هلا بخواتي
السموحه على الانقطاع,,,هذا اذا فقدتوني:angry:
نزلت لكم هالموضوع بقسم المجلس العام
علشان يكون تحذير وتنبهي لفلذات اكبادنا
القصه صارت لولدي ياقلبي يوم الاربعاء
وقت الظهر كان ولدي الحمدالله طبيعي وحزه العصر سبحان الله انتشر برجليه حبوب حمراء
وقلت الله يستر يمكن عنقز ونروح فيه لدكتوره الجلديه بمستوصف خاص
قالت هذاي حساسيه من المزارع والحشايش انتم طالعين لحدايق؟؟
وكان قبلها بيوم راح مع ابوه لاحد مزارع القرايب
وتكتب له الدكتور شراب مضاد للهساتمين ولوشن زي اللي يدهن فيه وقت العنقز
وسبحان الله بالليل انتشر كل جسمه ماصارت زي الحبوب لابقع كبيره حمراء
ومن بكرا يوم الخميس صار على ولدي سخونه وزادت مساحه البقع وراجع فيه ابوه عند الدكتوره اللي قبل
قالت عادي وكتبت لنا
شراب خافض للحراره للاطفال اكيد تعرفونه بس جرعته تأثر اكثر من ادول
ومره في اليوم فقط
صارت الساعه 9ونصف بالليل عطيت ولدي الجرعه 3ملل ونصف
والحمدالله تعشى ولعب ونام الساعه 11عقبها يمكن بربع ساعه سمعت ولدي يصيح وهو نايم والوضع عندي عادي دايم هو كذا بنومه
واروح اشوفه لقيته يرتعش بسريره والمس جسمه باااااااارد
واجيب ميزان الحراره واقيسها 37بالضبط يعني طبيعي
((قلبي نغزني))
واروح اكلم زوجي بالجوال ((الاخ طالع مع ربعه))
قال عادي وش ازين!!!
ومااخذت بالمكالمه ولا دقيقتين وارجع لولدي القاه ينتفض واقيس الحراره وخلال دقيقتين صارت 37,5وطار عقلي
واشيله من السرير علشان خواته مايقومن من النوم واطلع فيه بالصاله
واثر الولد جسمه اصفر اصفر والبقع كبيره حمراء
(كأن الدم متجمع)
وشفايفه سوداء وانهبل واحاول اصيحه مايقوم
شكيت انها ازمه حساسيه بالرغم من ولدي مايشكوا من الحساسيه ابدا
بس من الملاحظه الولد متاثر تنفسه
فكرت قلت احط له تحميله؟؟بس له ساعتين ونصف اخذ الخافض!!
ورحت ابجيب زيت مقري عندي ابدهنه والمس صدره وسبحان الله اشتب جسمه نار
واقيسها وصارت 38 درجه سبحان الله ارتفاع الحراره مهب طبيعي
واحط التحميله وانفجر صياح واقرى عليه
واتصل بالجوال على زوجي اول المكالمه ماكان ودي افجعه بس مادريت الا انفجرت:icon33:
والله يهديه كاشت بعيد قال ثلث ساعه واجيك
وبهذا الوقت الله لايوريك وش اللي صار
اشوف حبيبي يرتعش وشفايفه سوداء وجسمه تنفخ ايدينهن ورجوله واحاول ابيه يتكلم معي افتح عينه صارت زي الفلبينين من شده الانتفاخ
واقرى عليه وانا اصيح
وجاء ابوه و ركض للطواري
وتعرفون تعاملهم الزفت على طول يبيحطون تحمليه ورفض ابوه قال معطينه تحميله كميتها 250 غرام
قال خلاص روحوا للنقاهه وتجيب الممرضه ثلاث مناديل مبلوله
وعصب زوجي عليهم
وجابت فوط وطاسه ماء
وركبوا عليه المغذي واخذوا تحليل وقالوا نبنعطيه ابره كرتزون عاد انا موسوسه دايم اقراء
عن اخطاء المستشفيات
قلت لزوجي ضروري!!ورفض زوجي
مادرى الا الممرضه جابت ورقه تخلي مسوليه المستشفى من اللي يصير لولدي لو مااخذ ابره الكرتزون:44:
قال خلاص ناخذها ونستخير ويطقونه الابره
وماطلعت نتيجه التحليل الا الساعه 3وربع قالوا ولدكم اصيب بنوبه حساسيه من شراب الخافض
(عاد ماشالله ماعمر جته حساسيه)
وقالوا اذا رجع له الاحمرار ياخذ ابره بالليل
والحمدالله صلينا الفجر ونمت بجنبه وكل شوي اقيس حرارته
وقمنا الساعه عشره والحمدالله تحسن لون بشرته
بس ماقدر يمشي:icon33:قعد يصيح ولدي ونحاول نقومه ماقدر يمشي لان رجليه منفخه
وحاولنا نمشيه بشوي وشوي والحمدالله بس مايحب مايمشي يشعر بالم
ونام الظهر وسبحان الله ارتفعت حرارته وبدا الاحمرار يطلع به
ويوديه ابوه للطوراي وقعد ينافخ الدكتور ورفض يراجع اوراقه حقت الفجر
بسرعه جاب ابره كرتزون من نوع ثاني
وعلى طوله ضرب ولدي مع الورك وعطنا شراب كرتزون مرتين باليوم
وياقلبي الاطفال بدأ ولدي يلعب وانبسطنا
وحضروا اهلي يتطمنون عليه العصر وسبحان الله ترجع بقع الاحمرار ومع كل دقيقه تزود مساحتها
و يطلب زوجي دكتوره الجلديه بالتلفون على انه يوم الجمعه بس قالوا ماتجي العصر هي بس مناوبتها الصبح بس
وراح زوجي لصديقه الصيدلي خبره قال عطوه من شراب الكرتزون
قال زوجي ماخف الانتفاخ بجسمه قال احمد ربنا
ده دم جسمه مليان بنسلين ورح ياخذ وقت الى ماينظف
احمد ربنا انه لطف باابنك
والحمدالله الحين تحسن وجه والانتفاخ قل بشوي
وبالاخير
اقول لكم انتبهوا من الادويه
ولدي عمره سنتين ونصف وماعمرنا صادفنا له علاج سبب نوبه حساسيه
وترا كثير من الاطباء يكتب هالعلاج للاطفال وماشالله مايأثر عليهم
ودعواتكم لولدي ان الله يتمم شفائه