جرح الخيانه وجرح اقوى منه يارب رحمتك 💔

بنات اللي تذكر موضوعي انا من اسبوع بالضبط واجهت زوجي بخيانته بعد شكي فيه وتغيره وسبحان الله "قلب المؤمن دليله" لان كثير منكم كذبني انه اللي احس فيه مجرد اوهام وظنون واول وحده " مناير المملكه" واتمنى ماالقى لك رد بموضوعي هذا او اي وحده بتلومني لان اللي فيني مكفيني والحمدلله على كل حال..
هو بالبدايه انكر ولما واجهته بالادله اعترف وقال لي انها علاقة من وراها زواج !!!!
وانها جايته عن طريق خطابه !!!
مع اني بعد كم يوم اكتشتفت انها موظفه معه وكان ومازال بينهم شغل بغض النظر عن الغراميات اللي طايحين فيها الله لايوفقهم ويسلطهم على بعض وانا متاكده انه كذاب ولاناوي يتزوجها بس مثَل علي هذي الكذبه علشان اذا فضحته عند اهله يكون عذره اهون من الخيانه !!
وبعد ماحلف لي كم مره انه علمها ان مابينهم نصيب"مصر انها علاقة زواج"!!
وانه انهى كل شي وحظر رقمها وحذفه لقيتها بعد يومين مرسلة له بالواتساب 3 رسايل "شفت تنبيه من برى على الشاشه باسمها"
يعني للحين متواصلين رغم حلفه بالله !!!!!
ولما طلبت منه يفتح الجوال ويوريني رسايلها اللي مرسلتها واضح انه مسحها بسرعه وهو يفتح الجوال ووراني الجوال "والحمدلله هالمره كنت مصوره الدليل قبل لايمسح شي مثل كل مره" قلت ابي اشوف هذي الرسايل وانا اوريه الصوره بجوالي وقام يصارخ علي واني ظالمته ومازال ينكر ويصرخ علشان يقلب السالفه علي ويطلع نفسه بريء ومظلوم بكل برود مثل كل مره
وانا هنا كنت ابكي مقهوره من استغفاله لي وطلبت منه يكلمها قدامي ويحط سبيكر ظناً مني اني بفهم من طريقة كلامها معه اذا هم للحين متواصلين والا لا!!
وقال ابكلمها بس اوعديني ماتغلطين بالكلام !!!!
قلت وانا اصارخ بسرعه كلمها وخلص
وفعلاً كلمها وقال لها اني جنبه واني بتاكد ان علاقتهم فعلا اقطعوها والا للحين مستمرين واني بسمع هالشي منها !!!
وكلمتني يابنات بكل وقاحه "رغم نبرة الخوف اللي كانت تتكلم فيها" حسبي الله عليها الله يخرس لسانها ان كانت مستمره معه للحين ويخرس لسان كل حقيره انانيه تخرب بيت غيرها على حساب وناستها
وواااااضح انهم متفقين وان عندها خبر باللي صار بينا بسببها حسبي الله عليها الله يوريني فيها عجائب قدرته
واخذت الجوال منه وكلمتها وسبيتها ودعيت عليها وقلت لها انها خربت بيتي وضيعت حياتي وحياة اثنين بذمتي
وقلت لها اذا فعلا انهيتوا كل شي فانتي محلله دنيا واخره
واذا بتستمرين معه او بشوف منك شي على جواله فماراح يصير لك طيب واني بفضحك بابنت ابليس بشغلك وعند اهلك طبعا انا كنت اتكلم بحررره وصوتي مبحوح يالله يطلع ولا خليت لها مجال تتكلم بس اثناء كلامي هذا ماسمعتها الا وهي تقول مشاكلكم حلوها بعيد عني وقفلت الخط بوجهي !!!!!!!!
وهو كان جنبي وساااكت بس واضح انه منصدم او منحرج لانه" مديرها للاسف" وانا شوهت صورته وحطيته بموقف محرج مثل مايقول !!!! حسبي الله عليهم الاثنين
والحين كملنا اسبوع بالضبط من واجهته وانا لا ليلي ليل ولا نهاري نهار
انام واصحى وانا ابكي وحاسه للحين انه متواصل معه رغم انكاره وحلفه من جديد انه انهى كل شي وانها خايفه
واعترف لما سالته عن ردة فعلها لما كلمتها
وقال انه كلمها وانها خااايفه وكانت تبكي وتقول انا مابي تسوون لي المشاكل وابعدوا مشاكلكم عني وعطاها رقمي
علشان "تحظره" ولا اتواصل معها مره ثانيه وهو يقول انه سوا كذا علشان "يحميني" من اي ردة فعل متهوره بسويها
معها علشان ماتنقلب علي وتصير فيها قضايا ومحاكم !!!!!
وانا متاكده انه خايف على نفسه وعلى سمعته بشغله
شفتوا كيف الخباثه اللي بالرجال؟؟
الحين انا نفسيتي تعبااانه عجزت انسى الجرح والصدمه والله مو بيدي عجزت اصدقه لانه حلف لي قبلها وطلع كذاب فشلون ارجع اصدقه وانسى كذبه حسبي الله عليه بيجنني وفوقها الحين قالب السالفه علي انتي شكاكه انتي مب راضيه تنسين ومهملني بشكل فضيييييع ولاكاني موجوده معه !!!
والله العظيم اهانه مابعدها اهاااانه
يعني هذا جزاي اللي سامحت؟؟
ولا تهورت ورحت لبيت اهلي وعلمتهم او علمت اهله بسواد وجهه؟؟
لاحد يقول طنشيه لان ماهمه لو اطنشه لسنه مو بس كم يوم ماراح يحس هو من عرفته كذا مايعترف بابسط الاغلاط كيف لو كانت خيانه وخراب بيوت ؟
والحين زايد بتطنيشه علشان يثبت انه مظلوم واني ظالمته بشكي فيه وبيقلب السالفه علي !!
ولا ودي اروح لاهلي وتكبر السالفه ويعرفون وبعدها نرجع ماكانه صاير شي بس يتشمت اللي بيعرف ويمسكونها علينا مثل المره الاولى او هو ياخذ راحته بغيابي ويلقاها فرصه علشان يرجع لها ويتواصل معها اذا هو الحين ناسيها
حسبي الله عليه وعليها الله يصرفها عنه ويشغلها بنفسها
والله يابنات اني دعيت عليها من قلب من قوة الالم النفسي اللي سببته لي لدرجة اني صرت خايفه
تكفون ادعو لي الله يبرد على قلبي مصيبتي 💔
لعل فيكم من تستجاب دعوتها وتفرج كربتي فيها
الله بهونها علي ويعدي هالمصيبه على خير ويرد كيد بنت ابليس لنحرها ان كانت للحين معه 😭
ويسخره لي ويرده رداً جميلا يااارب 😭😭😭
ونصيحه اي وحده لها علاقه بمتزوج تحاسب نفسها وتتقي الله بالبيت اللي بتخربه والمشاكل اللي بتسويها لغيرها علشان سعادتها ووناستها والله الالم النفسي اللي فيني مااتمناه حتى للعدو الظالم
حسبي الله ونعم الوكيل
حسبي الله ونعم الوكيل
حسبي الله ونعم الوكيل
بكل وحده تكلم متزوج وتخرب بيت اسره وهي عارفه هالشي بس انانيه منها وماتفكر الا بنفسها 💔💔💔
حنا خصماء بعض يوم الحساب امام ملك الملوك
والله ينتقم منك بهذي الدنيا قبل هذاك اليوم العظيم