جمعتي مبلغ من دون ما يعرف زوجك؟؟ وصرتي ذكية؟؟

مساء الورد لأحلى بنات ..

والله إن في كلام وايد بقلبي ..
ونصايح لو تعرفون فائدتها تساوونها بالذهب << احلفي يا شيخة ..

المهم يا بنات ..
قبل كم شهر .. رحت أزور بنت عمتي والدة .. كنا قاعدين ونسولف..
بنت عمتي الثانية فتحت لي موضوع .. قالت لي بصراحة دنوش حبيت أقول لك على حاجة ..
قلت لها تفضلي حبيبتي ..
قالت لي .. ما أبغاكي تزعلي مني .. انتي زي أختي .. ومثل ما أنصح خواتي بنصحك ..
قلت لها أنا أعتبرك أختي الكبيرة .. وما فيها شي لو قلتي لي أي حاجة بمصلحتي ..

قالت لي .. أنا أشوفك كثير تصرفين على لبس ومكياج وعطور ..
ولما نروح للسوق انتي أكثر وحدة تبعثرين فلوسك ..
انتي تفكرين احنا ما عندنا نشتري؟؟ عندنا يا قلبي .. وما علينا قاصر ..
بس الوحدة لازم تجمع فلوس للزمن حبيبتي ..

قلت لها بس أنا وزوجي نجمع لنا في البنك مبلغ شهريا ..لو انه بسيط لكننا نوفر ..
قالت لي مو هذا قصدي حبيبتي .. وفري لك مبلغ من غير ما يدري زوجك ..
انتي بهالحركة ما سويتي شي عيب ولا شي حرام ..

قلت لها طيب ليش ما نجمع مع بعض؟؟
قالت لي عشان الرجال إذا يحس في فلوس موجودة ..
كل يوم راح يطلع لك بشغلة .. بقول لك يوم الكفرات يبغى لها تبديل ..
ويوم رجلينه تعوره ويبغى له مستشفى .. وما راح يرتاح لحد ما يطمن انك ما عندك فلوس ..
وما تقدرين ما تعطينه .. بقول عنك ما تحبينه ..

المهم سمعت نصيحتها .. وابتديت أجمع أي مبلغ يطيح في يدي ..
طبعا ما قصرت على نفسي .. وهذا هو لبسي وعطوري .. بس بحدود المعقول ..
جا لي يوم .. حبيت أعالج شعري بالكيراتين .. وكانت قيمة العلاج 3000 ريال ..
قلت لزوجي أبغى أعالج شعري .. وأبغى 3000 .. قال لي والله ما تغلى عليكي يا عمري ..
بس هذا المبلغ كل إلي يبقى من الراتب بعد القروض .. بعدين كيف نعيش؟؟

أنا أخذت من الفلوس إلي مجمعتها ..
ورحت سويت شعري .. من غير لا يدري ..
ولاحظ على شعري متغير .. حتى أخته لاحظت على شعري ..
لما قالت لي دانة شعرك صاير حلو .. قال لها زوجي ..
ما شالله هالأيام مهتمة بالأكل الصحي .. وتستخدم حمامات زيوت واعتدل شعرها ..
ولما صرنا لحالنا .. قال لي أدري يا عمري أنا ما عطيتك فلوس واستبدلتي الكيراتين بحل آخر ..
وصدقيني إن شعرك صار أحلى من لو عملتيه كيراتين إلي احتمال يخرب شعرك..

وعرفت إني أحتاج لمبلغ .. من ورى زوجي .. للأزمات إلي من هالنوع ..
زوجي قال عني مهتمة في شعري .. ونظيفة ومبتكرة حلول لنفسي.. وطلعت أنا العبقرية ..
بسبب 3000 هو ما يدري عنها ..

وصرت لما تسافر أمي أقدر أعطيها مبلغ من عندي من غير لا زوجي يدري ..
وصرت أقدر أسوي أشياء أكثر بحرية .. من غير ما ياخذ عني فكرة إني مسرفة ..

كل إلي سويته .. وفرت جزء من راتبي لنفسي ..
والجزء الباقي لأشياء مشتركة بيننا أنا وزوجي ..

أتمنى انك تكوني ذكية وتوفري لك مبلغ على جنب من غير لا يدري ..
ترى الزمن يخليكي تحتاجي في بعض المناسبات مبالغ الزوج لا يمكن يقدرها أو يقتنع فيها..
وش راح تسوين لو جالك يوم لا سمح الله مرضتي مرض يحتاج علاجه لفلوس
وزوجك بالصدفة كان ما عنده فلوس يعالجك؟؟
والله يا بنات كلنا نحتاج نسوي هالحركة .. بس احنا ما نوعى إلا متأخر ..

ومكان التوفير مش أزمة ..
تقدرين توفرينه عند أمك ..
أو تفتحين لك حساب بالبنك ..
أو تجمعينه بغرفتك في بيت أهلك ..

ولو المبالغ إلي توفرينها قليلة ..
بس بتنفعك ليوم العوزة ..

والله إني نصحتكم من كل قلبي ..
لأني استفدت من هالتجربة .. وحبيت أفيد الجميع بها ..
ولو ما نفع هالمبلغ ما يضر ..

وإلي تنتفع من هالنصيحة
تدعي لي الله يرزقني بالذرية الصالحة ..

تحياتي للجميع ..

..دانة الدنيا..