جفاء زوجي

السلام عليكم
مدري من وين ابدأ ب قصتي مع هذا الرجال طول عمري عاملته ب اصلي وماقصرت عليه ب شي
صبرت على ديونه ومصايبه بالاسهم وعشت معاه على الجفاء والنكد وامور كثيرة
ويوم اشتد ساعده والدنيا ضحكت له والفلوس صارت مثل الرز بيده قرر انه يكافئني مكافأة ولا احلى من كذا
هي انه خطب وتزوج علي ماخبرني هو رسل اخته الكبيرة تفهمني بالشرع والاحاديث
هذا الكلام قبل ٨ سنين تقريبا وجا كلمني انه يتزوج بحجة انه يبغى عيال ونا ماجبت له الا ولد واحد بس عمره الان ١٣ سنة مع العلم حملي فشل اكثر من مرة وهو مايصبر يقول ابغى عيال قبل لايضيع عمري وشبابي وتزوج علي وحدة كنت اعرفها وجلست معاها اكثر من مرة خطبها من اهلها وتزوجو وجابت له للان بنتين و طفل كنت اتمنى يكون العطل منه هو بس للاسف كان مني
ذيك من اول ليلة حملت اول سنتين كان عادل شوي
كان يجيني بالاسبوع مرة مرتين ويحن على ابنه بس بعدها خلاااص تغير رسميا معاي
بعد ماكنت الاساس صرت احتياط عنده وعند اهله رموني برا حتى بنت خالته تقول لحماتي خليه يطلقها بس هو مايرضى يقوول عشان الولد صبرت وعشان اطلع من جو القهر توظفت وظيفة حكومية عن طريق واسطة ابوي وكان بيجن يبغاني اترك وظيفتي بس انا مارضيت لاني حاسبة بيوم من الايام انه ممكن يطلقني
مع العلم ابوي للان يبغاني اتطلق وزعلان مني محسبني انا ما ابغى اتطلق ويلمح اني اخلعه خلع مع العلم انه كل اخواني لاهين عني اصلا كل واحد متزوج وقاعد مع حرمته وعياله
وابوي قاعد بروحه ببيته يبغاني اتطلق واجي اقعد عنده على طوول انا وابني
و هو مو راضي يطلق يبغى يخليني كذا وعدا عن مكايدة حرمته لي هي واخواتها
كل فترة وحدة كانت تراسلني واتس ويتابعوني على انستغرام وتويتر يناشبون لي وين مارحت لحد ماخلوني اطفش من كل شي وكل فترة كانت تسوي مشاكل لي مع الناس ومع بيت اهل زوجي وذولي يجوني منتفخين ومتكدرين ولا شافوها هلو بالتراحيب اذاها وصل اخر حد معاي
لحد اخر مرة رسلت لها قبل ثلاث سنين قلت لها
شوفي يافلانة كل شي قاعد يوصلني ان مابطلتي افتراء وظلم وتفرقة اقسم بالله ل افرش سجادتي كل يوم ب ثلث الليل وادعي عليكي بصحتك وعيالك
من يومها سوتلي حظر وماقمت اسمع لها حس الا نادرا
مع العلم علاقتي ببيت حماي مقطوعة قبل سنة
وكان يومها ملكة اخت زوجي وانجرحت هناك بموقف ومن يومها حتى العرس ماحضرته ورحت حضرت عرس ثاني وخليت الخبر يوصلهم وجن جنونهم يبوني اجي واحضر عشان يكيدوني وريتهم اني قوية واني صاحبة موقف بعد وحتى رمضان والعيد ماقلت لهم كلمة ولا تهنئة وزوجي يجيني كل مرة منتفخ ومعصب من كثر تحريض امه ولا علي منهم اصلا حتى لو طلقني مايهمني وظيفة وعندي وعندي ولد اتفرغ لتربيته وبيت ابوي موجود
الحين انا وضعي من ست سنين مثل المعلقة مايجيني الا تفريغ شهوة بس يعني مايجي الا بوقت المدام تكون معاها الدورة او مسافرة مع اهلها واذا يجيني يعطيني خبر من قبل والله يابنات يمر شهر وشهرين مايدوس غرفة نومي واكبر قهر تعامله مع ابنه
تفرقة واضحة جداا
مع ابني رسمي جدا لا ضحك لا سوالف لا شي بس يسأله عن اخباره واخبار دراسته يعني يتكلمون كأنهم لا اول مرة يلتقون مع بعضهم
ومع عيالها انواع الدلع والرحلات والطلعات
كل يوم والثاني يحط صورة جديدة ل واحد من عيالها ولا بعمره فكر يحط صورة ابني لاغيه ابدا من حياته ومبعدة عنه وعن عائلته كثير ب اكثر من موقف احسه ينكره ولا يعترف فيه ما ياخذه معاه ابدا عزومات عائلتهم ولا للمجلس حقهم والكل مايجي الا وعيالهم معاهم
يعني ابني نادرا مايشوف اهل ابوه والحين ناسي شكلهم واشكال اعمامه ومايعرف عيالهم يعني عايش وحيد مايسأل فيه الا جده مافي الا اصدقائه يتم شابك السوني معاهم اونلاين ويقعدون والله بيوم العيد يكسر قلبي
يعني الكل معيد ومستانسين
وانا وهو قاعدين انا على الجوال وهو على السوني او منسدح بفراشه يتقلب ويفكر اخرنا نطلع مول نتمشى فيه او نروح مطعم مع ابوي هذي بهجتنا وحدودنا في العيد وهو سفرات ومطاعم ومهرجانات ويجي اخر يوم العيد عشان يرضي ضميره ياخذنا مطعم او البحر انا احاوول بقدر الامكان اني اغطي دوره مع ابني لانه ابني يعتبر يتيم وابوه على قيد الحياة
اغلب راتبي يطير له سوني ومسجلته بمدرسة اهلية ونادي سباحة وكله اطلعه واشتري له واصوره وضرتي على طوول ملاحقة تشوف وتراقب وش نسوي
ترسل زوجي ذيك المرة يستفسر عن المدرسة لي سجلت فيها ابني وتروح تسجل بنتها
شوفو القهر والتخلي يجي بعض الاحيان يشيل بنته من المدرسة وابني لااااا يرجع بالباص مع انهم يشوفون بعض
حتى اللبس يجي يقولي من وين تجيبي ملابسه ويروح طوالي يشري بالهبل لعيالها
ولا بعمره شراله شي من يوم ما اتزوج نساه خلاص وصار يعامله رسمي وابني يحس وواعي ل ابوه بس يكتمها بقلبه وانا الاحظ عليه وانا قلت ل ابوه مو انت قلتلي انك تبغى تتزوج عشان تجيب له اخوان ماتبغاه يتم وحيد طول عمره
وهو يسكت ويصرف على طووول وعشان يسكتني يروح يقعد معاه او يتصل يسلم عليه
انا عارفة زوجي وطبعه مستحيل يقسى على ابنه ابدا
بس مدري ليه كذا يعامله بهذي الرسمية والجفاء
اقعد احببه ب ابوه
اقوله ابوك عطاني فلوس اليوم وقالي اشتريلك شريط سوني
اقوله ابوك هو لي يدفع اقساط مدرستك وابوك شرالك
يعني قاعدة اخليه يحب ابوه وهو احسه مو مصدقني اصلا
ما ابغى تصير عنده حالة نفسية بسبب التفرقة الواضحة انا الحين خلاص احس نفسي عافته مو طايقته ابدا وابغى اتطلق منه بس لي كاسرني هو ابني ما ابغاه يبعد عن ابوه عالاقل هنا يشوفه اكثر من مرة بالشهر لا خلعته وخذت ابني متأكدة مليون بالمية انه بيسحب على الولد نهائيا ويمكن تمر سنين مايعرفه ولا يسأل فيه
مع العلم انه زوجي بطبعه رحيم جدا مع الناس والكل يشهد له بالطيبة والكرم مع الناس بس مدري لييه يعاملني انا وابني بهذا الجفاء والرسمية تعبت منه كلمته اكثر من مرة يتعدل يوم ويرجع مثل قبل احس اني خلاص انا وابني مالنا كرت عنده مطرودين صرنا احس انه عياله وحرمته استحوذو عليه ولهفو كل شي لهم