الجريش الله يسلمكن تجيبين الجريش النوع لقيمي تركي وانا أستخدم نوع ألحين مكتوب عليه نورة
المهم أول شيئ أغسل الجريش ومعه شوية رز مصري لو حبيتي
يعني مد جريش والمد تراه يساموي علبة الكويكر بالتمام اللي ماتعرف المد كم هو
نقول مد جريش و ربع مد رز مصري أو صنوايت نغسله وننقعه
ثم نحمس شوية بصل في شوي زيت لحد ما يطلع لونه أصفر وتفوح ريحته وأضيف له كم عود قرفة للي يحب
ثم نصب عليه ماء وافر وأحط دجاجة مغسولة ومنضفة ومنزوع جلدها
وأخليها تطبخ مع الماء واضيف الجريش والرز المصري وأخليهم يطبخون على النار وإذا مرت ساعة
إلا ربع طلعت الدجاجة وسحبت عظامها ورجعت لحمها مع الجريش مرة ثانية
وأخليهم يطبخون وأخفف النار على الأخر وبعد ساعة أضيف جبنة مالحة أو لبن أو زبادي إللي تفضلينه
وأخليه على نارهادية وأحط تحته الصاجة
وقبل لا أطفيه بنصف ساعة أحط علبة قشطة وملعقة جبن سائل هذي الحركة تخليه جنان
ورشة ملح الليمون
ثم أبدأ أحركه وأضيف عليه كمون مطحون جديد أفضل
ثم أغرفه وأحط عليه الكشنة المفضلة
بالصلصة الحمراء
أو بالليمون الأسود لحاله
أو بالبهارات المنوعة حسب الرغبة
ملاحظات -------------------
الجريش عشان يضبط لازم الماء يكون كافي يعني فوق الجريش بأربع أصابع
وحطي في بالك إذا أنتي بتضيفين لبن أو زبادي إنو هذولي سوائل
وإذا كان جبنة يختلف الوضع
إذا تبين تضيفين فلفل حار أحمر وأخضر حطي بس خليه لحد ما يستوي وبعدين شيليه عشان ما ينهري
في الجريش
الجريش يحتاج أقل شيء 3ساعات و حسب الكمية بعد إذا كبيرة يحتاج إلى أربع ساعات إلى خمس
من يوم يبدأ الجريش يطبخ ((يبقبق )) يغلي يعني لازم تخفيفين النار عليه تكون نار هادية على الآخر
وميزة الجريش لو نشف عادي تقدرين تزيدين من مويته بسهوله
وإذا طلع جريشك سائل أول ما تنزلينه من على النار لا تحركينه أول شيء أغرفي الماء أو السائل المتجمع على وجه الجريش وهذا يخفف عليكي المشكلة
ولو إحتجتي زيادة من السائل إللي شلتيه أضيفي منه
والسائل إللي تشيلينه لا تكبينه بل أعطيه للأولاد تراه جنان ومفيد بشكل خيالي وسهل الهضم
وخاصة للصغار
هدووءالليل @hdooaaallyl
عضوة مميزة
يلزم عليك تسجيل الدخول أولًا لكتابة تعليق.
% مذهلة %
•
الصفحة الأخيرة