت فايدة شوية كده لما نشف
حسيت انو نعم عن اول بس انو ساير زي الشمس المشرقة قمت ماسكة شعري و سويت كعكة وخليتها
بعدين رجعت فكيت شعري لقيت جنااااااااااااااان ماشاء الله تبارك الله قولو يلا ----اكلة مقلب في حالها
وانا متأكدة من انو مع الاستمرار عليها يسير شعرك تمام التمام
ونسيت أقولكم هذه الخلطة اساسا لما اختي قالتلي هيّ تستخدم يوم ايوا ويوم لا لمدة اسبوعين
يعني بإذن الله يتعدل شعركم قبل العيد
و من جد يا بنات مرة تمام الخلطة على كثر ما جربت خلطات ما عجبتني غير هذه
الطريقة الثانية
بدال ما تحطين الطحينة
جيبو فنجالين سمسم ( السمسم الي نحطو على المعجنات)
حميصها واطحنيها
بعدين يا تحطينها مع بيض يا مايونيز
وبرضو زيت زيتون وخل تفاح و فاشكول -يعني نفس الي فوق ونفس الطريقة و المدة
الطريقة الثالثة
بدال الطحينة وبدال السمسم
جيبي زيت السمسم الأصلي أنا اخذ من شركة وادي النحل أحسها مضمونة
ونفس الحاجات الي اول حطيها على شعرك
وعلى فكرة ترى الطحينة هي معمولة من السمسم والسمسم فوايدو للشعر كثيرة
اذكر اختي تحكيني عن زميلتها تقول انو عندهم جارة يمنية = حكاية طويلة صح=
المهم ذي الجارة كان شعرها خشن مرة مرة مرة فوق ما تتخيلو
طيب وهما كان لهم سنة ما زاروها قامو يوم كدا راحولها والا يتفاجئون بشعرها ساير سايح وياي يهفهف ما شاء الله تبارك الله عليها
طيب قام قالتها الام دحين انتي سرتي تسوين زي البنات تسوين فرد وذي الخرابيط
قالتها الجارة لا والله ماقربتها ماغير احط زيت سمسم لمدة شهرين
وازيدكم من الشعر بيت
امي كان صحبة باكستانية وحدة متعلمة وانسانة محترمة يعني
المهم ماما سألتها ليش شعوركم انتو الباكستانيات كدا حلوة وطويلة وناعمة قالتلها هادا صغير صغير قصدها على السمسم انو يحطوه في شعرهم
ويا بنات بقولكم سر كمان ترى الجسم والشعر ما يبغالو غير عناية واهتمام
بس ترطيب بأي زيت كويس بس مو زيت اللوز المر صح نتايجو حلوة بس تراه يسمم الجسم
وتراني أستنى النتايج معاكم صدقوني جربوها ولا راح تندمون بس همة يابنات
مافي شي بيجي كدا بدون ماتسون شي =السماء لا تمطر ذهبا=====مسوية حكيمة
وفي الاخير اي قارئة سواء كانت عضوة ولا زائرة جربت الطريقة ولا احد من اهلها
ما ابغى غير انها تدعيلي انو ربي يجمعني ويحقق لي أمنيتي بس
تكفون لا تنسون الدعوة
واي استفسار انا جاهزة
تحياتي لكم
ساره
يارب اجمعني وحقق لي أمنيتي
:26::26::26:
sparks @sparks
عضوة جديدة
يلزم عليك تسجيل الدخول أولًا لكتابة تعليق.
الصفحة الأخيرة
وربي يوفقك ويحقق لك كل امنياتك امين يا رب العالمين