مشعل خير :

قصـــة حقيقة من حمص تسلط الضوء على قضية المفقودين ======================================= بســـم الله الرحمن الرحيم بابا الغالي .. اتذكرتني .. أنا حذيفة .. اشتقتلك .. الماما جنبي بس ما قلتلها أنو عم اكتبلك الرسالة مشان ما تشكيلك عليي .. بدي احكي بس بيني و بينك .. بابا .. من وقت ما طلعت تجبلنا خبز من شهرين و نحنا ما أكلنا خبز ..ما لأنه ما في خبز ..فيني وقف عالدور ما مشكلة .. بس نحنا بطلنا ناكل خبز لأنه ناطرينك .. بدنا الخبز اللي أنتي بدك تجيبه. تأخرت علينا كتير .. أخي محمد ما عم يخلي حدي يقرب ع كرسيك اللي كنت تقعد عليه و تتفرج ع الأخبار .. وقت تأخرت .. ما خليت محل ما دورت عليك فيه .. ما خليت مخبز إلا و سألته عنك .. فتت ع الانترنت دورت عليك من بيت ست تالاف شهيد بحمص .. دورت عليك حتى بالفترات اللي قبل ما كنت رايح فيها .. بابا .. تذكرتني .. بتتذكر وقت كنت تخانقني مشان ما أهرب من البيت و روح ع ساحة الخالدية أتظاهر .. بتتزكر شلون هربت من البيت ع السكت .. و اتفاجأت فيك انت واقف ع الزاوية بالساحة عم تنددن مع الساروت .. جنة جنة جنة و عم تبكي .. ووقت قربت عليك تكركبت و ضميتني .. و بعدها اشترينا باكيت حمرا طويلة خلصتو انتي كله بساعة وحدة .. بابا .. بتتزكر بسكليتك البالون يللي صرلها عندك من عمري .. ووقت صار الحصار بالخالدية و انقطعت العالم من الخبز وماعاد في سيارة تمر ، أنت انتخيت و قلت ما في غير بسكليتي بتفك الحصار لانو فيها خرجين كبار .. و رحت تحت الضرب و جبت 30 ربطة خبز .. ههه بتتزكر شلون أول ماشفت الخبزات صرت عيط تكبييييييير .. وصارت الحارة كلها تكبر .. هههه بابا .. تذكرتني .؟ أنت وينك هلاء ؟ مخطوف ؟ محبوس ؟ شهيد ؟ محاصر ؟ وينك يا أبي و ينك يا روحي .. تعبنا بلاك .. بس ما تفكرنا ضعفنا .. انت ربيت رجال .. صحي عمري 16 سنة .. بس كبرت يا ابي كبرت .. بابا .. جوعان انت ؟ عطشان ؟ شو عم تفطر ؟ ترى ليك بدي افسد ع شغلة .. الماما عم تبكي بالحمام عليك .. و بس تطلع بتروح ع المطبخ و بتترم بصل .. صار عنا بصل متروم ليوم البصل .. بابا .. عندي أمل شوفك ما بعرف ليش .. وعطول بحمد الله، لأنه إذا الله كتبلك الشهادة فالحمد لله أنك هلاء بالجنة .. و إذا كنت مسجون فالحمد لله معناتا رح تطلع .. و إذا كنت محاصر بشي محل .. فأكيد رح توصلك كلماتي و تتطمن علينا .. يعني بكل الأحوال الحمد الله .. بعتلك رسالة بالصفحة هون بس باللغة العامية ، بتعرفني كسلان أنا بالعربي .. و بكرا بدي ارجع اقرا التعليقات .. ما بتعرف بركي بتوصلك كلماتي و شي حدي بيطمني عليك ؟ ادعولنا أخواتي .. ولا تنسوا تنشروا رسالتي بجوز تساعدوني

قصـــة حقيقة من حمص تسلط الضوء على قضية...