اقدم لكم جلو كباب ايراني على طريقة المطاعم الايرانيه وبنفس الطعم
اليوم سويتها على الافطار .. وطبعا لان بعض العضوات طلبو الطريقة مني
ووعدتهم بطرحه مع الصور
ان شاءلله تعجبكم .. واكيد بتعجبكم
الكميه هذي لـ 30 الى 35 سيخ كباب
نبتدي باسم الله
نفرم بالاول 5 بصلات كبيره بالفرامه
ونفرم اللحم مع قليل من الشحم يستحسن فخذ والظهر استرالي
منزوع عنه الشحم وعدم رمي الشحم لاستخدامه وفرمه في ما بعد ع اللحم
عقب ما نفرم اللحم اول مره نفرم نص كميه الشحم فوقه
نصه ومب كله ( اطلبي من اللحام يفصل الفخذ من العظم والشحم )
وعدم رمي الشحم لانهج تبينه عشان تفرمين النص منه مع اللحم
نحط البصل المفروم في مصفاة ونضغط عليه حتى ينشف جيدا
ونسكب سائل البصل لان لا نحتاجه ولان اذا اضفناه على اللحم ما بيثبته على الاسياخ
نفرم اللحم مرة ثانيه حتى يصير شبه ناعم
نغسل الخضره المكونه من شدة بقدونس ونص شدة شبنت شده كزبره
ونستخدم القليل منه وليس كله .. فقط لطعم الكباب
ونفرم القليل منه بنفس اللحظه بالفرامه على اللحم
ونخلطه جيدا هكذا
يتبع
ونضيف ملعقه من بهارات مخلوطه وملعقه وربع ملح وملعقه صغيره بكربونات الصودا ومانكثر من الكربونات فقط ملعقة صغيره
ونخلطهم جيدا هني انا تعبت من الخلط وخليت حماي يخلطهم ههههه
لاحظو بان الخلطه مخلوطه جيدا وناعمه وايد
ونجهز ماء حار حتى نغمس ايدينا فيه ونبتدي نسيخهم
ونضغط عليه مابين اصابعنا نفس الصوره
بس لازم المكان يكون بارد ومب حر والخلطه يستحسن نسويها و
نحطها بالثلاجه عشان تكون بارده .. والاسياخ ماتكون حاره او دافيه
المهم يكون المكان بارد ويوم نرسه بالصينيه نخليه جدام المكيف
ونشويهم ع الفحم ونسيخ طماط وبصل ( لزوم الاكله هههه )
ولازم يوم نحطه ع الفحم نحركه كل 20 ثانيه
يتبع