جمعه وسبت ولا سبت وأحد

السلام عليكم ورحمة الله وبركاته

يروح كلام ويجي كلام إن الجمعه بيكون يوم دوام رسمي وبتكون الإجازه الإسبوعيه السبت والأحد.

طبعًا ذكروا أسباب كثيره لهذا الشي..
لكن أنا من الناس الي تضايقت من هذا الخبر
وتمنيت ما يكون صدق لأن في نظري الجمعه يوم عباده وصلاه وذكر.

بس جلست أفكر هل يوم الجمعه بالفعل الكل يعتبره عباده ويروح المسجد ويحضر الخطبه؟

ماتتفقون معي وللأسف الشديد إن أغلب الطلاب والموظفين يقضونه نوم بحكم انه يوم إجازه والخميس سهر؟

ماتتفقون معي لو كان بالفعل يوم دوام عادي إن المساجد بتمتلي بحكم الكل قايم ويعمل ويشتغل فإذا جا بريك الصلاه الكل بيروح؟

والأهم هل يوم الجمعه في زمن الرسول كان زي الحين؟
لا أسواق مفتوحه
ولامطاعم
ولا أي شي
الأسواق تفتح ٤
والمطاعم بعد الصلاه
لكن الصباح الشوارع فاضيه وكل شي مقفل.

ماكان كذى في زمن الرسول
كان فيه بيع وشراء
وحياه وناس تروح وتجي
بدليل قوله تعالى
(يا أيها الذين آمنوا إذا نودي للصلاة من يوم الجمعه فاسعوا إلى ذكر الله وذروا البيع)

يعني البيع والشراء ممنوع شرعًا من النداء الثاني إلى إنقضاء الصلاه.


المهم وبالرغم من كل هذي الأفكار لازلت أتمناه يبقى إجازه🙂