جرحي كبيييييييييييييييير اه ياكبر همي

حبيت افضفض لكم بنات لأني حاسه اني خلاااااااص واصله حدي :mad:
وبصرااااااااحه والله يشهد علي اني حبيتكم من خلال ردودكم احسكم قريبين من قلبي حيل وماعندي احد اشكي له الا الله ثم انتم
بنات انا صبرت وتحملت بحياتي كثيييييييييير على الرغم ان عمري 27سنه الا اني واجهة اشياء كثير بحياتي وخصوصا اجواء البيت كانت مو حلوووووووووووه ابدا
الوالد بعيد تماما عنا وميت قبل يموت حقيقه يعني من صغري مااعرف كيف يعني اب بسبب الجفا والمشاكل . .عمره ماباسني او مزح معي او قال لي كلمه حلوه وجالس عند زوجته الثانيه 24سنه كل هالفتره مانشوفه الا نادرا حتى النفقه مافيه ونشوفه ب4شهور او 5شهور مره لكن صبرنا وقلنا بيجي اليوم اللي يرجع لنا فيه ولكن توفى قبل مايحقق حلمي بجلوسه معنا يوم واحد كامل في الحياه اه الحمدلله على كل حال

امي عندها 7بنات وولد وزوجة ابوي عليها بنت وحده و4اولاد وكانت تتفاخر بعيالها وانهم اولاد واحنا بنات واننا مالنا عزوه

المهم تزوجت اختي الكبيره بعد وفاة الوالد وانا انخطبت بس من واحد من قرايبنا وجلست مخطوبه له فترة سنه ونصف وكان منهبل هو واهله فيني ويقولون جمال ورزانه وعلم وفجأه بعد هالفتره كلها من الخطوبه اتصل على اخوي قال قابلني ابغاك ضروري قابله اخوي بشارع من الشوارع قال لأخوي( الله يعطي بنتكم الحظ الطيب )وبدون سبب
انا هنا زعلت حدي مو لأنه راح لا لأنه تكلم في الشارع وماتكلم في المجلس اللي خطبني منه وبكذا يكون انتهى كل شئ بأدب والله يشهد بنات ان سمعتي بيضاء وكل يعرفني ماعندي تكليم شباب وحركات ملتويه ابدا وحافظه اجزاء من القران واخاف الله واهلي كذلك ناس محافظين واذا عن الشكل والله يابنات مااقوله فقط مدح لنفسي الا انني فعلا جميله والكل يشهد بهذا بس قلت ياللا شر وراح والله يعوضني خير منه

وانخطبت مره ثانيه لناس مو من اقاربنا من بعيد حتى مو من نفس مدينتنا يعني بعيد عنا مره ويجي يوم الملكه ويتفركش كل شئ لأن ابوه واخوانه يقولون يبغون يشوفوني قبل الملكه حتى لا نغشهم وهذي من عاداتهم وتقاليدهم اهلي انجنوا وانا كمان انهبلت حاولنا فيهم يمين يسار مافيه امل وامه واخواته كانوا موجودين بس هوه ماله شخصيه ولا يغير كيف ادخل عليهم بكامل زينتي والحمو الموت حتى ابوه حرام يشوفني قبل الملكه قالوا اخواني تعال انت شفها بالغرفه الثانيه ووقعها بنفسك قال لا لازم ابوي واخواني قلت يارب يارب عوضني خير منه وانتهى كل شئ بيوم الملكه وتفشلت قدام المعازيم والناس والقرايب وخصوصا هذا اللي خطبني المره الاوله عاد هنا قلت الحمدلله على كل حال وصبرت :44: لي الى الأن 5سنوات ماانخطبت خطوبه رسميه رجال بس كلام حريم وينقطع يعني تجي حرمه وتكلم امي وبعدها مانشوف هالحرمه ابدا حتى قبل تجي وتشوفني يعني كلام تلفون وبس:44:
وتمشي الأيام ويعاريني اخوي من ابوي جانا ببيتنا فقلت له وش فيك ماتسلم شكل مالك نفس لأن لي منه 6اشهر كان بدوره بعمله قامت امه وانا واقفه وشكت عليه وقالت شوف هاذي كسرت المكوى الله يفعل بها ويترك لأني نمت عندها ليله انا وامي هيه حلفت علينا بس انا ماكسرت المكوى ابدا واصلا ماكان معاي ملابس كيف اكسره بس ابتسمت وجاملتها لأنها عجوز كبيره وقلت لها قدامه ابشري بعوضك اشتري لك احسن منه قام اخوي هذا وشكله كان يبي اي كلام علشان يطلع اللي بقلبه قال هيه انتي لو احد يحبك كان تزوجتي من زمان بس مااحد يحبك :44:
انا هنا رحت بغرفتي وطنشته وجلست ابكي قلت كيف العفيفه الطاهره احب شخص لأجل يتزوجني ماهذا منطق اصلا وشو قصده مااعرف
ومررت الأيام وتجي اختي المتزوجه وتقول هيه انتي يالعانس ((انا هنا فتحت عيوني قلت عانس ترى عمري صغير )
ويوم من الايام كانت تشكي لي من زوجها قالت ان راتبه عشره الالاف مع هذا مايصرف عليها واذا طلبته يقول ماعندي فقلت لها انتي فيك عيب قبل ماتطلبي شئ ليش تسألين عن الراتب لأنها تقول له نزل الراتب ابغى الفلانيه وهو يقول لها لا مانزل وماعندي فقلت لها لا تسأليه عن راتبه ابدا حتى ماياخذه عذر اطلبي الشئ بدون ماتكثري طلبات واسكتي ولا تقولي نزل الراتب او لا المهم هيه ردت علي قالت وانتي وش عرفك بالرواتب اول يصير لك راتب بعدين تكلمي عن الرواتب (لأني ماخذه اعلى الشهادات ومالقيت وظيفه وماتركت مكان حكومي ولا خاص الا ورحت وبرضه مافيه وظائف لي سنين في البيت لكن الحمدلله على كل حال)) صبرت على كلمتها هاذي ومالي الا غرفتي ابكي فيها شكل غرفتي صارت تبكي مني من كثر ماابكي .

وتجي اختي الثانيه لسى ماتزوجت وتقول هيه انتي (يالعيفه ) لأني تمشكلت معها على الأواني وتقصد بالعيفه لأنه خطيبي الاول تركني وكذلك الثاني

وبعد فتره اقول لأمي ابي شحن لجوالي قالت قولي لزوجك يشحن لك قلت هاه وشو قالت ماعندي فلوس ترى ماتمزح من جدها تعايرني لأني ماتزوجت

واليوم اكبر الأحزان اخوي ولد امي وابوي اموت عليه وكأني خدامه عنده طلباته انا اللي انفذها ودائما اذا ناداني اقول لبيه وتامر وحتى لما مرض تقولون اني امه سهرانه معه واسوي له عصير وافطره وادلعه وانتبه على نفسك من هالوصايا احس اني انا المريضه مو هوه المهم قال لكم شهرين ابغاكم تبحثون لي عن عروس وقال المواصفات بحثنا ولقينا عروس مزيونه حسب طلبه وقلت له ترى لقينا بنت ومواصفاتها كذا وكذا قال ((اول انتي فكينا منك وتزوجي والله اني ابغى الفكه منك من هذا البيت بأي وسيله)) انا هنا انجرحت جرح كبير مره ومسكتني البكوه بس ماابغى ابين لأهلي اني انجرحت وماابي دمعتي تنزل قدام احد وحلقي حسيته بينفجر من الكتمان :icon33: بس ماقدرت ارد على اي احد ابدا طبعا هوه اعتذر بعد كذا لكن انا ماقدرت انسى والبارحه مانمت زين قلت خلاص هذا اللي ماكنت اتوقعه ابدا وترى قالها وهو مايمزح والله العظيم من جد


اليوم كلمت امي حرمه بس اخاف زي كل مره يكلمون وبعدها يطسون ماانشوف احدا ابدا ولسى ماشافوني يعني بس يكلمون امي ومانشوف احد ابدا وكذا حظي
ولكن تكفون ادعوا لي ان الله يتم هالخطوبه ويجون ويشوفوني لأني والله الشاهد اني سبق وفكرت في الأنتحار كم مره لأن اهلي مايبوني بالبيت وواضح من كلامهم وماعندي وظيفه اقدر ءامن بها مستقبلي لكن دائما افرش سجادتي وادعي الله يفرجها علي واحاول اتجنب هالتفكير بأي وسيله
ادعوا لي ان الله يشفيني ويتمم خطوبتي وتجي النظره الشرعي ويسخر الله لي هذا الرجل ويجعله ربي صالحا كريما لينا محبا لله ورسوله
والله يابنات اني بكرب وضيق مايعلمه الا الله