السلام عليكم ورحمة الله وبركاته
كيفكم حوائيات
جايبة لكم اليوم جريش عمايل يدي بطريقة الوالدة الفرق الوحيد بين طريقتي وطريقة امي ان امي ما تعمله بقدر الضغط تعرفون حريم اول عندهم طولت بال وصبر مو مثلنا الله يخلف علينا
المهم ندخل عالموضوع على طول
طبعا مقاديري تقديرية يعني ما هي مرره دقيقة مثل ما قلت لكم الطريقة طريقة امي ولا تعترف بالمقادير
المقادير هي (الطبخ بقدر الضغط يأخذ معك ساعة الى ساعة ونص بس)
4بصل مقطع صغار
2ك جريش منقوع بماء حار حتى تشوفون ان حباته تفككت وصارت مثل اللي بالصورة وانا ما اضيف الرز المصري ابدا عالجريش
زبده طبعا كمية الزبده انتي حدديها براحتك
2م ص كمون
1م ص بهارات
ملح
1حبة ماجي
6حبات جبن كيري
ك لبن المراعي
ماء كمية غير محدده حسب حاجة الجريش (2كاسه تقريبا)
يلا بسم الله نبدأ
الطريقة:
جيبي قدر الضغط حطي فية الزبدة وكل كمية البصل وحركية الين يصير ذهبي
حطي عالبصل البهارات والكمون والماجي وترا الكمون هو اساس النكهه بالجريش يعني اذا ماعندك كمون بالبيت لا تفكرين تسوين جريش ابد
وحركي البهارات الين يذبل الماجي
حطي الجبنة الين تذبل طبعا مع التحريك
ثم حطي الجريش وحركية زين الين تختلط المكونات والنكهات
ثم اضيفي اللبن والماء اضيفي مويه الين يغطي كل الجريش مثل الصورة ثم اضغطيه لمدة ساعة
خليه على نار عالية الين تبدا الصفارة تصفر ثم قصري عالنار وخليه على نار هاديه
بعد ساعة افتحية وحركية اذا احتاج مويه زياده اضيفي وشوفيه اذا نجح خلاص او يحتاج الى طبخ زياده
والنتيجة جريش طعمه ولا بالخيال يمي يمي
ولا تنسون تحطون عليه من السمن البري
ان شاء الله عجبكم جريشي
دعواتكم لي ان ربي يصلح لي ابني سعد ويقر عيني بشوفة اخوه ويتمم لي حملي
ولا تحرموني من ردودكم و تقييمكم
من زمان نفسي اصلح جريش بس اكسل عشان وقت طبخه
بس باذن الله اجرب طريقتك
الله يعافيك خيتووو