حابة استشيركم في جدولي برمضان بعد ماتروح شغالتي

السلام عليكم مساء الخير

الشهر عليكم مبارك مقدما

بما أنه أول رمضان بيكون مع اطفال ومن دون شغالة حبيت أستشيركم في الجدول البسيط اللي سويته لنفسي

شغالتي بتروح قبل رمضان بكم يوم تبي تصوم مع اهلها وقبل ماتروح بخليها تنفض معي البيت طبعا بديت في المطبخ والشبابيك باقي غرفة الاولاد وغرفتي والصالة بيتي الحمد لله نظيف وصغير مايحتاج ذاك الكرف

طبعا رمضانات اللي فاتت الشغالة تقطع وتجهز كل شي بس أقوم وأطبخ الفطور وهي تمسك الاولاد

رمضان هذا غير فحبيت أسوي لي جدول بسيط طبعا راح أصحى واصحي اولادي قبل وقت تحضير الفطور بفترة علشان أكلهم وأغير لهم مايجي وقت تحضير الفطور الا انا خالصة منهم ومايشغلوني

أولا ـ وقت تحضير الفطور

الاعداد للفطور على حسب نوعيته من تقطيع بصل الى طماط الى الحشوات أكون مجهزتها قبل ما أبدا علشان ما انحاس
أهم شي عندي المعجنات لان زوجي يحبها وفضل من الله والحمد لله اولا واخرا انا شاطرة فيها ولاهي تاخذ وقت مني
بعد ما أعجن عجينة المعجنات احط القهوة والشاي الشوربة والمكرونة على النار على بال ماتتخمر العجينة
ثم أبدا في تشكيل الفطاير
بعد ما أخلص من الفطاير وادخلها الفرن اقلي السمبوسة وغيرها من الي تحتاج قلي مثل الكبة او كفته هذي افزنها قبل رمضان طبعا السمبوية أفرزن كل حق 5 ايام بس لاني ما أحب طعمها اذا باتت كثير في الفريزر

الحلى والحلويات والعصائر تكون محضرة من الليل

تنظيف المطبخ قبل الفطور لاني اذا تركته الى بعد الفطور راح تسبب لي ازمة مع مواعين الفطور

فطوري دايما بسيط لاننا عايلة ماتاكل كثير اللهم لك الحمد

ثانيا ـ بعد الفطور يبدا وقت التخدير هذا شي ضروري قبل العشاء اجهز نفسي لصلاة العشاء والتروايح واقرا قران حتى يجي وقتها

ثالتا ـ بعد الصلاة يبدا شغل البيت وغسيل الملابس وكويهم مسوية لهم جدول علشان ماتتراكم علي مقسمة على ثلاثة ايام في الاسبوع وبما ان بيتي صغير ماراح ياخذ مني وقت ساعة ونصف بالكثير

رابعا ـ بعد ما أخلص من البيت اسوي العشاء طبعا يكون شي خفيف وبعدها التفت الى عائلتي الكريمة ويكون الوقت هذا لي اسوي فيه اللي ابي الى وقت السحور


طبعا أبي رايكم لاني مقبلة على فترة اول مرة أخوض تجربتها

اسأل الله لي ولكم ان يبلغنا رمضان على خير ونحن واحبابنا بخير وصحة وعافية