جنيت على خراب عشي...وش اسوي؟؟

بدون مقدمات بادخل في السالفه على طول..

انا زوجي مسؤول في شركة..ومسؤولياته تحتم عليه انه يتاخر في العمل واحيانا كان ينام بالعمل عشان الشغل يخلص وكان يحطني عند بيت اهي في كل مره يتاخر فيها او يسافر للعمل..

المهم..في فترة ال 4 شهور الاخيرة مسك منصب يحتم عليه السفر دايم لمتابعة مشاغل الشركة..

وصار الله وكيلكم من بلد لبلد ومن مكان لمكان لدرجة انه ماقعد بالرياض اسبوع على بعض طوال هذه الفترة..

ما اخفيكم يا بنات اني كنت اشيل من همه الكثير وكان لما يشتكي من الدوام وانه متعب كنت اقول له ما يخالف هذا رزقك والطبيعي انك كل ما ترقيت كل مازادت مسؤولياتك وكنت اخفف عنه الشيء الكثير..

لكن طفح الكيل وصرت اتعب من التنقل وانا كل يوم والثاني شايلة عفشي وعيالي وشغالتي وطالعه من البيت ورايحه عند اهلي بالاسبوع والعشرة ايام..

واللي زاد الطين بله ان في خلال شهر واحد سافر 3 مرات وحده منهم كانت لزيارة والده اللي يعيش في منطقة ثانيه..

ما اخفيكم هو كان ملمح لي من بداية زواجنا ان اهله في الدرجة الاولى وانا كنت اقول في نفسي معليش اللي مافيه خير في اهله مافيه خير في زوجته..

لكن الامور تمااااااااااااادت وغيابه المتواصل صار ياثر علي وعلى عياله حتى اهله صارو يتذمرون من عمله ويشيشوني عليه واني كيف سامحه له يسافر..

الزبدة..جاني قبل يومين وقالي لي انه بيسافر طبعا انا بكبريائي عييت اقول له لا تسافر او خذني معك لاني عارفة ان روحتة شغل مو شي ثاني والعياذ بالله ولانه ماقصر معي ولا مع عيالي كتعويض عن سفره المرة الماضية..

لكن ليلة السفر انتفخت وتنرفزت ونويت نيه شينه..هو كان متوقع اني كالعادة باجمع قشي واستعد اروح لبيت اهلي لكن انا عاندت هالمره وقلت له ماراح اروح وباقعد في بيتي طبعا هو من باب الخوف علي وعلى عيالي رفض جلوسي واصر اني امشي لاهلي وكلمه منه وكلمه مني شبت النار وطلعت كل اللي بخاطري وفي الاخير وانا في قمة عصبيتي قلت له اذا طلعت من بيتي ماراح ارجع له الا لما تعرف ان لك زوجة وعيال لهم حق عليك والحياة مو بس شغل واخذت عيالي وطلعت وحلفت ما ارجع..

الان له كم يوم مسافر ولا دق علي وانا بعد ما كلمته وانا اعرف زوجي عنيد ومكابر ومستحيل يتنازل ويكلمني خصوصا انه معتقد انه على حق..

انا يا بنات مليت وتعبت وحاسه اني بالدرجه الثالثه بعد اهله وعمله ابيه يتعذب ويحس ان البيت والحياة بدوني وعيالي مايسوون..

عارفه اني تسرعت بكلامي له لكن انا مصرة اني ما ارجع الا لما يشوف له حل ويوفق بين عمله وبيني..

والله يا بنات تعبت من التنقل مهما كان الوحده ماترتاح الا في بيتها حتى لو اهلها شايلينها على راسهم..

وش رايكم يابنات..انا ابي احرق قلبه مثل ماحرق قلبي طول ذيك الشهور بتركه لي؟

طولت عليكم لكن من جد ما ادري وش اسوي..شورو علي الله يجزاكم خير :icon33: