جلستي الأولى للعلاج بحقن الميزوثرابي

السلام عليكم

هاذي أول مشاركه لي معاكم بهذا المنتدى الرائع وأتمنى ان يكون هناك من يستفيد من موضوعي

طبعا كثير المواضيع اللي نشوفها عن علاج مشاكل الشعر وتساقطه والخلطات ... إلخ

أنا اعاني من فتره من تساقط الشعر .... جربت أشياء معدوده لحل المشكله ... لكن مالمست نتايج قويه والصراحه اني مالتزمت بشي منها لفترة طويله ... يعني فترة شهرين او 4 بالكثير .... وخلاص اغير عنها


بالصدفه في الإنترنت وجدت أن هناك مواضيع تتحدث عن حقن الميزوثرابي ... وحبيت اني اجربها

واخذت اول حقنه لي ..... فحبيت اني اشارككم المعلومات اللي عندي عن حقن اليزوثرابي


طبعا حقن المزوثرابي هي مش اسم للعلاج لكن هي طريقه علاجيه ... وهي عباره عن حقن يتم حقنها في الجلد

وعلى حسب الحاله اللي يشكو منها المريض إذا كان تساقط شعر فهي تحقن بالرأس وإذا كان غيره ... فراح يتم حقنها على حسب المكان المطلوب


أخذت اول حقنه لي بالمركز السعودي الصيني بحي الشاطئ في الدمام عند الدكتور ايمن

تكلفة الجلسه الواحده هي 400 ريال ومدة العلاج هو 10 جلسات ..... اول 5 جلسات تكون اسبوعيا

وبعدين الجلسات البقيه تكون كل اسبوعين وبعدين كل شهر ... إلى تنتهي الجلسات بعد مدة 6 اشهر

يعني تكلفة العلاج الكلي اجماليا تقريبا 4000 ريال


طبعا اللي صار معاي اني رحت للدكتور واخذوا علي رسوم كشف ودخلت عليه وسألته عن هاذي الحقن ومدى فعاليتها

فقال لي الدكتور هي طريقه يتم فيها تزويد فروة الرأس بهرمونات ومحفزات لنمو الشعر ويتم حقنها بالفروة لضمان وصول الهرمونات الى بصيلات الشعر .... ضرب لي مثال .... قال لو انتي مثلا سكبتي ماء على يدك .. كم نسبة الماء اللي راح تتسرب الى داخل جسمك ..... قلت ه ممكن 2 او 3 بالمئه ...... قال لي طيب لو حقنتك بالماء ... كم نسبة الماء اللي راح تدخل جسمك .... قلت له مئه بالمئه .... قال لي ايوا بالضبط .... هاذي هي الفكره

الفكره ان نضمن عن طريق العلاج وصول الهرمونات الى البصيلات مئه بالمئه

طبعا الحقنه تتكون من هرمونات وادوية للشعر مثل المينوكسيديل وغيره ... يعني على ماعتقد ان مافيها شي جديد


المهم ... قلت له اتكل على الله وأبدا بالحقن ..... راح الدكتور وجاب لي كرسي وجلسني عليه .... وجاب ابره
عاديه مثل الابر المعروفه ... عدا انا راسها مدبدب .... وبدا يحقن في فروة راسي

وخزني يمكن 40 او 60 وخزه ..... ماحسبتهم ..... لكن الم فظيع لكل وخزه


تخيلوا الموقف وخز ابر في فروة الراس .... الم فظيع ... بس الجميل فيه ان هو يزول بمجرد إنتهاء الجلسه

طبعا نزفت اشوية دم من فروة راسي لكن بسرعه توقف ...

الشي الغريب ان العلاج كان جدا بدائي ... كنت متوقعه ان بيكون عنده جهاز خاص بالحقن ومش ابره عاديه

لان اللي اعرفه ان الحقن يفترض به ان يتم عن طريق جهاز mesogun

بس الشي الجميل ان الدكتور يقول ان هي افضل حل موجود حاليا لعلاج الشعر .... والحل البديل له في حال ان لم تتطور النتائج هو زراعة الشعر ..... ((( عاد مادري إذا كان هو يبيعني كلام عشان ارجع له واكمل العلاج او صادق )))

سألت الدكتور هل فيه ادويه تنصحني اني اخذها من الصيدليه او هرمونات استخدمها ؟

قال لي لا ... افصل الهرمونات والحلول اقدمها لك عن طريق العلاج ... والادويه الموجوده بالأسواق ماراح تعطيك نتائج مثل اللي اقدمها

سألته طيب متى راح تبين النتايج ... قال لي بعد شهرين


قلت له طيب وبعد العلاج هل فيه ادويه اتعطاها ؟ ... قال لي راح تستخدمين المينوكسيديل وراح اعطبك جهاز بـ 500 ريال

وظيفته ان هو تمررينه على راسك عشان يعمل فتحات بفروة الرأس مقدار قطرها نص ملي ...بعدها مباشرة تستخدمين المينوكسيديل .... عشان تضمنين ان هو يدخل الى اعماق فروة الراس .... طبعا استخدام هذا الجهاز ممكن يسبب التهابات موضعيه بسيطه .... بعدها طلعت من عند الدكتور

اعتقد ان العلاج بالميزوثرابي والانتظام على هرمونات مغذيه للشعر مع المينوكسيديل .... يعتبر شي كافي لإعادة وتأهيل الشعر للنمو مرة ثانيه ... وأهم شي الابتعاد عن المواد الكيماويه اللي تضر الشعر مثل الصبغات وغيرها ... وغسل الشعر بالماءالمحلى وعدم استخدام ماء الحنفيه في غسله


وإن شاء الله تلاحظون تحسن بحالة شعركم

طبعا راح انزل موضوع ثاني إن شاء الله عن كيفية طريقة اختيار الدكتور المناسب لعمل عملية زراعة الشعر

عموما هاذي جلستي الاولى بالعلاج وحبيت اشارككم فيها ... وإن شاء الله راح اوافيكم بنتايج العلاج بالحقن

تقبلوا تحياتي