0اسومة 0 @0asom_0

عضوة نشيطة

جـمال الـروح ذاك هو الجمالُ || تـطيب بـه الـشمال والخِلالُ o

بسم الله الرحمن الرحيم

صبـاح | مســاء الطهر
تحية منمقة بعبق الورد:26:

جـمال الـروح ذاك هو الجمالُ تـطيب بـه الـشمال والخِلالُ
ولا تُـغني إذا حـسنت وجـوه وفـي الأجـساد أرواح ثـقال
ولا الأخـلاق لـيس لها جذور مـن الايـمان تـوّجها الكمال
زهـور الـشمع فـاتنة ولـكن زهـور الروض ليس لها مثال
حـبال الـود بالإخلاص تقوى فـإن يـذهب فلن تقوى الحبال

اليوم باتكلم عن شي مرره مهم بحياتنا
يحث الاسلام عليه ولكن للاسف كثيير من الناس بدوا يتخلون عنه
موضوعي اليوم بعيد شوي عن جمالنا الظاهري..
بعيد عن ارواج ماك وخلطة صابون الغار
اليوم بتكلم عن شي يعتبر اهم واحلى الا وهو
طبعا اول مانقابل أي شخص بالعالم على طول تتجه انظارنا له كشكل
وطبيعي فمن اول مره نلتقي فيه مانعرف الا شكله..
ونحكم على طول..
فنقول هذي جميله وهذي مملوحه وهذي عاديه
واحيانا نقول شكلها مغرورة او دلوعة
ولو قررنا أن نفكر في سياحة حول العالم والشعوب عشان نشوف
وش مقياس الجمال بنلقى العجب العجاب !
فيه الي يفضل السوداء أوالصلعاء ومن يشوه الوجه بشقوق ويعتبرها
قمة الجمال ومن يمط الرقبة ومن يشق الشفاه الخ ،
بمعنى أن للجمال مقياساً حضارياً يحدد لكل شعب وكل بلد

طبعا الحكم كله على الظاهر..
ولكن بعد مانجلس مع الشخص اياه/ها..
من اول جلسة يتبين لك جمالها..طبعا مو الجمال الشكلي..هذا كله راح وبانت لك صفاتها وجمالها الروحي..
تلاقينك حكمتي عليها انها شكلها شريرة وشايفة نفسها
جلستي معها تقولين بنفسك : سبحان الله مره مو على شكلها اخلاق وفرفووشة وتحبينها
وممكن تشوفين وحده حلوه وتقولين اكيد هذي رهيبة..
وتجلسين معها وبس تطالعين يمين ويسار تبين تروحين ومليتي ويكون السبب طبعا انها تحمل صفة شينه ولاماعندها ذوق وخلق حسن يحببك فيها
طبعا مو كل حلوه جمالها الروحي فاسد او كل شينه اخلاق وقمه لا يمكن نلاقي العكس او بنسب متساوية
وبالطبع الجمال الروحي مهم لكل شخص فينا..
بتصرفاتنا وافعالنا يبين جمالنا..بالذوق والادب والاخلاق..

نتعرف الحين مامعنى الجمال الروحي ؟:)

الجمال الروحي هو جمال داخلي غير مادي..بمعنى ان الجمال الخارجي لايدخل مقياسا في هذا النوع من الجمال..فهو جمال الخُلق والادب والذوق وسلامة المنطق وحسن التعامل مع الآخرين..

كثير مشاهد يومية تمر علينا.. تتجسد فيها قدامنا شخصيات كثير البعض منها يحمل جمال روحي راقي جدا بما فيه التعامل اللطيف والخلق الحسن وحسن المعشر مع المظهر طبعا بالمقابل فيه العكس..
خلونا نشوف واحد من هالمشاهد..

في الجامعة.. ساره وعبير يلتقون طبعا لحظات سلام وتبويس خخخخخخخ

ساره : كيفك عبير..؟
عبير: هلا وغلا..هلا بالطش والرش عاش من شافك
ساره: اممم تدربي عيونها يمين ويسار
عبير:الله وش هالزين ساره صايره قمر بسم الله عليك
ساره بخجل مصطنع :تسلمين..آآآ عبير.. ابي دفترك <<الله من المصالح
عبير وهي تخفي الصدمة من وجهها بابتسامة :تامرين امر..تفضلي..
تعطي عبير ساره الدفتر وهو بحاله سليمه..وللاسف بعد يومين ومماطلة في احضار الدفتر تجيبه مشقوقه ورقته وعليه بعض بقع الحبر
عبير يضيق صدرها..وتمتم بنفسها..وش قلة الذوق هذي على الاقل تعذرت ولاشي

كيف اكون جميلة " روحيــا " ؟:26:

اولا: تجنب التشكي والتذمر

يعني اذا جلستي مع وحده ماتمسكينها وتتشكين عليها وتتذمرين من المشاكل الي عندك وتنشبين بحلقها..
مثل ماعندك مشاكل وتعب بعد هي عندها..صحيح حلو انك تفضفضين لاختك او امك او صديقتك وتطلبين الحلول احيانا بس بحدود المعقول ومو بشكل دائم وكل ماواجهتك مشكلة تركضين لها:( .. وبنفس الوقت شاركي الي حواليك باحزانهم وافراحهم وخففي عنهم واوقفي معاهم..
صدقيني خصوصا بالاحزان-لاقدرالله-ماراح تنسا لك وقفتك ابد..مثل اذكر مره صديقتي كان عندها مشكلة وماديتها ضعيفة شوي بس مابينت لي انها محتاجة..فعرضت عليها المساعدة من باب اننا صديقات والصديق وقت الضيق:)..مرره قدرت لي موقفي وللحين تذكره وزاد احترامها وحبها لي ..

ثانيا : تعلمي الاستماع

يعني اذا جت وحده وقامت تتكلم عطيها جوها وتفاعلي معها احيانا بحركات الوجه واحيانا نظرات العين تكفي.
يعني كانت تسولف عن موضوع ماثر فيها تفاعلي معها وحسسيها انك معاها مو تملين وتاففين ولا تلفين بعينك عنها وتناظرين لمكان ثاني
وبعدين شاركيها الموضوع ياتعطينها حلول او تقدمين لها رايك في الموضوع..
هالشيء فعلا احس له تاثيير كبييييييير مره حتى تحسسين الي قدامك انك محترمته ومقدرته

رابعا : الكلمة الطيبه

خلي الكلام الطيب دايم على لسانك..ابعدي عن الكلمات الي تخرب جمالك الروحي مثل السب والشتم
احد يعطيك شي اشكريه : الله يجزاك خير..ماتقصرين..تسلم يدك عالهديه الحلوه..
احد غلطتي عليه اعتذري : معليش لاتاخذين بخاطرك علي..اسفه..سامحيني ماكان قصدي..وممكن اذا كان احد اكبر منك امك او ابوك تحبين راسهم..
شفتي احد من زمان عنه بادريه بالكلمات الحلوه: عاش من شافك ياقلبي..الدنيا نورت بشوفتك..لك وحشه..
طبعا والكلام بهالمجال يكثر فلكل مناسبة وقتها وكلامها الي يناسبها..طبعا المجاملات الي بدون مبالغه حلوه لانها تترك اثر بالنفس..
شفتي وحده متضبطه وكاشخه او مسويه اكله حلوه
امدحيها بكلمات بسيطة وبدون مبالغة ..

خامسا : صادقي التفاؤل..

امسكي التفاؤل مع يده وخليه دايم معك طبعا بشكل معقول..
ابعدي عن التشاؤم قدر المستطاع وخلي روحك حلو ومنتعشه بالتفاؤل..
خلي على لسانك دايم : ان شاءالله خير..الله يجعله خير..والدنيا حلوه وكل شيء حلو..
ابتسمي وخليك بشوشة واقبلي على الحياة حتى لو كان فيه مشاكل لان النفس تحب الراحه والتفاؤل ..وبتلاقين تاثير هالشيء بعد يمتد على الي حولك..ولاحظي الحين اذا جلستي بجنب وحده متضايقه ومتشائمة من شي بتنتقل لك العدوى ويخرب مودك انتي..فانشري التفاؤل لروحك الحلوه اولا ولانعاش الاخرين..

ثامنا : كوني صريحة..
كوني صريحه مع نفسك ومع غيرك بحدود..
يعني مثلا صديقتك اليوم قالت كلمه ماعجبتك وحزت بنفسك..
لاتخلينها بقلبك وتردينها لها بموقف ثاني..خذيها على جنب وصارحيها بهالشيء
او احد استشارك بشيء ابدا ماعجبك لاشكل مثلا او مضمون جاوبيها بصراحه لانها بعدين يمكن تقول كله من فلانه خلتني اسوي هالشي الغلط ولا وجهتني..
وبعد كوني صريحه مع نفسك..واجهي عيوبك وحاربيها وصححيها..
لاتغمضين عينك وتسوين نفسك ماتشوفين..مثلا تحسين انك في بعض الاحيان تقطين كلمات يزعل منها الناس حاولي تعودين نفسك على الكلام الحسن والطيب..
مثلا دايم يقولون لك الناس انك مغرورة..وانتي حقيقة مو مغرورة بس وجهك وملامحك فيها شوي جمود..اذا دخلتي عليهم خليك مبتسمه ابتسامة طبيعية ..تصرفات تصدر منك ماتعجبك تغلبي عليها بالتصرفات الحسنة..

سابعا:حب لاخيك ماتحب لنفسك..
وهذا الي تكلمت عليه ببداية الموضوع..
قبل ماتصدرين الحكم على غيرك حطي نفسك بمكان الشخص الي قدامك بعمره وحالته وشوفي كيف وقع الحكم عليك..
حبي لغيرك مثل ماتحبين لنفسك..للاسف هالنقطه كثير ناس يغفلون عنها وتسبب مشاكل بينهم وكم من بنت شكت بموضوع كلمات وماحطت نفسها بمكان الطرف الاخر وشافت كيف بيكون وضعها..يعني مثلا تحكم على زوجة اخوها او أي احد ثاني انها تكرهها بمجرد تصرف بسيط بدر منها..
حطي نفسك مكان غيرك والتمسي لها العذر اذا غلطت لانها يمكن تكون ناسيه او ماكانت قاصدة ..

ما انسى اني انوه ان جمال الخلق مكمل لجمال الروح..وجمال الروح مكمل لجمال الخلق..لكن..يعتبر جمال الروح احلى وابقى لان جمال الشكل زائل مع تقدم العمر..ويبقى جمال الروح وتاثير ذلك على الي حواليك ..تلاقيهم حولك يحبونك ويذكرونك بالخير وهذا الي نبيه ..

اخيرررا اتمنى ان ينال على اعجابكم :) :26:

منقول

يلزم عليك تسجيل الدخول أولًا لكتابة تعليق.

تسجيل دخول

حكايه صبر • 14 سنة

جزاك الله خير

jouliana • 14 سنة

لا اله الا انت سبحانك اني كنت من الظالمين

ما انسى اني انوه ان جمال الخلق مكمل لجمال الروح..وجمال الروح مكمل لجمال الخلق..لكن..يعتبر جمال الروح احلى وابقى لان جمال الشكل زائل مع تقدم العمر..ويبقى جمال الروح وتاثير ذلك على الي حواليك ..تلاقيهم حولك يحبونك ويذكرونك بالخير وهذا الي نبيه ..

جزاك الله عنا عزيزتي الغالية خير الجزاء وأفاض عليك من نعمه ظاهره وباطنه

0اسومة 0 • 14 سنة

منورين الصفحه اخواتي