أسغفر الله الذي لا إله إلا هو الحي القيوم و أتوب إليه

وااااااااااااااو موضوع وناسه

ايام راحت ليتها تعود عاد تصدقون دايم اقول لزوجي خلن ارجع بيت اهلي اسبوعين ونسوي خطوبه من جديد

يقولي شينه على كبر << يحطمني


انا شفت زوجي يوم الملكه لبسني الشبكه وكذا وشفته ثلاث مرات بعدها لاكن انا نوعي خجول فوق ماتتصورون

وجلست اسبوع من غير لا اشوفه بعدين الزواج

استعدادتي لزواج والخوف نساني اني بروح معاه لحالنا وكنت مو نايمه ثلاث ايام وماي خايفه لا يصير لي شي وقت الزفه
ما اطول عليكم صورنا انا معاه بالفندق الي فيه الحفله وكان الوضع عادي وتحسين اني مو مركزه مع الموقف

لاكن يوم سلمت علي امي وامه وانا عند الباب وجابو لي العباه هنا كنت بموت
وركبت السياره انا معاه ورا واخوه قدام وانا اقول لنفسي كيف ابوي خلاني مع رجال ثنين غرب وانا طول عمري محافضه على نفسي << الله لا يبلاكم

دخلت الغرفه وانا واقفه ماجلست ولا شي والعباه علي بس شلت الطرحه قال شيلي العباة بشوف الفستان شلته
وجلس هو على الكنبه وماكان فيه الى وحده جلست على طرف السرير

قال تصدقين يوم الشوفه الشرعيه ماكنتي حلوه << انا هنا جاني شعور مقدر اوصفه كرهت عمري قلت صدق اني ماني جميله
بس محد قالي اني شينه يعني شكلي مقبول

بعدين قال ويوم شفتك بالملكه قلت الحمدلله اني كملت لانك طلعتي مملوحه بس اليوم مرا حلوه

كان ودي اصفقه بعلبه الكلنكس من جد قهرني بس الحيا ردني

بعدين قال شكل فستانك مو مريح قبل لا يكمل كلامه قلت لا مريح
قال لا ولله قومي غيري

اثره فاتح الدولاب واختي راحت الفندق العصر وحطت الروب حقي وملابس حق بكره وعطرتهم وكذا

ويبيني اقوم البس الروب مستعجل قلت ماعندي ملابس قال لا شايفهم

رحت الدولاب وطلعت البنطلون الجينز مع تيشرت قال لا لا ابغى الثاني وقام عطاني اياه

اخذت عباتي وشنطه صغيره اخذت دش ومن الشنطه الصغيره ستشورت شعري وحطيت مكياج خفيف
جلست بالحمام ساعه 40 دقيقه على امل انه ينام لاكنه مانام
يوم فتحت الباب قال اخيرا خلصتي لبست عباتي وطللعت

قالي من جدك بالعباه قمت اصيح

قال يوووووه مشكله الي ماخذ بزر

جلس على السرير وجلست على الكنب جا جنبي على الكنب وقمت اصيح مرا ثانيه

قال يابنت الحلال تراك زوجتي مو خويتي وكلش بالطيب يجي لا تخافني بس انا ابيك تاكلين معاي
حط قدامي صحن فواكه وصحن حلويات لانه مو وقت عشا وجلس ياكل الرجال وانا خاطري احلي
بس ماعزم علي قال الي ياكل بضرسه بنفع نفسه قلت اعوذ بالله وشهالرجال

صلينا الفجر وقال انا بنام وقلت انا مره تعبانه لي ثلاث ايام مانمت دخل الحمام يفرش اسنانه وكذا ودخلت بعده
لقيته متمدد على السرير

قلت انا ماحب انام على السرير ترا دايم انام على الكنب << ام النصب

قام من السرير واخذ مخدته ونسدح على الكنبه قال كذا اوكي ولا اروح غرفه ثانيه قلت لا اوكيي << وانا ودي يروح غرفه ثانيه
ورحت على السرير وانسدح وانا بالعباه ملاحضين

وكل شوي ارفع راسي بشوفه نام ولا لا لين نمت

بعد ساعتين صحيت من النوم لقيته لسا مانام


وجلسنا على هالحال لين الضهر طلعنا ورحنا لشقتنا

بعدين يقولي ماهقيتك توافقين انام على الكنب انا قلت اكيد بينكسر خاطرها وتقول نام معاي

وانتي ولا همك << طاح وجهي من تالي

وجلسنا ثلاث اسابيع على هالحاله ما انام معاه على نفس المكان لين قال تراك مصختيها وزعل

عاد اخذنا غرفه بنفس الفندق بعد ثلاث اسابيع

وكنت مستحيه بعد بس ما مصختها مثل اول


من جد يبنات الحيا الزايد مصاخه
انا لا ذكرتها اقول ماله داعي كان عشنا ذاك اليوم ونبسطنا

حلوه ثلاث اسابيع و ه مطول باله
لا و بعدها رجعتو حجزتو مره ثانيه بالفندق هههههههههههههههههه

للرفع

ياحليلكم ..

شفتي معطيني وجه دايم يحس اني بزره مع اني ولله كبيره حيل يوم اتزوج عمري 21

بس هو عمره كان 34

بس الحمدلله ماتوقعت انه متفهم وباله طويل