جربت طرق تسهيل الولادة وندمت أشد الندم .. الحمدلله على كل حال

السلام عليكم خواتي

من فتره ابا أنزل هالموضوع بس ماعرف ليش كنت أتكاسل ...

خواتي أنا أم لولدين .. الأول كانت ولادته طبيعيه وسهله جدا وسريعه وما استخدمت أي شي يحرض الولاده أو يزيد الطلق.. أخذت فيها إبرة الظهر يوم زاد الطلق .. بس باقي أموري كانت متيسرة ولله الحمد.. ولدي الحين ما شاء الله في الكي جي وذكي الله يحفظه

حملي الثاني كان متعب أكثر من الحمل الأول .. ونفسيتي كانت تعبانه أبا أولد بسرعه .. وكنت أمر بمشاكل ويا زوجي بسبة نفسيتي فترة الحمل .. قلت ليش ما أجرب مثل غيري عشان أولد بسرعة .. أول مادخلت التاسع ماخليت شي ماجربته .. شربت قرفه وخروع وكلت أناناس وحبيت ويلست القرفصاء .. كل شي سويته بس ماولدت ..

كل اللي صار إن الطلق زاد بدون ماينفتح الرحم .. كنت كل مره أروح المستشفى على أمل إني أولد وعقب يبرد الطلق بعد معاناة يوم كامل .. لين ماوصلت الأسبوع 38 كنت رايحه للمراجعه.. سوتلي الدكتوره سكان وكانت ساكته ماتتكلم .. خوفتني !! قلتلها خير دكتوره طمنيني !! قالت الحبل السري ملتف على رقبة البيبي ولازم نولدج اليوم ولا بيختنق

بصراحه ماكنت أحاتي ولدي كثر ما كنت فرحانه اني بولد .. على طول وافقت واتصلت في زوجي عشان اييبلي شنطتي المستشفى .. اتصلت فيني خالته وقالتلي يابنتي لا تستعيلين استخيري .. قلتلها مافي داعي دام ها كلام الدكتوره (سامحني يا رب وثقت في كلام الدكتوره وما لجأت لربي)

قالتلي بنفتح لج ماي الرحم وإذا ماياج طلق خلال ساعه بنعطيج طلق صناعي .. فتحوا الماي وخلال نص ساعه بدا الطلق الحمدلله وما احتجت للطلق الصناعي .. تحملت ساعتين بعدين زاد الألم وطلبت إبرة الظهر .. انفتح الرحم ل6 سم .. بس راس ولدي فوق مانزل للحوض .. لأنه ماكان وقته أصلا

أخرتها وصخ وانتوا بكرامه (تبرز) وقام يطلع مني ماي أخضر !! قالتلي الدكتوره على طول لازم الحين نحولج قيصريه لأن هالشي خطر على البيبي وإذا شرب الماي الملوث بيتسمم .. وتمت دقات قلبه تضعف وتنزل في الجهاز .. والله بكييييييييييييييت من خاطري ماتمنيت اسوي عمليه .. كنت أفكر في شكل بطني بعد العمليه

على طول زوجي وقع بدون ماياخذ رايي كان خايف على ولدي وحولوني العمليات .. لما وصلت غرفة العمليات كان النبض جدا ضعيف وماينسمع .. وكانوا حطيلي الاوكسجين طول الوقت لأن الأوكسجين ماكان يوصله .. ذيج الساعه نسيت كل شي وكنت بس أفكر في ولدي وأدعي ربي يحفظه لي

أول ماطلع ماصاح على طول .. ما ارتحت إلا لما سمعت صوته .. وكانت صحته ممتازه ولله الحمد .. أحسن من صحة أخوه بشكل عام لين اليوم ما شاء الله .. بس من كمل سنه ونص لاحظنا عليه إنه ما يتكلم !! ما يتجاوب ويا أي أحد !! هادي أحيانا لدرجة أنه مايتحرك من مكانه !! لما نناديه باسمه مايصد !! تخيلوا كل أعراض التوحد فيه !!

مع إن هالشي مب وراثي لا من صوبي ولا من صوب زوجي .. بس هذا كان درس قاس لي من رب العالمين لعدم صبري وعدم لجوئي لله وقت الشده .. أنا أعرف إن هذا قدر رب العالمين أحمد ربي على كل شي .. يارب يكون خير لي في الدنيا والآخره .. بس صعب جدا على أي أم إنها تشوف ولدها بهالحاله

بعد كم يوم ولدي بيكمل سنتين .. وإن شاء الله بدخله الحضانه .. سويتله تخطيط مخ وطلع التخطيط سليم ولله الحمد .. بس بعدني ماتأكدت من مشكلة التوحد .. الله يشفيه يا رب

أتمنى الحمل السليم المعافى لكل حامل .. والله يرزقكم انتوا وعيالكم الصحة والعافيه يا رب .. بس صدقوني كل هالخرابيط ماشي منها فايده .. تعب ومعاناه حقنا وحق عيالنا ع الفاضي

نزلت هالموضوع من باب النصيحه ومن باب حب لأخيك ما تحب لنفسك .. وأتمنى تدعون لولدي بالصحة والعافيه وإن الله يفرحني بشوفته طبيعي يا رب