ههههههههههه
أحلى شيء في الموضوع انه بأسلوب حلو يفتح النفس
بصراحه بعض المواضيع صارت تخليني اكره افتح النت خاصة مع الوحام

حبيبتي عيون سعد البيبي في البطن تكفين بعدي قطقوطه عني لا ترفسني أو تشوتني
خلي تمسكها عني القمورة

اتاري فيه قهوةعصريه واناموداريه
يالله انامعكم يالغاليات

سلام

مرحبا بنيات و حريم:

معليش حبيباتي ،، تأخرت عليكن بس و الله مادري وش فيني حرارة مغير أرتجف ،، و صداع بينفجر رأسي منه ،، و الحساسية مرةةةة شيطه علي الظاهر مع التبخير و التنظيف تذكرتني ...

ما عليه العذر و السموحة ،، و بعد أذنكم راح أكتب لكن أحداث الجلسة بكرة بأذن الله أن عافني ،، لاني بصراحة ما أحس فيني حيل ،، ولا الي زاد الطين بله ولدي بعد تعبان الله يسترما يمرض البيت كله ......

فيني شوية طاقه راح أرد عليكن و أستقبل المتاخرات علينا:::

راجيه عفو ربي: هلا و الله ،، يالله حيها أقلطي و لا توصين حبيبتي الفصفص و أخوانه مجهزتهن لكن من بدري ،، شفتي السنع عاد...

مهاء: حياك الله في اي وقت ،، عسى مهوب أنتي الي تطقين الباب و أنا أصلي ،، العذر و السموحة عسى ما زعلت لانا ما فتحنا ،، ما عليش سامحينا و ما راح أبدا الجلسة الي لما تجين....

أمراة حبية: هلا و الله ،، و لا يهمك المكيف و راح نطفيه ،،حيالك الله .....

شقيقة الروح: ممكن حبيبتي ممكن ،، أصلا قطقوطة محضره لهم حاجات حلوة تحب البزارين....

أنشودة المطر: هلا حبيبتي ، لسى ما فاتك شيء ،،يدوب قدمت العصير ،، تفضلي تفضلي.....

الورده ـ 1 : حياك الله و لا يهمك ،، تونا نشرب العصير يالله أستعجلي بحط القهوة..

حرم الدكتور: تسلم عيونك ،، أضحك حبيبتي أضحك و أنبسطي ترى كل الجالسات هم خواتك ،، ما يأمر عليك عدو ،، ارتاحي أنتي كل شيء جاهز ، ولا يهمك المكيف و طفينه ،، الظاهر هو سبب مرضي...

فرحة القلب: الله يحلي أيامك كمان و كمان ،، ولو بخلي مكان للبيبي ،، يعني اذا بغيتي تنسدحين و االي شيء ،، الله يهديك بس وش ترفسك بنتي عمرها 9 سنوات و مربية على انها ما تشوت الحوامل مهم كانت الاغراءات لا تخافين بس أنتي ، و بعدين هي ما تدخل على الحريم أبدا...

أحس اني تنشطت شوي ، ما عليه كأنه بيجين النوم ،، توني ماكله بندول الي ينوم ..

بس وش رأيكن نبدأ جلستنا بالتعرف على بعض لاننا أول مرةةة نجتمع مع بعض في جلسة ...

يالله بأبدا أنا و كل وحده تجي بعدي تعرف عن نفسها ،، علشان ما يكون فيه رسميات
أسمي: عيون سعد
العمر: 28 سنة
الحالة الاجتماعية: متزوجة من 10 سنوات تقريبا..
عدد اللاطفال: بنت عمرها 9 سنين ،، وولد عمره 7 سنين..
الدولة: السعودية..
أعيش في دور أرضي زي ما أنتو شايفين و فيه حديقة صغيرة و حلوة ،، كملت دراستي بعد الجامعة في دبلوم عالي لما بعد الجامعة ،، بس الحمدلله مانفعتني في اني أتوظف ،، بس صقلت شخصيتي ( قوية الكلمة )...
أحب القراءة كثير في كل المجالات ،، أكتب خواطر و قصص و عندي قدرة على التعبير قوية... أحب التجربة و التغيير و أكره الروتين.... و بس..

يالله الحين ،، شرحت لكن حياتي كل وحده تدخل و تعرف بنفسها حتى الي بتجي متأخرة تحجز مكان و تعرف بنفسها ،، فلازال المجال مفتوح الى ان أشفى من مرضي لانه ما فيني حيل على عصر المخ الحين....

الحين حاسه عيوني م هوب قا درةةة أف تحه ا ،، شايفين مهوب قادرة أكتب كلمتين على بعض ( و انتي وش تسوين الحين ) ...

يالله بنات بروح أنام أحسن خلاص رأسي بينفجر ....

تصبحون على خير .....

وأنا بعد ولو متأخرة بس شوفي لي مكان فيه وإلا أروح

وتسلمين والله على هالدرر

الإسم: أخت أخوها
العمر: 31
الحالة الإجتماعية :متزوجة من 13سنة وزود
عدد الأطفال: 4
أعيش في دور أرضي
كملت دراستي بعد الزواج زواجي بعد أولى جامعة
أحب القرأة من الكتب سابقا ومن النت حاليا حيث أبحر في المواقع الإسلامية والأدبية وطبعا عالمي عالم حواء أحب الرسم وكتابة القصص الأطفال وأغلب القصص اللي أحكيها لعيالي من تأليفي 00 وأعذريني ما أقدر أكتب زيادة تعرفين الحمل وغثاه
يالله أترخص وقهوة دايمة