مشالله وش هالززززين كله
شهويتوني على الجرررريش

ياحليلك بنت الجزيره صدق اذا قالوا الحاجه ام الاختراع
انشالله بجربها لان عندي كويكر كثير مدري ايش اسوي فيه

بس بنات فيه طريقه ثانيه للجريش تجنن وكانه جررريش صدقي حتى يوم سويت عزيمه الرجال مره عجبهم
استخدمو البرغل الخشن بنفس طريقه حب الجريش العادي
نفس الطعم والريحه والشكل ويخلص بسرعه بالكثير ساعتين وهو مستوى
والله يابناات كانه جريش جربوه يوم قلت لصديقاتي ماعجبتهم الفكره بس لما جربوا اقتنعوا

واللبن تحطين بترميلك... وممكن زبادي تذوبينه بمويه واحس هالطريقه الذ

ترا فكره البترميلك واللبرغل ماخذتها من هنا بمنتدى المغتربات بس ما اتذكر مين الله يجزاها الف خير اخذت دعواتنا ودعوات العزابيه الي تعشوا عن زوجي هذاك اليوم

يعطيك العافية ذكرتينا الجريش
لكن ودي اسألك ماهي طريقة الكشنة الي تحطيها فوق يعني في اعلى الصينية ياليت تشرحيها بالتفصيل
جزاك الله خير

هلا وغلا حبيباتي
اختي سندوتش تونه منتيب هينه جزاك الله خير كسبتي اجر ذ العزابيه المساكين الي عايشين على البيتزه والهمبرقر

اختي بنت اغلى وطن
انا احط بصلتين مع نصف حبه طماطم مع اربع ملاعق سمنه واخليهم على نار هاديه لحد
مايذبل البصل مره ويصير لونه ذهبي-----مش بني---- احط عليه بهارات مشكله خاصه اللومي الا سود والكمون
وبهارات الكبسه معهم واذا تبين حطي ربع حبه ماجي وشوي سكر يعني ربع ملعقه صغيره
دمتم سالمات اخواتي

يعطيكم العافيه يا اخواتي
ياليت تكتبين يا ساندوتش تونه على طريقة الجريش بالبرغل بالتفصيل ولا عليك امر

طريقه الجريش بالبرغل الخشن هو نفسها طريقته بالجريش العادي
بحطلكم طريقتي وانشالله تعجبكم .. وانا ماخذتها من موضوع ام حمودي الله يجزاها خير وكم موضوع ثاني عن الجريش يعني قريتهم وبعدين قررت شلون اسويه


القاعده العامه لكل كاس جريش 4 كاسات سؤال
(3 مويه دجاج وواحد كاس لبن)
الكاس المستخدم لمعيار الجريش نفسه يستخدم لمعيار المويه واللبن والرز
2 كاس برغل خشن او جريش(اذا جريش ينقع ليله كامله بمويه دافيه بعد غسله..واذا برغل ينقع ساعه الى ساعتين)
1 الا شوي كاس رز مصري (بنقع بمويه دافيه مده ساعه قبل الطبخ )
بصله متوسطه مقطعه مكعبات متوسطه
تحمس مع اصبع زبده مع ملح ونص ملعقه كمون مطحون ومكعب ماجي و1 فص ثوم مبشور نااعم
يجب الانتباه للبصل بالا يتغير لونه
بعد ان يذبل يضاف له الجريش والرز المصري ويحمس قليلا
يضاف 6 كاسات مويه دجاج وبعد مايغلى الجريش يوضع على نار هااااااااادئه جدا
ويقلب ويضاف عليه 2 كاس لبن وكل ربع ساعه يهرس
وبعد ساعتين(او الى ان تذوب حبه الجريش.. يضاف 4 حبات جبن كيري وربع حبه فلفل رومي و3 حبات فلفل حااار ونص اصبع زبده على الوجه) (الفلفل الاخضر طريقه امي وعمتي يعطي طعم حلو بس ممكن ماينظاف.. اذا تبين ذوقيه قبل لاتضيفينه اذا عجبك كذا خلاص )
واذا حستي انه يحتاج سائل اضيفي لبن او مويه لبن اذا تبينه اكثر حموضه ومويه اذا حموضته مناسبه (انا اضفت زياده كاس مويه يعني طلع المجموع عندي 7 كاسات مويه و2 كاس لبن)
تشيلين الفلفل الرومي بعد مايمر ربع ساعه
وتحركين الجريش وتضبطين الملح وتضيفين ربع ملعقه كمون اذا يحتاج
واذا حسيتي الجريش لسى ماختلط مع الرز كويس حركيه بخلاط الكيك شوي

عند التقديم يوضع على الجريش كشنه بصل مقطعه مكعبات متوسطه مع خلطه بهارات تسمى مسمنه(ماكانت عندي فحطيت عليها فلفل اسود وقرفه شوي وحبه ليمون اسود وشووووي هيل طحنتهم وحطيتهم على البصل مع الزبده على النار )


انشالله تجربونه ويعجبكم